03EM/01.25.01-100 Meeqqat atuarfiat pillugu peqqussutip nutaap piviusunngortinneqarnissaa anguniarlugu meeqqat atuarfiannut... (Inatsisartuni ilaasortaq Marie Fleischer, Demokratit)
15. august 2003 UKA 2003/100
Inatsisartut Suleriaasianni § 32 naapertorlugu matumuuna aalajangiiffigisassatut siunnersuummik imaattumik saqqummiussivunga:
Meeqqat atuarfiat pillugu peqqussutip nutaap piviusunngortinneqarnissaa anguniarlugu meqqat atuarfiannut aningaasat atorneqartussatut akuerisat amerlineqarnissaannik Naalakkersuisut suliniuteqaqqullugit Inatsisartut aalajangiiffigisassaattut siunnersuut.
(Inatsisartuni ilaasortaq Marie Fleischer, Demokratit)
Tunngavilersuut:
Inatsiartut peqqussutaata nr. 8-p 21. maj 2002-meersup atortussanngortinneqarnerani tunngaviuvoq aningaasartuuteqarnikkut kalluunnaveersaartuussasoq. Inatsisartut peqqussutaata atortussanngortinneqarnerani meeqqat atuarfianni atuartitsinerup pitsaanerulersinneqarnissaa siunnerfiuvoq atuartoq qitiusunngorlugu. Peqqussutip atortussanngortinnerani ilinniartitsisut atuarfiullu pisortaasa suleriusissaat pingaaruteqartutigut allannguuteqarpoq. Aqqissuussinerup nutaap tunngavia tamakkiisumik tassaavoq atuartoq qitiutinneqassasoq ilinniartitsisut annertunerulersitaamik suleqatigiinnermikkut atuartumullu kiisalu atuaqatigiinnut, klassemut, atuarnerminnillu killiffianut naleqquttumik atuartitsissutiminnik ataqatigiissareqatigiittuarnermikkut. Atuartut ataasiakkaat, atuaqatigiit klasselu ilinniartitsisoqatit peqatigalugit ilisimaarinninnermik tunngaveqartumik atuartut annertunerujussuarmik nalilersorneqartassapput. Atuartut iliuusissamittut pilersaarusiaasa suliarineranni, atuartut ataasiakkat, atuaqatigiit, klasse sumullu killinneq najoqqutaralugit siunertalersorneranni atuartut annertunerujussuarmik siunnersuiffigineqartassapput. Taakkua saniatigut atuarfiit ataasiakkaat pisortaat perorsaanermut tunngasuni suliaqartuussapput immikkoortuni pisortat atulersinnerisigut, atuarfiup pisortaanik peqateqarlutik pisortatut suleqatigiissussanik. Tusarparput pissutsit taamaattut naalakkersuisut akuersaalersaanngikkaat, taamaalillunilu aningaasatigut nammagassat kommuninut tunniunneqassallutik. Isumaqarpunga nuna tamakkerlugu naalakkersuinermik suliaqartuusugut akisussaassuseqartut aalajangersakkavut pillugit akisussaaffimmik tigusisariaqartugut atuarfillu pillugu inatsisartut peqqussutaata nutaap malitsigititai tunngavigalugit aningaasatigut nammagassat nammallugit. Atuarfik pitsaasoq ilinniarsimasunik sulisoqalernermik imminut pilersornissatsinnut tunngaviussaaq.