Ullormut oqaluuserisassat

Ullormut oqaluuserisassanut nassuiaat.

Uunga siunnersuut Nalunaaquttap aalajangersarneqarnera pillugu Inatsisartut inatsisaata allanngortinneqarneranik Inatsisartut inatsisaat
(Nalunaaquttat ingerlaqatigiiffiannut allamut ikaarsaarneq, aasaanerani nalunaaquttap atorunnaarsinneqarnera)

Uunga siunnersuut Nalunaaquttap aalajangersarneqarnera pillugu Inatsisartut inatsisaata allanngortinneqarneranik Inatsisartut inatsisaat
(Nalunaaquttat ingerlaqatigiiffiannut allamut ikaarsaarneq, aasaanerani nalunaaquttap atorunnaarsinneqarnera)

Uunga siunnersuut: Inatsisartut Ombudsmandiat pillugu Inatsisartut inatsisaat.

Illorsuarmiut nuutsitaasimanerinut pissutsit pillugit, najugaqartuusimasut pineqartut inatsisitigut isumannaatsumik pineqarsimanerisa qulakkeerneqarnissaa siunertaralugu, arlaannaanulluunniit attuumassuteqanngitsumik misissuisoqarnissaanut Naalakkersuisut peqquneqarnissaannik Inatsisartut aalajangiiffigisassaattut siunnersuut. Misissuititsineq 2027-mi upernaakkut tamanut ammasumik saqqummiunneqareersimassaaq.

EMRIP-imit inassuteqaatit naapertorlugit, Kalaallit Nunaanni nunap inoqqaavi “Inuit” paasissutissat tunngavigalugit nalunaarsorneqartalernissaannik Naalakkersuisut peqquneqarnissaannik Inatsisartut aalajangiiffigisassaattut siunnersuut.

Naalakkersuisut Pilersaarusiorneq aamma nunaminertat atorneqartarnerat pillugit Inatsisartut inatsisaata nr. 17-ip, 17. novembari 2010-meersup, Sanaartorneq pillugu Inatsisartut inatsisaata nr. 13-ip, 26. maaji 2010-meersup kiisalu Pigisanik aalaakkaasunik piginnaatitaaffimmik pisisarneq imaluunniit atuisinnaatitaaneq pillugu Inatsisartut inatsisaata nr. 78-ip, 21. novembari 2025-meersup allanngortinneqarnissaannut siunnersuummik saqqummiussinissamut peqquneqarnissaat pillugu Inatsisartut aalajangiiffigisassaattut siunnersuut. Allannguutit aqqutigalugit inuit inuiaat Kalaallit Kalaallit Nunaannut ataavartumik attuumassuteqartunut ilaasut nunaannarmi namminerisamik sunngiffimmi illuaqqanik nalunaaruteqartarnermik pisariinnerusumik aaqqissuussineq malillugu sanaartorsinnaallutillu piginnissinnaassapput. Aaqqissuussinermi illuaqqamut nunaminertamik pisariaqartinneqartumik atuisinnaatitaaneq tunniunneqarsinnaassaaq, nalinginnaasumik angissusissamut killiliussaqassanngilaq sanaartornermullu suliaq tamakkiisumik suliarineqartariaqassanani, taamaattorli isumannaallisaanermut, ikuallattoornissamut, pinngortitamut, avatangiisinut kulturikkullu kingornussanut tunngaviusumik piumasaqaatit attatiinnarneqassallutik. Aaqqissuussineq inatsisitigut pisinnaatitaallutillu pisussaatitaasunut imaluunniit inuussutissarsiutigalugu atuinermut atuutissanngilaq. Inuk Kalaallit Nunaannit ataavartumik nuuppat, aaqqissuussineq naapertorlugu pisinnaatitaaffik atorunnaassaaq.

Naalakkersuisut Kalaallit Nunaanni nuna nunaminertallu privatimik pigineqalersinnaannginnerannik, tunineqarsinnaannginnerannik, qularnaveeqqusiunneqarsinnaannginnerannik iluanaarniutigineqarsinnaannginnerannillu kiisalu nunaminertat taamaallaat atuisinnaatitaanermut malittarisassat naapertorlugit atugassiissutigineqarsinnaanerannik atorneqarsinnaanerannillu aalajangersaasumik Inatsisartut inatsisissaattut siunnersuummik saqqummiussinissamut peqquneqarnissaat pillugu Inatsisartut aalajangiiffigisassaattut siunnersuut.

Kalaallit Nunaanni Inuit Pisinnaatitaaffii pillugit Siunnersuisoqatigiit pillugit Inatsisartut inatsisaata allanngortinneqarnissaanut siunnersuummik Naalakkersuisut saqqummiussinissaannik Inatsisartut aalajangiiffigisassaattut siunnersuut, taamaalilluni Kalaallit Nunaanni Inuit Pisinnaatitaaffii pillugit Siunnersuisoqatigiinni ilaasortaasarneq innuttaasunik sullissinermut atatillugu pisortatigoortumik suliaqarnissamut (borgerligt ombud) maleruagassatigut ilaatinneqalerniassammat. Inatsisissatut siunnersuut kingusinnerpaamik UPA 2027-mi saqqummiunneqassaaq.