04EM/01.25.01-136 Tartuluttut nunatsinni katsorsarneqarsinnaanissaat siunertaralugu Naalakkersuisut... (Atassutip Inatsisartunut ilaasortaatitai: AS, EC, JB, FK og JS)
13. august 2004 UKA 2004/136
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Tartuluttut nunatsinni katsorsarneqarsinnaanissaat siunertaralugu Naalakkersuisut sulissuteqaqqullugit peqquneqarnissaannik Inatsisartut aalajangiiffigisassaattut siunnersuut.
(Atassutip Inatsisartunut ilaasortaatitai: Augusta Salling, Ellen Christoffersen, Jensine Berthelsen, Finn Karlsen aamma Jakob Sivertsen)
Tunngavilersuut:
Nunaqqatigut tartulunnertik pissutigalugu suliarineqartariaqartartut nunatsinni passunneqarsinnaanissaannut atortulersuutit sulisussallu amigaataanerat ilisimaneqarpoq. Tamatuma kingunerisaanik nunaqqatigut tartuluttut tamarmik piffissami sivikinnerusumi sivisunerusumiluunniit Danmarkimiittariaqartarput aatsik salitsillugu, amerlasuutigullu taamatut nappaatillit ukiorpassuarni nunatta Danmarkillu akornanni angalasaqattaartariaqartarput, ajornerpaagaangallu allaat ataavartumik kalaallit napparsimasut angerlarsimaffianni Danmarkimi najugaqaannalertariaqartarlutik.
Napparsimasut pineqartut sapinngisamik aalaakkaasumik inuuneqarsinnaanissaat siunertaralugu iliuuseqartoqarnissaa ATASSUT-mit piffissanngorsoraarput, taamallillutik ilaqutaqarsimagunik ilaquttatik qimaqattaarpallaarunnaarlugit suliffeqarsimagunillu suliffitsik qimaqattaarpallaarunnaarlugu inuuneqarsinnaaniassammata. Taamaattumik tartuluttut nunatsinni suliarineqarsinnaanissaat siunertaralugu Naalakkersuisut sulissuteqaqqullugit peqquneqarnissaannik Inatsisartut aalajangiiffigisassaattut siunnersuut matumuuna saqqummiupparput.
Ullormut oqaluuserisassat kiisalu ullut suliarineqarfissaat