Inatsisartunut takuniaaneq
Inatsisartut kikkunnit tamanit iserfigineqarsinnaapput taamatullu aamma eqimattatut kisimiilluniluunniit pulaarnissamut periarfissaqarluni. Qaqugukkut pulaartoqarniarnera pulaarnerullu siunertaa apeqqutaalluni Inatsisartunut angalaarunneqarluni pulaarnissamut periarfissat assigiinngitsuupput.
Pulaartut takkunnerminni saaffiginnittarfimmi nalunaarsorneqassapput. Nalunaarsorneqarnermi pulaartup sumiuussusia ilanngullugu nalunaarsorneqassaaq. Pulaartut tamatuma kingorna angallanneqarnerup ingerlanneqarnerani takuneqarsinnaasumiittussamik nalunaaqutserneqassapput. Pulaarnermi nalunaaqutaq pulaarnerup naammassinerani sulisumut tunniunneqassaaq.
Inatsisartut Allattoqarfiat attavigiuk:
e-mail: ina@ina.gl
Oqarasuaat: +299 34 50 00
Piffissani ataatsimiiffiunngitsuni akeqanngitsumik angallanneqartarnerit
Piffissani ataatsimiiffiunngitsuni, tassa Inatsisartut ataatsimiinnerisa avataatigut, ullut tamaasa akiliisitsiviunngitsumik siumullu isumaqatigiissuteqaqqaarani angallanneqarluni pulaarnissamut periarfissaqarpoq.
Oqaatsit: Kalaallisut aamma qallunaatut. Sulisoqarnikkullu pissutsit tamanna ajornartinngippagu, tuluttut oqaaseqarfiusumik alakkaaneq ingerlanneqarsinnaavoq.
Ataasinng.-Tallimanng.: Nal. 13.00-imiit akiliisitsiviunngitsumik siumullu isumaqatigiissuteqaqqaarani
angallanneqarneq aallartittarpoq (minutsit 30-it missaannik sivisussuseqartarput).
Ataatsimiinnerit nalaani
Inatsisartut ataatsimiinnerisa nalaani takuniaatitsinissamut neqerooruteqartoqarneq ajorpoq, Inatsisartulli ataatsimiittarfianni oqallinnerit malinnaaffiginissaannut periarfissaqarpoq. Inuit Inatsisartut oqallinnerannik malinnaarusuttut arlaliuppata kaammattuutigineqarpoq Inatsisartut Allattoqarfiannut saaffiginninnissaq.
Ataasinng.-Sisamanng.: Nal. 11.00 aallartittarput
Unnummi kultorisiorfimmi
Inatsisartut 2001-imiilli Nuummi Unnummi kultorisiorfimmi, ukiut tamaasa januaarip naalernerani ingerlanneqartartumi, matutik ammatittarpaat.
Ilaasortat sulinerannik, allaffeqarfiit sunik suliaqartarnerinik Inatsisartunilu sulinermi avatangiisinik inuppalaartumik paasisassarsiornissaminnut pisumi tamatumani innuttaasut periarfissinneqartarput. Unnuk Kulturisiorfik Inatsisartut nittartagaatigut Nuuk Ugeavisikkullu nalunaarutigineqartarpoq.
Atuartut paasisassarsioqatigiillu
Niende klassimiit qummut atuartut, ilisimatusarfinni ilinniartut imaluunniit ilinniarfinni ingerlaqqiffiusuni allani ilinniartut aammalu eqimattakkuutaat ikinnerpaamik arfinilinnik peqataasullik saaffiginnillutik angalaarunneqarnissaminnik Inatsisartullu sulinerat pillugu itinerusumik paasisassarsiornissaminnut immikkut inniminniisinnaapput. Meeqqerivinnit meeqqanut atuartunulluunniit 8. klasse tikillugu alakkaatitsinissamut neqerooruteqartoqarneq ajorpoq, taamaattorli inersuaq ataatsimiittarfik takujumallugu piffissamik inniminniisoqarsinnaalluni.
Angalaarunneqarnissamut inniminniiniaruit Inatsisartullu sulinerat pillugu itinerusumik paasisaqarnerorusukkuit Inatsisartut Allattoqarfiat attavigiuk.