UKA06/124 Ilulissat illoqarfianiit Ilulissat Kangerluata tungaanut, (Sermermiut tungaannut) pisuinnaat aqqussiornissaat anguniarlungu Naalakkersuisut suliniuteqalersaarpat?
1. august 2006 UKA 2006/124
Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara:
Ilulissat illoqarfianiit Ilulissat Kangerluata tungaanut, (Sermermiut tungaannut) pisuinnaat aqqussiornissaat anguniarlungu Naalakkersuisut suliniuteqalersaarpat?
(Inatsisartunut ilaasortaq Anthon Frederiksen, Kattusseqatigiit Partiiat)
Tunngavilersuut:
Naluneqanngitsutut Nunarsuarmi nunat eriagissassatut eqqissisimatinneqartut allattorsimaffiani allattukkanut Nunatsinni siullerpaatut Ilulissat Kangerluat 2004-imi upernaakkut ilanngunneqarpoq. Tamannalu Namminersornerullutik Oqartussat, Ilulissat kommuniata aammalu danskit avatangiisinut minister-eqarfiata suleqatigiilluarnerisigut tamanna piviusunngortinneqarluni.
Aamma ilisimaneqarpoq; Ilulissat kommuneqarfiat qangaaniilli takornariaqarnikkut Nunatsinni orningarneqarnerpaajusoq.
2004-imi upernaakkut Ilulissat kangerluat Nunarsuarmi allattaavissuit nunarsuarmioqatigiinnut pingaaruteqartut akornannut ilanngunneqarnerata kingunerisaanik; maannamut malunnarluinnalerpoq; Ilulissat siusinnerusumut naleqqiullungit; suli takornarissanik amerlanerusunik tikinneqartalersut, tamannalu tupinnanngitsumik takornariartitsinermik sulialinnut aamma malunniuteqarluarpoq, tassa Ilulissani takornarissanik sullissisut amerlanerpaartaat namminersortut ajunngilluinnartumik takornarissanik misilittangaqarluarlutik sullissimmata.
Soorlu naalakkersuinikkut aamma anguniarneqartoq; siunissami takornariartitsineq aamma Nunatsinni aningaasarsiornermi toqqammaviit ilagisariaqaraat.
Naluneqanngilarlumi maannamut Kalaallit Nunatsinnut takornarissat tikittartut affaasa missai Ilulissat kommunianut takornariartartut. Pingaartumik ukiuni kingulliunerusuni, takornariarpassuit Ilulissat illoqarfianiit Sermermiut tungaanut ingerlaartuarlerput, tupinnanngitsumillu aqqut taanna sukkasuumik nungullariartorpoq, naak kommune nammineerluni aamma ajornartorsiutaalersumik aaqqiiniarluni iliuuseqaraluartoq, taamaattoq pisut sukkasuumik ingerlanerat, aammalu takornarissat unitsitassaajunnaarlutik tikerarnerat ilutigalugu nuna sukkasuumik nungullariartorpoq.
Takornarissat kusanartumik tamatta takutikkusuppangut aamma kusanartumik kiffartuunneqarnissaat tamatta soqutingaarput, taamaattumik nunani allanisuulli aamma Nunarsuarmi nunat eqqissisimatitaasut eriagisassatullu allattorsimaffinni ilaasutut ¿ pinngortitarsuup kusanartup nungullarsannginnissaa anguniarlungu takornarissat allallu aqqusiuunneqarnissaat tamatta pisussaaffingaarput. Taamaammat tamatuminnga Naalakkersuisut suliniuteqalersaarnersut pillugu apeqquteqarpunga.