FM05/37: Folketingip Ombudsmandia pillugu inatsisip allannguutaanik inatsit (Kommuninik iluarsaaqqinnerup kingunerisaatut allannguutit, inatsisip Savalimmiuni... il. il.)
18. april 2005 UPA 2005/37
Inatsisartut Suleriaasianni § 32 naapertorlugu Naalakkersuisut matumuuna aalajangiiffigisassatut siunnersuut imaattoq saqqummiuppaat:
Folketingip Ombudsmandia pillugu inatsisip allanngortinneqarneranik Inatsisissatut siunnersuut pillugu Namminersornerullutik Oqartussat oqaaseqaataat pillugit aalajangiiffigisassatut siunnersuut.
(Naalakkersuisut siulittaasuat)
Tunngavigineqartoq
Folketingip Ombudsmandia pillugu inatsisip allanngortinneqarnissaanik inatsisissatut missingiut Naalakkersuisut Naalagaaffiup Sinniisuutitaanit tiguaat. Folketingip Siulittaasuata qinnuiginninneratigut qinnuteqaat nassiunneqarpoq.
Naalakkersuisut imaqarniliaq allannguutinik nassuiaataasoq tiguaat. Imaqarniliaq inatsisissatullu siunnersuut nassuiaatitai ilanngullugit Inatsisartunut agguaanneqareerput.
Imaqarniliami ilaatigut imatut allassimasoqarpoq:
"Inatsisitut siunnersuummik siunertaavoq Folketingitip Ombudsmandia pillugu inatsimmi Danmarkimi kommuninik iluarsaaqqinnerup kingunerisaatut allannguuteqartitsinissaq. Inatsisitut siunnersuummik tamatuma saniatigut inatsisip oqaasertatigut aaqqissuunneqarnerani periaatsitigullu allannguutissat alalnngortinniarneqarput.
Tamatuma saniatigut siunnersuutigineqarpoq Folketingip Ombudsmandia pillugu inatsimmi aalajangersakkamik nutaamik ivertitsisoqassasoq (§ 34, imm. 2), taamaasilluni Kalaallit Nunaannut tunngatillugu inatsimmi kunngip peqqussutaatigut allannguuteqartitsisoqarsinnaanngorlugu pissutsit immikkut ittut Kalaallit Nunaanni atuuttut tunngavigalugit. Taamatulli aalajangersakkat Savalimmiunut tunngatillugu siunnersuutigineqarpit. Tamanna kinguneqartussaanngilaq Folketingip Ombudsmandiata Kalaallit Nunaanni Savalimmiunilu piginnaatitaaffiini imatut allannguuteqartitsinernik."
Imaqarniliami aamma imatut allassimasoqarpoq:
"§ 34, imm. 2-mi aalajangersakkatut siunnersuutaasoq tamatuma saniatigut tunngavissiissaaq inatsimmi, Kalaallit Nunaanni ingerlatsinermi allannguutaajumaartussat aamma inatsisit maleruagassartaannik Foketingip Ombudsmandiata Kalaallit Nunaanni sulineranut pingaarutilinnik allannguutaasussat pisariaqartitaattut kingusinnerusukkut kunngip peqqussutaatigut suliarineqarnissaannut."
Kunngip peqqussutaatigut inatsit Kalaallit Nunaannut attuumassuteqartoq allanngortinneqalerpat, peqqussut taamaattoq Namminersornerullutik Oqartussanit oqaaseqaateqarfigisassanngorlugu nassiunneqassaaq.
Aammattaaq imaqarniliaq aammalu inatsisissatut siunnersuut oqaaseqaatitai ilanngullugit agguaanneqartoq innersuussutigissavara.
Naalakkersuisut inassutigaat Namminersornerullutik Oqartussat inatsisissatut siunnersuutip akuerineqarnissaanut isumaqataanerannik Naalagaaffimmi oqartussaasut nalunaarfigineqarnissaat Inatsisartunit akuersissutigineqassasoq.
Taamatut oqaaseqarlunga siunnersuut Inatsisartunut oqaluuserisassanngortippara.
Upernaakkut ataatsimiinneq 2005
Ullormut oqaluuserisassat kiisalu ullut suliarineqarfissaat
Inatsisartut inatsisissaattut siunnersuutit- allannguutissallu Naalakkersuisunit UPA 05