03EM/01.25.01-101 Marlunnik-ilinniartitsisoqartarnermik aaqqissuussinerup atuutilerseqqinneqarnissaanik aamma nukarlerni akulliillu ilaani... (Inatsisartuni ilaasortaq Marie Fleischer, Demokratit)
15. august 2003 UKA 2003/101
Inatsisartut Suleriaasianni § 32 naapertorlugu matumuuna aalajangiiffigisassatut siunnersuummik imaattumik saqqummiussivunga:
Marlunnik-ilinniartitsisoqartarnermik aaqqissuussinerup atuutilerseqqinneqarnissaanik aamma nukarlerni akulliillu ilaani deletiimeqartarnerit atortuulersiineqarnissaannik Naalakkersuisut suliniuteqaqqullugit Inatsisartut aalajangiiffigisassaattut siunnersuut.
(Inatsisartuni ilaasortaq Marie Fleischer, Demokratit)
Tunngavilersuut:
Siusinnerusukkut atualeqqaani 1. klassetrinimi peqqussutaavoq marlunnik-ilinniartitsisoqartarnissaa klasseqatigiit 12-inik amerlanerusunilluunniit atuartoqaraangata. Klasseni ukiukkaartumik immikkoortitigaasuni 18-inik amerlanerusunilluunniit atuartoqartuni 2., 3., 4. aamma 7. klassemi marlunnik-ilinniartitsisoqartartussaavoq imaluunniit deletiimeqartarluni oqaatsinik ilinniakkani kiisalu kisitsinermi/matematikkimi. Atuarfimut peqqussummi nutaami 1. aggustimi 2003-mi atuutilersumi kommune nammineq aalajangiisassaaq klasse ikinnerpaanik tiimeqartoq ataatsimik marlunnilluunniit ilinniartitsisoqartassanersoq. Tassa imaappoq kommune allanik sallinngortitsisinnaajumalluni marlunnik-ilinniartitsisoqartarnermik deletiiminillu ikililerisinnaavoq, taamaalilluni atuartitsineq klassit ilaannut pitsaassutsimigut ajornerulersinneqassalluni. Taakkua saniatigut nalunngilarput atuartut inuttut ajornartorsiuteqartut amerlanerujartortut meeqqat atuarfiata massakkutut aaqqissuussaanermini meeqqat ataasiakkat ineriartortinneqarnissaanni naammattumik ikorfartuinissaminut ajornartorsiuteqarfigisassai. Isumaqarpunga massakkut atuarfik pillugu peqqussut akuerisaasoq inuit akunnerminni pissusiinut tunngasuni illuinnarsiortuusoq, meeqqat navianartorsiorneroreersut atuarfimmi iluatsikkuminaatsitsinerussasut. “Atuarfitsiala”mmi siunertaanngimmat atuarfimmi pitsassutsip milleriarnissaa, paarlattuanilli pitsaanerulersinniarneqarluni, pissusissamisuuginnarpoq marlunnik-ilinniartitsisoqartarnermik aaqqissuussinermik taane-qartartoq deletiimeqartarnerlu atuutilerseqqinneqarpata.