04EM/01.25.01-89 Ilulissani kommunalbestyrelsi aningaasaliisinnaasullu nunanit allaneersut ajornanngippat... (Anthon Frederiksen, Kattusseqatigiit)
3. august 2004 UKA 2004/89
Inatsisartut Suleriaasianni § 32 naapertorlugu matumuuna imaattumik aalajangiiffigisassatut siunnersuuteqarpunga:
Ilulissani kommunalbestyrelsi aningaasaliisinnaasullu nunanit allaneersut ajornanngippat peqatigalugit Ilulissat timmisartunut suluusalinnut mittarfiata 1199 meterinngorlugu tallineqarnissaanik Naalakkersuisut suliniuteqaqqullugit peqquneqarnissaannik Inatsisartut aalajangiiffisassaattut siunnersuut.
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Taamatut siunnersuuteqarninnut soorunami tunngavingisama pingaarnerit ilangaat; Ilulissat kommunalbestyrelse-ata tamarmiusup Ilulissani mittarfiup tallineqarnissaa ukiuni arlaqalersuni sulissutigiuarmangu Naalakkersuisunullu noqqaassutigiuarlugu.
Maanamut ilisimaneqartutut Naalakkersuisut Nunatsinniu angallanneq pillugu politikkikkut nassuiaatit arlaqalersut Inatsisartunut saqqummiuttarpaat, kingullermillu angallarnneq pillugu nassuiaat maanna inatsisartut ukiakkut ataatsimiinneranni saqqummiunneqartussaavoq. Nassuiaat annertunerusumik maanna oqaaseqarfiginngikkaluarlugu takusinnaavara Ilulissat mittarfiata tallineqarnissaa Naalakkersuisut maannakkuungallartoq ilalernartinngikkaat ilaatigut Nunatta kasse-ata tamatumunnga aningaasassaqartitsinnginnera pissutigalugu aammalu billet-sinut akikilliliissutaasinnaanera annikippallaartutut nalilerneqarmat.
Kisianni pissutsit piviusut uangut Ilulissani najungaqartugut ilisimasajut Naalakkersuisunit maani Nuummi najungaqartuniit allarluinnaapput, tassa ilisimaneqartutut Ilulissat sinerissami kommuneqarfinnut amerlanerpaanut allanut naleqqiullugu inuutissarsiorniukkut takornariaqarnikkut angallannikkullu avannaani qitiulluinnartutut inissisimanermigut, Nunatsinni aningaasarsiornikkut annertoorujussuarmik nammaqataammat, tamatumani Ilulissat kommuniani aalisartorsuit inuutissarsiutinillu allanik ingerlatsilluartut eqiingalluinnarlutik ingerlateqataanera pissutaallutik, Ilulissani ineriartorneq annertooq ingerlanneqarmat.
Ilanngullugu ilisimatitsissutigissuara; Ilulissat kisimik ineriartornermi eqqarsaatigineqan-ngimmata, tassa ilisimaneqartutut Ilulissat avannaani angallannikkut inuutissarsiornikkullu qitiulluinnartutut inissisimanertik pissutigalugu Ilulissani mittarfiup tallineqarnissaa avannaani inuutissarsiornikkut aamma minnerunngitsumik takornariaqarnikkut siuarsaaneq annertooq ingerlanneqartussaammat., Nunatsinnut tamarmiut aningaasarsiornikkut iluaqusiisussaq pillugu taamatut siunnersuuteqarpunga.
Naggataatigut ilisimatitsissugissuara; siorna angallanneq pillugu isumasioqatigiisitsinermi kangerlussuarmi ingerlanneqartumi peqataasut tamarmik isumaqataaffigereermassuk Ilulissat Mittarfiata tallineqarnissaa avaqqunneqarsinnaanngitsoq, Nunatsinni aningaasarsiornikkut iluatsittumik ingerlatsineq nanginneqassappat.
Ullormut oqaluuserisassat kiisalu ullut suliarineqarfissaat