§ 33 malillugu siunnersuutinut akuersissutigineqartunut atatillugu nalunaarutit nassuiaatillu UPA-mi saqqummiunneqartussat

Inatsisartut aalajangiiffigisassaattut siunnersuut, Naalakkersuisut peqquneqassasut misissuissasut Royal Arctic Line Kalaallit Nunaannut avammullu assartuinissamut sullissinissamik akuersissutaata atuukkunnaarsinneqassappat pitsaaqutissai ajoqqutissaalu, taamatuttaarlu assartuinermut unammilleqatigiinneq eqqullugu. Misissuineq takussutississavaa sullissinissamik akuersissut peerlugu unammilleqatigiinnermillu eqqussineq aningaasatigut kingunissai qanoq isikkoqarnersut. Misissuineq Inatsisartunut UKA 2023 nallertinnagu tunniunneqassaaq.
Inatsisartunut ilaasortaq Jens-Frederik Nielsen, Demokraterne

Meeqqanut ikiorsiinerit pigasuartuunngitsut timikkut aammalu tarnip pissusaat pillugu immikkoortortaqarfimmut innersuunneqarnermiit annerpaamik qaammat ataaseq ingerlasimanissaanik anguniagalimmik innersuussinissaq kisitsisilersuinissarlu siunertaralugu tarnip pissusaa pillugu aammalu meeqqat timikkut nakorsiartarfianneersunik sukkasuumik suligasuartussanik suleqatigiissitaliornissamik Naalakkersuisut pilersitsinissaat siunertaralugu Inatsisartut aalajangiiffigisassaattut siunnersuut. Suleqatigiissitap taamatuttaaq aningaasatigut sulisutigullu pisariaqartitat ersarissassavaat. Suleqatigiissitap innersuussassat kisitsinerillu UPA 2023 nallertinnagu naammassisimassavaat.
Inatsisartunut ilaasortaq Anna Wangenheim, Demokraatit

Angerlarsimaffinni varmepumpenik aammalu solcellinik pilersitsinissamut pitsaaqutit aammalu ajoqqutit misissornissaanut Naalakkersuisut nassuiaammik suliaqarnissaat pillugu Inatsisartut aalajangiiffigisassaattut siunnersuut. Nassuiaat taakkuninnga ikkussisoqartillugu Namminersorlutik Oqartussat tapiissuteqarsinnaanissaannut aaqqiissummik eqqarsaatersuutinik imaqassaaq. Nassuiaat kingusinnerpaamik EM 2023 Inatssartunut tunniunneqassaaq.
Inatsisartunut ilaasortaq Nivi Olsen, Demokraatit

Kommunit aaqqissugaanerisa allannguutaat pillugit Naalakkersuisut nalilersuinissamik suliaqaqqullugit peqquneqassasut Inatsisartut aalajangiiffigisassaattut siunnersuut. Aaqqissuussaanermi allannguutaasimasut pitsaaqautai ajoqutaalu nalilersorneqassapput, sumiiffimmilu demokratiimut kommunillu aningaasaqarnerannut sunniuteqarsimanersoq, kiisalu allaffissornikillisaaniarnermut siunertaasimasoq piviusunngortinneqarsimanersoq nalilersorneqassallutik. Nalilersuineq UPA2024 nallertinnagu Inatsisartunut agguaassorneqassaaq.

Illoqarfigisaq qimallugu erniartortartut ilaqutaasalu, unammillernartumik atugarisaat pillugit qulaajaanermik iliuusissatullu pilersaarummik suliaqaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut. Iliuusissatut pilersaarut UKA24-p aallartinnginnerani saqqummiunneqarsimassaaq.
Inatsisartunut ilaasortaq Mikivsuk Thomassen, Inuit Ataqatigiit

Nunatsinni allaffissornerup nunatsinnut tulluartumik nutaamik aaqqissuuteqqinnissaanut Naalakkersuisut periusissiamik suliaqaqqullugit peqquneqarnissaanik Inatsisartut aalajangiiffigisassaattut siunnersuut. Periusissiaq kingusinnerpaamik UPA2024-mi saqqummiunneqassaaq.
Inatsisartunut ilaasortaq Doris J. Jensen, Siumut

Soraarnerussutisiaqarnissamut aaqqissuussinermut pinngitsoorani ilaanissap sunniutaasa aaqqissuussinerullu naapertuunnerata nalilersuiffigineqarnissaannik Naalakkersuisut peqquneqarnissaannik Inatsisartut aalajangiiffigisassaattut siunnersuut. Nalilersuineq UKA2023 nallertinnagu tamanut saqqummiunneqarlunilu Inatsisartunut agguaanneqassaaq.
Inatsisartunut ilaasortaq Doris Jakobsen Jensen, Siumut

Utoqqalinermi soraarnerussutisiat akileraarutaasarunnaarnissaannut periarfissat pillugit Naalakkersuisut nalunaarusioqqullugit peqquneqarnissaannik inatsisartut aalajangiiffigisassaatut siunnersuut.
Inatsisartuni ilaasortaq Aqqalu C. Jerimiassen, Atassut