UKA06/115 Radio-kut tv-kulluunniit aallakaatitsissummik nalinginnaasumik aallakaatitsissutip saniatigut pilersitsisoqarnissaa sulissutigissallugu Naalakkersuisut qanoq isummerniarpat?
1. august 2006 UKA 2006/115
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara:
Radio-kut tv-kulluunniit aallakaatitsissummik nalinginnaasumik aallakaatitsissutip saniatigut pilersitsisoqarnissaa sulissutigissallugu Naalakkersuisut qanoq isummerniarpat?
(Inatsisartunut ilaasortaq Anthon Frederiksen, Kattusseqatigiit Partiiat)
Tunngavilersuut:
Ukiuni kingullerni malunnarsingaluttuinnarpoq
radio-kut tv-kullu aallakaatitsissutit nalinginnaasut innuttaasunit amingarineqaleraluttuinnartut. Pingaartumik innuttaasut sutigut tamatigut inuiaqatigiinni pingaaruteqartunik oqallinnernut akuutinneqarnerulernissaat anguniarlungu. Aamma aallakaatitsissut pilersinneqarpat qaammarsaanernut, paasisitsiniaanernut, oqallinnernut il.il. aammalu inatsisartut ataatsimiinneri tamakkerlugit aallakaatitsissutikkut tassuuna malinnaaffigineqarsinnaalissapput.
Tassami tamatta ilisimavarput; qinersisartorpassuit, inatsisartut ataatsimiinnitta nalaani malinnaangaluartut, ataatsimiinnerit radio-kut aallakaatinneqarnerisa ikerinnakkut unitsinneqartarnerat assut ajalusoorutigisaraat. Taamaattumik nalinginnaasumik aallakaatitsissutit immikkut allamik ilaneqarnissaat Naalakkersuisut qanoq isummerfiginiarneraat matumuuna apeqqutigaara.