04EM/01.25.01-84 Naalakkersuisut ilinniartunut atugassarititaasut pitsaanerulersinniarlugit qanoq iliuuseqalersaarpat, ilinniagaqarnersiutinullu... (Anthon Frederiksen, Kattusseqatigiit)
2. juli 2004 UKA 2004/84
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut: Naalakkersuisut ilinniartunut atugassarititaasut pitsaanerulersinniarlugit qanoq iliuuseqalersaarpat, ilinniagaqarnersiutinullu (sungiusarluni sulinermi tapiissutit) peqqussutip 1. januar 2004-mi allanngortinneqarnerata aalajangersimasumik kingunerisai aaqqiviginiarlugit sunik suliniuteqartoqarsimava?
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Ilinniagaqarnersiutit (sungiusarluni sulinermi tapiissutit) pillugit Inatsisartut peqqussutaata 1. januar 2004-imiit allanngortinneqarnerata kingunerisaanik ilinniagaqartut soraarsinneqartariaqarsimasut ukiup matuma aallartinnerani tusagassiuutitigut nalunaarutigineqarpoq aamma ilinniagaqarnersiuteqartitsinermut tunngatillugu allannguisoqarnerani ilinniartut ilaasa allaat ilinniagaqarnersiutiminnik ikilileriffigineqarnertik soorunami tupinnanngitsumik assut naammangittaalliutigaat.
Nunatsinni naalakkersuinikkut tamatta anguniarparput ilinniagaqarsimasut Nunatsinni amigaataaqisut suli amerlanerulernissaat, taamaaliornikkut aamma Nunatta avataaniit tikisitsisarnerit Nunatsinnut akisoqisut sapinngisamik ikinnerulernissaat anguneqassammat. Tassami tupaallannaqisumik naatsorsueqqissaartarfimmiit ilaatigut ukioq nalunaarutigineqarpoq Nunatsinni namminersornerulernermiit maannamut ilinniakkamik naammassinnissimasut taamaallaat ikittuinnaasut.
Ukioq manna namminersornerulersimanitsinniik ukiut 25-inngortorsiorlugit nalliuttorsiornerit ingerlanneqartussaapput. Suliat assigiinngitsut aamma Nunatsinnut inuinullu ajunngitsumik sunniuteqartut naammassineqarsimapput, kisianni ilinniartitaaneq eqqarsaatigalugu siuariarneq annikippallaarujussuarpoq, tassami tamanna ajoraluartumik assigiinngitsutigut takussutissaqarpoq.
Ullormut oqaluuserisassat kiisalu ullut suliarineqarfissaat