Ullormut oqaluuserisassat

Ullormut oqaluuserisassanut nassuiaat.

Pigisanik aalaakkaasunik arsaarinnissuteqartarnermi suleriaaseq pillugu Kalaallit Nunaannut inatsisip allanngortinneqarnissaanut Inatsimmut Namminersorlutik Oqartussat isumaqataanissaat pillugu Inatsisartut aalajangiiffigisassaattut siunnersuut

Naalakkersuisut Avannaata Kommunia suleqatigalugu UKA 2028-mut kingusinnerpaamik Uummannami Upernavimmilu BAT-mik piumasaqaatinik naammassinnittunik nutaaliaasunik eqqakkanik ikuallaavinnik pilersitsinissamut periarfissat pillugit aalajangiinissamut tunngavissiamik nutarsagaasumik iliuusissanullu pilersaarummik suliaqarnissamik saqqummiussinissamillu peqquneqassasut Inatsisartut aalajangiiffigisassaattut siunnersuut. Aalajangiinissamut tunngavissiami Uummannami Upernavimmilu ikuallaavinnik pilersitsinissamut periarfissat nuna tamakkerlugu eqqakkanik assartuinissamik aaqqiissummut sanilliunneqassapput. Sanilliussinermi aningaasaqarneq, avatangiisinut sunniutit, eqqakkat annertussusaat, ingerlatsineq, assartuineq, sikusarnera, aningaasaliinissamut periarfissat kiisalu ikuallaanermit kissap atorneqarsinnaanera ilaatinneqassapput.

Uunga siunnersuut: Umiarsualiviit pillugit Inatsisartut inatsisaata allanngortinneqarnera pillugu Inatsisartut inatsisaat

Nunami asimiittumi pisortat aqqusiniutaannik sanaartorneq aamma ingerlatsineq pillugu Inatsisartut inatsisissaattut siunnersuut

Inatsisartut aalajangiiffigisassaattut siunnersuut, Naalakkersuisut peqquneqassasoq nalunaarusioqqullugit, utoqqaat inatsisitigut illersorneqarnerat, paaqqineqarnerat ataqqinassusaasalu qanoq annertusarneqarsinnaanersut. Nalunaarusiornermi pitsanngorsaatissatut siunnersuutinut tigussaasunut aningaasatigut allaffissornikkullu kingunissai nalilersorneqassapput. Nalunaarusiaq Inatsisartunut agguaanneqassaaq UPA 2027 nallertinnagu.

Naalakkersuisut Kalaallit Nunaanni pissutsit aallaavigalugit utoqqalinersiaqalernissamut ukiorititanik misissueqqissaarnissamik kiisalu ukiorititat aalajangersarneqartarnissaannut siunissamilu naleqqussarneqartarnissaannut Kalaallit Nunaannut naleqqussakkamik periutsimik kingusinnerpaamik UPA 2028-mi siunnersuuteqarnissamik peqquneqarnissaannik Inatsisartut aalajangiiffigisassaattut siunnersuut.

Apeqquteqaat aallaavigalugu oqallisissiassatut siunnersuut, qanoq ililluta nuna tamakkerlugu utoqqaat toqqissisimasumik ataqqinartumillu utoqqalinissaat qulakkeersinnaaneripput.

Naalakkersuisut kingusinnerpaamik UPA2027-imi Inatsisartut inatsisissaattut siunnersuummik, tamatumalu kingunerisaanik inatsisinut allanut allannguutinik pisariaqartunik, saqqummiussinissamut peqquneqarnissaat pillugu Inatsisartut aalajangiiffigisassaattut siunnersuut. Inatsisissatut siunnersuummi Kalaallit Nunaanni Namminersorlutik Oqartussat, kommunit taakkulu ataanni pisortat suliffeqarfiutaat atorfinnik pilersitsisinnaanerat pioreersunilluunniit attassiinnarsinnaanerat imaluunniit avataanit kiffartuussissutinik pisisinnaanerat inerteqqutigineqassaaq, atorfiup kiffartuussissulluunniit pingaarnertut siunertarippagu periusissatigut attaveqaqatigiinneq, tusagassiuutinut attaveqarnermik aqutsineq, PR, branding, tusaamaneqarnerup pitsaasuutinniarneqarnera imaluunniit politikkikkut attaveqaqatigiinnermut siunnersuineq. Inerteqqummi inatsisitigut pisussaaffiusumik paasissutissiineq, isumannaallisaanermut ajornartoornermullu attaveqaqatigiinneq, ingerlatsinermut innuttaasunullu paasissutissiineq pisariaqartoq, nutserineq imaluunniit attaveqaqatigiinneq suliffeqarfiup pingaarnertut suliassaasa ilagisaat ilaatinneqassanngillat. Peqatigisaanik Naalakkersuisut kingusinnerpaamik UPA2027-imi ingerlatseqatigiiffinnut Namminersorlutik Oqartussanit pigineqartunut tunngaviit assingusut ingerlatseqatigiiffiit pillugit inatsisini killissarititaasut iluini Namminersorlutik Oqartussallu piginnittutut pisinnaatitaaffii aqqutigalugit qanoq atuutsinneqarsinnaanerannik nassuiaammik saqqummiussinissamut peqquneqarput.

Naalakkersuisut kingusinnerpaamik UPA2027-mi politikkimik ataatsimoortumik saqqummiussinissamik peqquneqarnissaannik Inatsisartut aalajangiiffigisassaattut siunnersuut. Politikkip Kalaallit/Inuit piginnaasaqartut amerlanerusut pisortani aamma suliffeqarfinni pisortanit tamakkiisumik ilaannakortumilluunniit pigineqartuni sulisorineqalernissaat, piginnaasaasa ineriartortinneqarnissaat sulisorineqartuarnissaallu anguniassavai. Pingaartumik aqutsisutut atorfiit aamma periusissiornermut tunngasut pineqarput.
Politikki Kalaallit/Inuit Kalaallit Nunaanni nunap inoqqaavisut inissisimanerat pisinnaatitaaffiilu aallaavigissavai. Anguniakkat kisitsisitigut uuttorneqarsinnaasut aalajangersarneqassapput. Ukiumoortumillu tamanut nalunaarusiortoqartassaaq. Atorfinitsitsinerit suliamut naleqquttunik piginnaasatigut piumasaqaatit tunngavigalugit ingerlanneqartuassapput.

Naalakkersuisut kingusinnerpaamik 1. oktober 2027-imi naalakkersuisoqarfiit kiisalu taakkununnga atasunut aqutsisoqarfiit, aalajangersimasumik allaffeqarfiit, atorfiit aamma oqartussaasutut suliassaqarfiit Danmarkimiittut atorunnaarsinneqarnissaat pillugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
Atorfiit suliassaqarfiillu pisariaqartut Kalaallit Nunaanni suliffissaqartillugit ingerlateqqinneqassapput, taamaalillutik piginnaasat suliffeqarfiullu iluani ilisimasat Kalaallit Nunaanni tunngavilerneqarlutillu ineriartortinneqassallutik. Kalaallit Nunaata Københavnimi Sinniisoqarfia pineqartunut ilaanngilaq, taamaattorli atorfiit imaluunniit suliassaqarfiit atorunnaarsinneqartut tigusinnaanngilai imaluunniit nutaamik pilersitseqqissinnaanagit. Taakku aamma Danmarkimi avataanit siunnersortinit, suliffeqarfinnit imaluunniit allanit ataavartumik imaluunniit aaqqissuussaasumik suliakkiissutigineqarnikkut taarserneqarsinnaanngillat, suliassat taakku naammaginartumik Kalaallit Nunaanni ingerlanneqarsinnaappata.