Landsrådip siulittaasuata innuttaasunit qinikkap siulliup Erling Høeghip qinigaanerata ukiunik 50-inngortorsiornera

Ulloq 26. maj 2017 Landrådit akunnerminnit siulittaasussaminnik siullerpaamik qinersinerannit ukiut 50-inngorput.

Taamaalilluni Landsrådinut ilaasortat namminneq aalajangertalerpaat kina siulittaasorissanerlugu. Tamatuma tungaanut siulittaasussaq Danmarkimit toqqarneqartarsimavoq. Ilaasortat arlallit piffissap ingerlanerani nutaamik aaqqissuussinerup eqqunneqarnissaanik sorsuuteqarsimapput, maajillu ulluisa 26-anni 1967 Erling Høegh tassa qinerneqarluni, ukiunilu sisamani siulittaasuulluni.

Inatsisartut immikkut pisoq tamanna malunnartippaat Katuami nalliuttorsiualaartitsinikkut. Peqatigitillugu nalliussinermut atatillugu naqitaaqqiamik saqqummersitsisoqarpoq.