04EM/01.25.01-93 Uumasunik illersuineq pillugu inatsisip december 2003-mi akuersissutigineqarneratigut, tassungalu ilanngullugit... (Palle Christiansen, Demokraatit)
28. juli 2004 UKA 2004/93
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut: Uumasunik illersuineq pillugu inatsisip december 2003-mi akuersissutigineqarneratigut, tassungalu ilanngullugit Kalaallit Nunaata Danmarkillu IWC-mut pisussaaffiisigut kiisalu Kalaallit Nunaata NAMMCO-mut ilaasortaaneratigut qoorortuut atorlugit tikaagullinniartarneq Naalakkersuisunit killiliiviginiarneqarpa inerteqqutiginiarneqarpaluunniit?
(Inatsisartunut ilaasortaq Palle Christiansen, Demokraatit)
Tunngavilersuut:
Tikaagullinnik qoorortuumik Kalaallit Nunaanni piniartarnermut atatillugu kalaallit uumasut illersorneqarnerat pillugu inatsisaat kiisalu inatsimmi ersarinnerusunik maleruagassiorfigineqarnissaanik periarfissaq qulaajaaffigineqassasoq kissaatiginarpoq. Kalaallit Nunaanni tikaagullinnik qoorortuumik piniartarneq ukiuni arlaqalersuni nunarsuarmioqataasut tungaannit isornartorsiorneqartarpoq. Tamanna uumasunik naalliutsitsinertut taaneqartarpoq, tikaagullinnillu naalliunnannginnerpaamik toqutsisarneq qamutiliit atorlugit pisartussatut tikkuarneqarluni.
Uumasut illersorneqarnerat pillugu inatsit 18. december 2003 Inatsisartunit akuersissutigineqarpoq. Inatsisip kapitaliani 5-imi toqutitsineq, pilattaalluni passussinerit taamaaqataallu pillugit § 13-iani ima allassimasoqarpoq:
§ 13. Uumasumik toqutitsiniartup uumasup sapinngisamik piaarnerpaamik naalliunnan-ngitsumillu toqutinneqarnissaa qularnaassavaa.
Qimitsinikkut nivinngaanikkulluunniit toqutitsineq inerteqqutaavoq. Uumasunik imamiuun-ngitsunik ipititsinikkut toqutitsineq aamma inerteqqutaavoq.
Imm. 2. Uumasut toqutinneqarnissaat, matumanittaaq toqoraaneq, uumasut pisarineqarnissaat, toqutitseriaatsit ilaasa inerteqqutigineqarnissaat imaluunniit killiliivigineqarnissaat kiisalu uumasut anginerit ilaasa toqutinneqarnissaat uumasut nakorsaannit imaluunniit inummit allamit piginnaatitaasumit isumagineqarnissaat, pillugit maleruagassanik Naalakkersuisut aalajangersaasinnaapput.
1) Tikaagulliit qoorortuut atorlugit toqunneqartarnerat uumasut illersorneqarnerat pillugu inatsimmi § 13-imi immikkoortup 1-ip immikkoortuanut 1-imut naapertuuppa? Namminersornerullutik Oqartussat uumasut misissorneqartarnerannut immikkoortortaqarfiannit suliamut paasisimasaqartumit piviusorsiortumik, matumani ilanngullugu NAMMCO-p arfernik angisuunik toqutsisarneq pillugu immikkut ilisimasaqartuinit matitsilerlugu Naalakkersuisut akissuteqarnissaat kissaatigineqarpoq.
2) § 13-imi imm. 2 naapertorlugu naleruagassanik ersarinnerusunik Naalakkersuisut inaarsaasimappat?
3) Taamaattoqarsimanngippat tamanna qaqugu pissava?
4) Kalaallit Nunaata/Danmarkip IWC aqqutigalugu pisussaaffii taamatullu Kalaallit Nunaata NAMMCO-mut ilaasortaaneratigut Naalakkersuisut tikaagullinnik qoorortuut atorlugit piniartarnerup annikillinerneqarnissaannik/inerteqqutigineqalernissaannik kinguneqassanerluni?
Ullormut oqaluuserisassat kiisalu ullut suliarineqarfissaat