Ataatsimiittarfik Erling Høeghimi Aningaasaqarnermut Akileraartarnermullu Ataatsimiititaliami siunersiuinermut ataasinngornermi ulloq 27. januar 2020

 

Matumuuna Inatsisartut suleriaasianni § 19 naapertorlugu Aningaasaqarnermut Aatsitassanullu Naalakkersuisoq pinngitsoorani soraarnerussutisiaqalernissamut katersinissamut aaqqissuussinermut akilersuisitsinerup aqunneqarnerani Naalakkersuisut maannamut misilittagariligaat pillugit siunersiuinermut Aningaasaqarnermut Akileraartarnermullu Ataatsimiititaliamit aggersarneqarpoq.

 

Aningaasaqarnermut Akileraartarnermullu Ataatsimiititaliap oqaaseqaatai apeqqutaalu:
Malittuani apeqqutini allatut allassimasoqanngippat Soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersumut innersuussisoqarpoq.

1. Inatsimmut nassuiaatit, tassanilu aningaasaqarnikkut allaffissornikkullu kingunissatut naatsorsuutigineqartut Naalakkersuisunit suli atuuttutut tunngavissiisutullu isigineqarpat?

 

2. Inatsimmi pingaarnertut imarisat tunngavissiisutut malinneqartutullu Naalakkersuisunit isigineqarpat?

 

3. Inatsimmik siunertarineqartut naammassineqartutut sulilu pissutsinik piviusunik takutitsisutut Naalakkersuisunit isigineqarpat?
3.1 Suliap ingerlanneqarnerani tamarmi inatsimmi malittarisassiissutaasut naapertorlugit Naalakkersuisunit inatsit malinneqarpa?

 

4. § 7, imm. 3-mi aalajangersagaq akileraarutigisussaatitaasunik qaffasinnerpaamut inissiinissamut piumasaqaateqarnissamut tunngavissiisutut Naalakkersuisunit isigineqarpa?

 

5. Sooruna inatsisip periarfissinera naapertorlugu appasinnerusumik akileraarusiisinnaanermut taarsiullugu akileraarusiunneqarsinnaasumik qaffasinnerpaamik akileeqqusinissaq Naalakkersuisunit toqqarneqartoq?

 

6. Ileqqaarnissamut tunngavissaq §2-mi kiisalu §3-mi taaneqartoq 150.000 kr.-iusoq 350.000 kr.-inut qaffanneqaraluarpat, tamanna qanoq pisortanut, innuttaasunut inuussutissarsiutinillu ingerlatsisunut allaffissornikkut aningaasaqarnikkullu kingunissava?

 

7. Inatsimmik atorunnaarsitsineq qanoq pisortanut, innuttaasunut inuussutissarsiutinillu ingerlatsisunut allaffissornikkut aningaasaqarnikkullu kingunissava?

 

8. § 7-imi aalajangersakkanik atorunnaarsitsigallarneq qanoq Naalakkersuisunut piumasaqaateqassava?

 

9. Inuup 2018-imi soraarnerussutisiaqarnissamut ileqqaagaqanngitsup 2019-imi ileqqaarutigineqarsimanngitsunik akiliuteqarsimanissaa qanoq ilimanartigaa?

 

10. Inuk 2018-imi ileqqaarutigineqarsimanngitsunik januar 2020 aallarnerfigalugu 6 %-inik akilersueqquneqaruni, taava 2019-imi akiliutigineqarsimanngitsunik september 2020-mit suli qaavatigut 6 %-inik akilersueqquneqalissava (inatsimmi § 7 naapertorlugu)?

 

11. Kisitsisit apeqqut 10-imi pineqartut alliartulersinnaanerat Naalakkersuisunit uppernarsarneqarsinnaava, taamaalilluni (2020-mi 6%-inik ileqqaartoqarnissaanik piumasaqaateqarnerup saniatigut) procentip akileraarutissap qaavatigut 2020-imut ileqqaarutigeqquneqartut ilanngullugit 12 %-inngorluni?
Assersuut: Avannaata Kommuniani innuttaasoq 2018-imi 2019-imilu soraarnerussutisiaqalernissamut ileqqaagaqarsimanngitsoq:
Procenti akileraarut nalinginnaasoq 44%
2020 tamakkerlugu 2018-imut akuliutigineqarsimanngitsunut +6%
September 2020-miit 2019-imi akiliutigineqarsimanngitsunut +6%
Akileraarutissat allagartaat nutaaq procentimut akileraarutissamut tapiliussartalik 56%
Tamattuma saniatigut 2020-mi soraarnerussutisiaqalernissamut ileqqaarutissat 6%
Taamaalilluni pineqartoq akissarsiaminit ima ilanngaassivigineqassaaq 62%

 

12. Pinngitsoorani soraarnerussutisiaqarnissamut ileqqaarnissamut aaqqissuussinerup atuutilerneranit pisut tamaasa nassuiaatigeqqullugit Naalakkersuisut qinnuigineqarput. Tamanna malittuani apeqqutinut akissuteqarnerup saniatigut.
12.1 Suliaq manna Akileraartarnermut Aqutsisoqarfimmit taamaalillunilu Naalakker-suisunit tiguneqarsimasoq qangali ilisimaneqarsimava?

 

13. Akileraartarnermut Aqutsisoqarfik taamaalillutillu Naalakkkersuisut inaarutaasumik naatsorsuinerup suliarereernerani inunnut soraarnerussutisiassanut ileqqaarutissanik naammattunik akiliuteqarsimanngitsunut saaffigissimappat, taamaalillutik taakku soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersumi §7, imm. 2-kkut erseqqilluinnartumik malittarisassiuunneqartutut sapaatip akunnerisa sisamat ingerlaneranni nikingassummut matussutissanik akiliinissamut periarfissinneqarlutik?

 

14. Inuit 6.600-t suliamit matuminnga eqqorneqartut ilaat qassit pisup siulianili pisortanut akiitsoqareertuuppat?

 

15. Suliaq saqqummereermat ilaatigut Aningaasaqarnermut Aatsitassanullu Naalakkersuisoq allagarpassuarnik Akileraartarnermut Aqutsisoqarfimmit nassiunneqarsimasunik utertinneqarsimasunillu Qanoruukkut takutitsisoq takuneqarsinnaasimavoq. Utertitsinerit taakku qanga aallartippat inuillu eqqorneqartut allakkat imarisaat pillugit paasitinniarlugit iliuutsinik sunik aallartitsisoqarpa?

 

16. Apeqqut 15-imut malitsitut – Naalakkersuisup akisussaasup, piffissaq eqqorlugu allakkanik eqqorneqartunut apuussisinnaasimannginneq pillugu akisussaaffimmik TelePostimut inissiiniarnera tulluartuua?

 

17. Soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersoq atorunnaarsinneqaraluarpat, tamanna qanoq kinguneqassava?

 

18. Qassit soraarnerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersumik malinnissimasut, taamaalillutillu 2019-imi pinngitsoorani soraarnerussutisiaqarnissamut aaqqissuussinermut tamakkiisumik ileqqaaruteqarsimasut Akileraartarnermut Aqutsisoqarfimmit taamaalillunilu Naalakkersuisunit maannangaaq missingerneqarsinnaalereerpa?

 

19. Innuttaasut kusanaatsuliorfigineqartut suliaq pillugu paasisaqarumallutik ilaatigullumi tunngavissaqanngitsumik eqqorneqarnertik pillugu paasissutissiiniarlutik saaffiginnikkaangamik Akileraartarnermut Aqutsisoqarfimmit iluamik akissutisisinnaasannginnerat qanoq nassuiaatissaqarpa?

 

20. Suliat ilaanni inuit inatsit malillugu soraarnerussutisiaqarnissamut ileqqaaruteqarsimagaluartut, qanorli pinerpoq ileqqaarutit assersuutigalugu sulisitsisumit kukkusumik inissinneqartarsimasut Akileraartarnermut Aqutsisoqarfimmit ilisimaneqarsimavoq. Akileraartarnermut Aqutsisoqarfik taamaalillutillu Naalakkersuisut naak tamanna ilisimagaluarlugu inuit tamatuminnga eqqorneqartut procenti akileraarutissaat qaffassimavaat ilanngaatissaallu peersimallugu. Inuit taamak eqqorneqartut arlaleriarlutik saaffiginnittarnermikkut akileraarutit allagartaat nassiunneqarsimasoq atuuttussaasoq taamaallaat akissutisiarisarsimavaat. Naalakkersuisut qinnuigineqarput inunnik akileraarutinut allagartaminnik iluarsiivigineqarnissamik piginnaatitaaffeqartunik oqaloqatiginneqqaarani tusaajumanninnanilu taamatut pissusilersorfiginninneq nassuiaatigeqqullugu.

 

21. Akileraartarnermut Aqutsisoqarfimmi pisussaaffiit aaqqissuussinerillu allat (assersuutigalugu qarasaasiaqarnikkut aaqqissuussinerit il.il.) inatsisit malittarisas-siissutaat malillugit ingerlappat?

 

22. Suliap matuma pissusissamisut ingerlasimannginneranut inuillu pitsaanngitsumik eqqorneqarsimanerannut kina akisussaava?

 

23. Naalakkersuisut isumaqarpat Kalaallit Nunaanni sulisinnaasut tamavimmik soraar-nerussutisiaqarnissamut aaqqissuussinermut pinngitsoorani ilaanissaq pillugu Inatsisartut inatsisaat nr. 21, 28. november 2016-imeersoq malillugu soraarnerussutisiaqarnissamut ileqqaaruteqarsinnaasut, tamatumalu saniatigut ulluinnarni inuuniarnerminni aningaa-sanik namminneq atorsinnaasaminnik sinneqarlutik?

 

24. Sulineq imminut akilersinnaasariaqartoq tamatta isumaqatigiissutigaarput. Suliaq manna tamatuma anguneqarsinnaaneranut pitsaasumik tapiuteqarpa. Sulisartut akornanni suliami matumani eqqugaasut sulerusussuseqarnerulernerinik, imaluunniit ilaatigut pisortanit pilersorneqarnissamik toqqaasoqarneratigut ajortumik kinguneqarsinnaava?

 

25. Pinngitsoorani soraarnerussutisiaqarnissamut aaqqissuussinermut akiliisimannginnermut pillaatitut akiligassiisoqarami?

 

26. Akileraarutissat allagartaat kukkunillit suliap matuma malittuanik innuttaasut akile-raartarnikkut atugaannut allanut ajortumik sunniuteqassappat? Tamanna assersuutigalugu akileraarutinik utertortarnermut imaluunniit akilernikippallaakkanik akiliisarnermut tunngatillugu. Allatut oqaatigalugu soraarnerussutisiaqarnissamut ileqqaarutissanik akiliisitsiniartarneq kiisalu akileraarutitigut akiligassanik allanik akiliisitsiniartarneq erseqqissumik avissaartinneqarsimappat?

 

27. Pisortani ingerlatsinermut inatsit eqqarsaatigalugu Naalakkersuisut suliamik matuminnga passussinerat qanoq isikkoqarpa?

 

28. Matumani pisimasutut ittut pinaveersaarniarlugit assersuutigalugu allakkatigut paasitit-siniaanertigullu innuttaasunut attaveqarnerup pitsaanerulersinneqarnissaa qanoq Naalakkersuisunit qulakkeerniarneqarpa? Innuttaasut soraarnerussutisiaqarnikkut atugassatik, taakkulu qanoq aqutsivigineqarnerat pillugit piffissaalluartillugu erseqqissumik nalunaarfigineqartarnissaat pingaaruteqarpoq.

 

29. Innuttaasut ataasiakkaarlugit akuersiseqqaarnagit pinngitsoorani soraarnerussutisiaqarnermut aaqqissuussinermik atulersitsisoqarsinnaava? Taavami soraarnerussuteqarnermut aaqqissuussinermik saqqummiunneqartup assinganik atuiumanngippata? Taava susoqassava? Taava suliamik qanoq ingerlatsisoqassava, naammagittaalliornissamut periarfissaqarpa?

 

30. Innuttaasunut Kalaallit Nunaanni soraarnerussutisiaqarsinnaatitaanngitsunut, taamaattorli maaniittunut maanilu sulisunut qanoq malittarisassaqarpa? Sooq soraarnerussutisiaqalersinnaatitaanatillu inatsisip atuutsinneqarnerata avataaniinngillat? Pisortanit kiffartuussutinik allanik tamanik pisinnaatitaanissartik pillugu aamma akileraartareersut pinngitsoorani soraarnerussuteqarnissamut aaqqissuussinermut akilersuisinnissaannut tunngavissaqarpa?

 

31. Inuup pinngitsoorani soraarnerussuteqarnissamut aaqqissuussinermik pilersitsisimasup akilersuisimasullu sioqqutsilluni soraarnerussutisiassani tiguniarpagit, tamanna qanoq nassataqassava?

 

32. Innuttaasut siunissami utoqqalinersiaqarsinnaannginnerat pinngitsoorani soraarnerussutisianut aaqqissuussinerup nassatarissavaa?

 

33. Soraarnerussutisiassat 67-iliinermi tunniunneqassappat? Qanorlu amerlatigisukkaarlugit tunniunneqartassappat?

34. Kangilinnguani sulisup akileraarutitut 42%-inik akileequneqarsinnaanera eqqortuusinnaava? – Soorunami teknikikkut kommunip aggornilersorneqarneranut ilaatinneqarput, kommunimilliuna kiffartuussutinik pisartagaqanngitsut. Tamanna qanoq piaartigisumik Naalakkersuisunit iliarsiivigineqarsinnaava? Tamanna immaqa Danmarkimik suleqatiginninnikkut. – Sanilliutissagaanni Tunumi Mestersvigimi, Daneborgimi Station Nordimilu taamaallaat 36%-inik akileraartoqartarpoq.
- Assartuussinikkut/ilaasunik angallassinikkut, nakorsaqarnikkut, aputaajaanikkut, atuarfeqarnikkut, meeqqeriveqarnikkut, kommunip allaffiata immikkoortortaqarneratigut, eqqaaveqarnikkut kiffartuussutinillu allanik kommunimit pisussaaffigineqartunik kiffartuussivigineqanngillat.
- Illersornissaqarfik tamanna pillugu Namminersorlutik Oqartussanik kommunimillu isumaqatigiinniaqateqarmat taakku marluullutik suliartortitanik ilaqutariittut naliliisoqannginnissaa qinnutigaat, taamaattoqarpat kommuni kiffartuussutinik assigiinngitsunik tunniussisariaqassammat. Tamanna naapertuuttuliornerusinnaanngilaq?
- Taamaalilluni aperisoqarsinnaavoq: Kommunip nunaqarfinnut avinngarusimasuniittunut kiffartuussutai/pisussaaffii qanoq minnerpaaffissalerneqarpat?

 

35. Naalakkersuisut akileraartarnikkut malittarisassanik qasukkaanissamik isumaliuteqarpat, taamaalillugit sulisartut avataaneersut aallaavimminni soraarnerussutisiaqarnermut aaqqissuussinernik atukkaminnik attassiinnarsinnaalersillugit?

 

36. Suliniutinut angisuunut aallartinneqareersunut tunngatillugu marloqiusamik akileraartarnikkut aaqqissuussinissamut isumaqatigiissutit qanoq ittuuppat, sulisartullu taakkunani pineqartut immikkut pitsaanerusunik atugassiivigineqarsimappat?

 

37. Nunami maani pinngitsoorani soraarnerussutisiaqarnermut ileqqaaruteqarnermut aaqqissuussinerit aningaasat naleerukkiartornerannut illersorneqarsinnaappat? Taamaanngippat tamanna sumik pissuteqarpa? Aningaasat naleerukkiartornerannut illersuinissamut Naalakkersuisut periarfissaqarpat?

 

38. Pinngitsoorani soraarnerussutisiaqarnermut ileqqaarutit sullinneqarnermut akiliutinit ernianillu pitsaanngitsunit nungusaataasumik sunnerneqannginnissaannik qulakkeerinissaq Naalakkersuisunut ajornanngila?

 

39. Aaqqissuussineq nutaaq eqqarsaatigalugu Savalimmiormiut qanoq inissisimappat?

 

40. Sooq soraarnerussutisiaqarnermut aaqqissuussineq Finanstilsynimit (nunami allami ingerlatsivimmit) akuersissutigineqaqqaartariaqarpa. Sooq ima allanngortinneqarsinnaanngila: Aaqqissuussineq naalagaaffimmit akuerineqartoq nunarsuup immikkoortuani sumiugaluarpalluunniit. Nunani allani assersuutigalugu Filippinerini imaluunniit Thailandimi innuttaasut nunani allani sulisut aamma naalagaaffimmit akuerineqartunik ileqqaaruteqarnikkut aaqqissuussivigineqarsimapput.

 

41. Nunami innuttaasunut tuluttut oqaaseqartunut paasissutissiisarnissamik inatsisillu pillugit siunnersuisarnissamik akileraaruseriffik isumaliuteqarpa?

Naalakkersuisumik siunersiuinermini allanik aamma apeqquteqarnissani ataatsimiititaliap naatsorsuutigaa.

---------------------

Ataatsimiititaliap Naalakkersuisumik siunersiuinerata Naalakkersuisup ataatsimiititaliallu akornanni pingaarnersiuilluni tulleriiaarinerit anguniakkallu pillugit naalakkersuinermut tunngasumik oqaloqatigiinnertut sapinngisamik iluseqartinneqartarnissaa Aningaasaqarnermut Ataatsimiititaliamit anguniarneqarpoq. Taamatut oqallinneq ammasumik oqallinnertut sapinngisamik ingerlanneqassaaq.

 

Kiisalu apeqqutit siuliani allassimasut pillugit allakkiamik kalaallisut danskisullu ataatsimiititaliap Naalakkersuisumik apersuineranut atatillugu pissarsisinneqarnissani ataatsimiititaliap kissaatigaa. Allakkiap kingusinnerpaamik ataatsimiititaliap Naalakkersuisumik apersuinerata kinguninngua uunga nassiunneqarnissaa qinnutigineqarpoq: saam@ina.gl. Allakkiaq ataatsimiititaliap Naalakkersuisumik siunersiuineranut nassarneqarpat atorneqarpallu taassuma nuutinnera ataatsimiititaliap Naalakkersuisumik apersuinerata aallartinnerani ataatsimiititaliap oqaluttaanut ataatsimiititaliallu allattaanut tunniuteqquneqarpoq.

 

Inussiarnersumik inuulluaqqusillunga
Hermann Berthelsen
Aningaasaqarnermut Akileraartarnermullu Ataatsimiititaliap Siulittaasua