Partiit
Partiit naalakkersuinikkut suliaqartut atuuffiat
Tamat oqartussaaqataanerat aallaavigalugu aaqqissuussinermi naalakkersuinikkut partiit inissisimanerat Inatsisini Tunngaviusuni Namminersornerunerluunniit pillugu inatsimmi oqaatsimik ataatsimilluunniit taaneqanngilaq. Taamaakkaluartoq partiit qitiusumik inissisimapput. Inatsisartuni ilaasortat amerlanerpaartaat partii sinnerlugu qinigaapput.
Partii naalakkersuinermik suliaqartoq tassaavoq peqatigiiffik pissutsit assigiinngitsut pillugit assigiinnik isummersuuteqartunik aammalu Inatsisartuni kommunalbestyrelsiniluunniit aalajangiunneqartartut pillugit sunniuteqarnissamik kissaateqartunik ilaasortalik.
Partiimi ilaasortanngornikkut naalakkersuinermillu ingerlatsinermi peqataanikkut inuiaqatigiit, illoqarfigisami nunagisamiluunniit, qanoq aaqqissuunneqarnissaannut sunniuteqaqataasoqarsinnaavoq.
Partiip tamat oqartussaanerat aallaavigalugu aalajangiisartuutitani, tassa Inatsisartuni, kommunalbestyrelsini nunaqarfinnullu aqutsisuni imaluunniit qallunaat Folketingianni Kalaallit Nunaat sinnerlugu marlunnik ilaasortaatitaqarfiusumi, sinniisuutitaqarnermigut sunniisinnaassuseqarneq annertunerpaaq angusinnaavaa.
Partii Inatsisartuni ilaasortaatitaqareersimaguni Inatsisartunut qinigassanngortitsisinnaavoq. Partiit Inatsisartuni ilaasortaatitaqariinngitsut qinersisartut atsiornerinik Inatsisartunut qinersinermi kingullermi taasisut atorsinnaasut tamarmiusut ilaannik 1/31-inik naleqartunik pissarsisinnaagunik qinigassanngortitsisinnaapput.
Partiit aaqqissuussaanerat
Partiit ataasiakkaat tamarmik immikkut partiit malittarisassaat naapertorlugit aaqqissuussaapput.
Partiit amerlanersaat kommunini tamani immikkoortortaqarput. Immikkoortortat ataasiakkaat ataatsimoorlutik partiimut nuna takkerlugu kattuffiupput.
Partiip naalakkersuinerup tungaatigut pingaarnertut anguniagassai partiip nuna tamakkerlugu ataatsimeersuartitsinerani aalajangersarneqartarput. Partiit ilaat ukiut sisamakkaartumik nuna tamakkerlugu ataatsimiititsisarput, ilaat ukiut pingasukkaartumik akulikinnerusumilluunniit. Partiit ataasiakkaat malittarisassaasa qanoq ittuunerat apeqqutaalluni nuna tamakkerlugu ataatsimiititsinermi partiimi assigiinngitsunik inissisimaffillit sinniisaat peqataasarput. Nuna tamakkerlugu ataatsimiinneq partiip oqartussaanerpaartaraa.
Nuna tamakkerlugu ataatsimiittarnerit akornanni nuna tamakkerlugu kattuffik, partiip siulittaasuanik siuttoqarluni siulersuisuunernit aqunneqartarpoq.
Tamatuma saniatigut partiit Inatsisartuni ilaasortaatitaqartut Inatsisartuni gruppeqartarput, tassaasut partiip Inatsisartuni ilaasortaatitai. Inatsisartuni gruppi Inatsisartut ataatsimiinneranni ullut tamarluinnangajaasa Inatsisartuni sulineq eqqartorniarlugu ataatsimiittarpoq. Inatsisartuni gruppi gruppip siulittaasuanik aammalu siulittaasup tullianik ataatsimik arlalinnilluunniit (naalakkersuinermut tunngasuni aammalu aaqqissuussaanermut tunngasuni siulittaasup tulliinik) aqunneqartarpoq. Tamatuma saniatigut Inatsisartuni gruppi arlalinnik oqaaseqartaatuutitaqartarpoq, taakkulu eqqartorneqartoq apeqqutaatillugu Inatsisartut oqallinneranni partiip gruppia sinnerlugu oqaaseqartarput.
Partiip tunngaviusumik isummersuutai "partiprogram"-imik taaneqartartumi nalinginnaasumik nassuiarneqarsimasarput.
Partiit avataanni: Kattusseqatigiit, kisimiillutik qinigassanngortittut attaviitsullu
Partiit Inatsisartunut qinersinermi qinigassanngortitsinissamut kisimik periarfissaqartinneqanngillat. Partiimik tunuliaqutaqarani qinigassanngortinneq aamma ajornanngilaq.
Partiimut attaveqarani qinigassanngortittut "kisimiillutik qinigassanngortitutut" taaneqartarput. Kisimiillutik qinigassanngortittut Inatsisartunut qinigaanissaminnut taasisunik naammattunik pissarsisinnaanerat ajornakusoortarpoq. Ataasiakkaanulli tamanna iluatsitsiffiusarsimavoq.
Partiit avataasigut qinigassanngortittut ataatsimoorlutik isumaqatigiissuteqarnermikkut "kattusseqatigiinngorsinnaapput". Taamaaliornikkut taasisunik annaasaqarsinnaaneq annikillisinneqarsinnaavoq, tassa qinigassanngortittoq Inatsisartunut qinigaanissaminut naammattunik taasiseqarsimanngippat taasisaasa kimut tutsinneqassanissaat pillugu isumaqatigiissuteqartoqarsinnaammat. Imaassinnaavoq kattusseqatigiit sinnerlugit qinigassanngortittut pingasut ima qinersiseqartigisut inummik ataatsimik qinigaatitaqarsinnaallutik, naak taakku tamarmik immikkut ima amerlatigisunik taasiseqanngikkaluartut arlaannaalluunniit qinigaasinnaalluni.
Inatsisartuni ilaasortaq partii sinnerlugu qinigaasimasoq nammineq sulissuteqarnini naapertorlugu imaluunniit anisitaanermigut partiimit tunuarsinnaavoq. Inatsisartuni ilaasortaq taama iliortoq "attaviitsumik" taaneqartarpoq.