03EM/01.25.01-92 Isertitanik naligiissaarinissaq pillugu apeqquteqaat aallaavigalugu oqallinnissamik siunnersuut. (Inatsisartunut ilaasortaq Kuupik Kleist, Inuit Ataqatigiit)
15. august 2003 UKA 2003/92
Inatsisartut Suleriaasianni § 35 naapertorlugu apeqquteqaat allaavigalugu oqallinnissamik siunnersuut imaattoq matumuuna saqqummiuppara:
Isertitanik naligiissaarinissaq pillugu apeqquteqaat aallaavigalugu oqallinnissamik siunnersuut.
(Inatsisartunut ilaasortaq Kuupik Kleist, Inuit Ataqatigiit)
Akileraartussaatitaasut 40 procentii akissarsiaqarput SIK-ip isumaqatigiissutaani akissarsiat minnerpaaffissaannit minnerusunik. Namminersorneq pillugu Isumalioqatigiissitat isumaliutissiissutaanni tamanna atuarneqarsinnaavoq. Innuttaasut ilaasa taama amerlatigisut innuttaaqatiminnut naleqqiullutik akissarsiatigut taama inorsartiginerat Inuit Ataqatigiit isumaliortaasiat malillugu akuerineqarsinnaanngilluinnarpoq. Tamannalu arlalitsigut iliuuseqarnikkut iluarsisariaqarpoq.
Inuit Ataqatigiinni isumaqarpugut akissarsiakinnerpaat pitsanngorsaavigisariaqartut pingaartumik periarfissaasa pitsanngorsarnerisigut. Tassa imaappoq ilinniartitaanikkut, suliffissaqarnikkut inissaqarnikkullu pitsanngorsaavigisariaqarput timitalimmik ataqatigiissumillu iluarsaaqqinnikkut.
Periarfissatigut pitsanngorsaanissat taamaattut ukiuni kingullerpaani suliffissaqarnikkut ilinniartitaanikkullu iluarsaaqqinniarnerni, inuiaqatigiit aaqqissugaanerat pillugu iliuusissatut pilersaarummi aammalu Namminersorneq pillugu Isumalioqatigiissitat isumaliutissiissutaanni taakkartorneqarput.
Inuit Ataqatigiinnit Naalakkersuisut qinnuigerusuppagut suliffissaqarnikkut iluarsaaqqinnerup 1998-imi aallartinneqartup killiffianik nassuiaateqaqqullugit, kissaatigaluguttaaq Naalakkersuisut suliffissaaleqineq annikillisinniarlugu qanoq iliuuseqassamaarnerlutik nassuiaateqaqqullugit, minnerunngitsumik maanna paasinarsimmat suliffissaaleqineq alliartortoq.
Inuit Ataqatigiinni upperaarput piginnaanngorsaaqqinnissaq pillugu peqqussutip Inatsisartuni aalajangersarneqarneratigut inuit sulisinnaajunnaariartuinnarnissap killinganiittut ilarpassui sulif-fissaqartinneqalerumaartut. Naalakkersuisut qanoq iliuuseqarsimappat sulisinnaalersitseqqinniarneq siuarsarniarlugu.
Ilumut pingaaruteqarluinnarpoq inuit suliamik ilinniagaqarsimanngitsut sapinngisamik amerlanerpaat arlaatigut ilinniagalernissaat, taamaalillutik suliffissaqarnikkut periarfissaqartualerniassagamik imminnullu pilersorsinnaalerlutik. Inuit Ataqatigiit tungaannit kissaatigaarput inunnut suliffissaarunnissaminnut navianartorsiortunut neqeroorutissat aallartinneqassasut ataqatigiissaarneqarlutillu, aammalu tamatuma naammassineqarnissaanut aningaasanik immikkoortitsisoqassasoq. Ilinniartitseqqittarneq malunnaatilimmik siuarsartariaqarpoq. Tamatumani Naalakkersuisut sunik isumaliuteqarlutillu pilersaaruteqarpat.
Isertitatigut equngasumik agguataarinerup partiinit isummerfigineqarnissaa kissaatiginarpoq, taamatullu aamma isertitatigut naligiissaarinissaq pillugu tunngaviusutigut qanoq iliuuseqarsinnaaneq isummerfigillaqunarluni.
Kiisalu Inuit Ataqatigiinni isumaqarpugut inuiaqatigiinni isertitat qanoq agguataarsimanerannik misissuisoqartariaqartoq – partiit kissaatigisamut tamatumunnga qanoq isumaqarpat.