04EM/01.25.01-102 Soraarnerussutisiaqarnermi akileraartarnikkut maleruagassani maannakkut atuuttuni, akissarsiat... (Per Skaaning, Demokraatit)

12. august 2004       UKA 2004/102

Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:

Soraarnerussutisiaqarnermi akileraartarnikkut maleruagassani maannakkut atuuttuni, akissarsiat akileraaruserneqartarnerannut inatsisip § 17-anik, 1. januar 2005 aallarnerfigalugu nunatsinni soraarnerussutisiaqarfinni aningaaserivinnilu soraarnerussutisiassanik inuttut nammineerluni pilersitanik, taamatullu soraarnerussutisiatut pisassanik pilersitsisinnaaneq ajornarunnaarsillugu Naalakkersuisut allanngortitseqqullugit peqquneqarnissaannik Inatsisartut aalajangiiffisassaattut siunnersuut.

(Inatsisartunut ilaasortaq Per Skaaning, Demokraatit)

Tunngavilersuut:

Innuttaasut najukkaminnik allannguinerat nunatta aningaasaqarneranut ukiuni aggersuni annertuumik sunniisussaavoq. Utoqqaat soraarnerussutisiaqalersussat sulisinnaasunut naleqqiullutik malunnaatilimmik qaffariassapput. Tamanna suli annertusinerussaaq suliffinninngaanniit soraartartut ukioqqortussusaat agguaqatigiissillugu appariartormat.

Taamaalilluta ukiut ikittunnguit qaangiuppata utoqqaarnut inuiaqatigiinni innutaassunut pilersuisussaanerup nunatta karsianut annertuumik sunniuteqartussaasoq maannakkut ilisimalereerparput, siunissamilu soraarninngortartussat amerliartortut inooriaatsimi pisariaqartitat qanoq qulakkeerneqassanersut apeqqummik pingaartumik pilersitsivoq. Soraarnerussutisiaqartut akornanni kisitsisit pingaarutillit suliarineqarput ima oqaasertallit, maannakkut inooriaaseq allanngortikkusunngikkaanni 30-inik ukioqaliinnarluni soraarninngornissap tungaanut akileraarutit akilinnginnerini qaammammut isertitanit 15 %-i akilerneqartassasoq. Uani aamma eqqaamassallugu pingaaruteqarpoq, siunissami soraarninngortartussat inooriaatsimik pitsaasumik inuuneqarnermik sungiussereerimanerat, taamaattumillu ullumikkut soraarninngortartunit soraarninngornerminni annertunerusumik aningaasatigut piumasaqartussaassapput.

Taamaattumik maannangaaq immitsinnut aperisariaqalerpugut ullumikkutut nunatta karsiata soraarnerussutisiat akilertuaannassanerai, imaluunniit ullumikkumiit siunissaq eqqarsaatigalugu isumatusaartumik innuttaasut piviusorsiortumik qinigassillugit iliuuseqassanersugut, soraarninngornissamut sipaarnermik aningaasatigut pilerinartumik aaqqiinikkut.

Tamanna inatsisiliornermi tunngaviusunik nutarterinissamik annertuumik piumasaqarfiussaaq, aammalu nammineq utoqqalinissamut katersinissap inuiaqatigiinnit paasineqarnissaa pisariaqarpoq. Ukiut 20-it 25-it qaangiuppata innuttaasut utoqqalinersianik pisartagaqalernissaat nunatta maannakkutut aningaasatigut nukissaqarfigineraa naatsorsuutigineqarsinnaanngilaq, taamaattumillu siunnersuummi uani nammineq soraarningornissamut sipaakkat annertusineqarnissaat pilerinartumik aningaasatigut tunngavissineqarnissaat kajumissaatigineqassasoq kissaatigaara.

Taamaaliunnginnissatsinnut akissaqanngilagut¿¿¿¿¿..

Siunnersuut:

1.         Aningaasarsianit akileraarusiinermi inatsit § 17-ip iluarsiivigineqassasoq imatullu allanngortinneqassasoq siunnersuutigineqassaaq, soraarninngornerup aallartinnerani ataasiaannartumik tunniunneqartussat soraarnerussutisiat ataatsikkut pisassatut pilersinneqarsimasutut soraarnerussutisiaqalernissamut aaqqissuussinermut akilersukkat isertitat pinngitsoorani akileraarutaasussat ilanngaateqartinneqartalersillugit.

2.         Nunatsinni angerlarsimaffeqartumut soraarnerussutisiaqarfimmut imaluunniit aningaaserivimmut soraarnerussutisiaqarnermut aaqqissuussinermik pilersitsisoqarnissaa isertitat akileraarusigassat ilanngaateqartinneqarnissaat piumasaqaataasariaqarpoq.

3.         Sipaakkatigut ernianit isertitat ingerlaavartut imaluunniit nalitigut iluanaarutit isertitanut akileraarusigassanut ilanngunneqassanngillat.

4.         Soraarnerussutisiaqalernerup aallartinnerani soraarnerussutisiat tunniunneqarneranni soraarnerussutisialerivinnit imaluunniit aningaaserivinnit toqqaannartumik Akileraartarnermut Pisortaqarfimmut sipaakkanit 35 %-imik akileraaruserneqartassaaq. Taamaalilluni tunniussinermi 35 %-imik aaqqiinermik akileraarusiinissaq taamaallaat aningaasanik sipaarnissamut kajumissuseqalersitsisinnaavoq. Ingerlaavartumik naleqassutsip annertusiartornerata aningaasat sipaakkat annikinnerusumik akileraaruserneqartarneranni naliussoq oqimaaqatigiilersitsiffigissavaa, taamaalilluni nalinginnaasumik akissarsiat akileraaruserneqartarnerisa annertoqataanik akileraarutinut naatsorsueriaatsimi inerniliisoqartassalluni, taamatullu nunatta karsiata annaasassai piviusumik killilerneqarlutik. Taamaattumik kingusinnerusukkut akileraarutinik akiliinissap kinguartinneqarnera uani eqqartorneqarpoq.

5.         Piffissaanngitsukkut aaqqissuussineq atorunnaartinneqassappat nunatta karsianut 50 %-imik akitsuummik akiliisoqartassaaq.