04EM/01.25.01-104 Erninermi sulinngiffeqartarneq minnerpaamik qaammatinik arfinilinnik, angajoqqaallu sulinngiffeqartarnerat... (Palle Christiansen, Demokraatit)
10. august 2004 UKA 2004/104
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara.
Erninermi sulinngiffeqartarneq minnerpaamik qaammatinik arfinilinnik, angajoqqaallu sulinngiffeqartarnerat minnerpaamik qaammatinik pingasunik sivisussuseqalersillugit 1. januar 2006 atuutilersumik sivitsorlugit, erninermut atatillugu sulinngiffeqartarnerit angajoqqaallu sulinngiffeqartarnerat pillugu inatsimmik pitsanngorsaaqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Palle Christiansen, Demokraatit)
Tunngavilersuut:
Inatsisartut peqqussutaat nr. 6, 11. november 2000-imeersoq naapertorlugu Kalaallit Nunaani erninermi sulinngiffeqartarneq aammalu anaanaasup ataataasullu erninermut atatillugu sulinngiffeqartarneri sivikitsunnguupput. Anaanaasup erninermi sulinngiffeqarnissaa qitornartaminnillu najuinissaat eqqarsaatigalugu minnerpaamik qaammatini arfinilinni anaanaasup sulinngiffeqarnissaa WHO-p Danmarkimi Sundhedsstyrelsellu kaammattuutigigaluarpaat.
Inoorlaap anaanamini minnerpaamik qaammatini arfinilinni milutsinneqarnissani pisariaqartikkaa WHO-p Sundhedsstyrelsellu suliniuteqarnermini toqqammavigaat. Meeraq anaanaminit milutsilluni timikkut akiuussutissanik tigusisarpoq meeqqap timaani akiuussutissaqartitsilerluni. Kingusinnerusukkut meeqqap alliartornermini napparsimasarnissaraluinut annikillisaataasinnaalluni.
Meeqqap alliartornermini ukiuni siullerni toqqissisimalluni sapinngisamik angajoqqaani qanimut najorlugit alliartornissaata pingaaruteqassusia uani suusupagineqarsinnaanngilaq.
Malittarisassat massakkut atuuttut najoqqutaralugit erninermi sulinngiffeqarnerup sivikippallaarnera peqqutigalugu angajoqqaat meeqqaminnik mikisunik suli sinilluarnissaminnik pisariaqartitsisunik meeqqerivimmut tunniussisariaqartarput, angajoqqaat meeqqallu suli piareersimaffiginngisaanik. Pissutsit taamaakkaluartut angajoqqaat ilaat meeqqerivimmut tunniussiartorsinnaasut iluatsitilluarsimasutut taaneqarsinnaasarput, angajoqqaat allat ilaasa kommuunerisaminniit allaat ilaatigut kaammattorneqartarput meeqqerivinni inissaaleqisoqarnera pissutigalugu meeqqatik akuerisaanngitsunut ulluunerani paaqqinnittartunut isumalluuteqaqqullugit. Allatut oqaatigalugu angajoqqaat meeqqamik paarineqarnissaanik kissaateqartut sullinneqarnissaanik neqeroorutit naleqqutinngitsut oqaatigineqartariaqarpoq.
Meeqqat taama nukangatigitillugit taama siusitsigisukku paaqqinnittarfinnut tunniuttariaqalersarneri, annerusumik minnerusumilluunniit, angajoqqaanut amerlanermut uisakajaarutaasinnaasarpoq. Angajoqqaallu qasunerata aammalu meeqqap timaata illersuutaata sanngiilliornerata ataatsimut isigalugu kingunerisarpaa meeqqavut peroriartornerminni pitsaasumik atugassaqannginnerat. Meerartatta pitsaasumik peroriartornissaat inooqataanissaminnullu ilikkagaqarsinnaasaallu pitsaasunik siunnerfeqarnissaat imminnut atassuteqarnerata pingaasuteqassusaa tamanit nassuerutigineqartarpoq, pitsaassagaluarporlu angajoqqaat nukangasunik meerartallit sulinngiffeqarnissamik periarfissaat pitsanngorsaavigineqartuuppata.
Taamaammat meeqqanik mikisunik meerartallit atugarisaasa pitsanngorsaavigineqarnissaat anguniarlugu erninermi sulinngiffeqartarnerup pitsanngorsaavigineqarnissaa isumassarsiatsialaavoq.
Taamaammat Demokraatit siunnersuutigivaat erninermi sulinngiffeqartarneq aammalu anaanaasup ataataasullu erninermut atatillugu sulinngiffeqartarneri malunnaatilimmik sivitsorneqassasut ¿ ajornanngippat allaat qaammatit qulingiluat tikillugu sivitsorneqarluni. Erninermut atatillugu sulinngiffeqartarnerup sivitsorneqarnissaata saniatigut anaanaasup ataataasullu erninermut atatillugu sulinngiffeqartarnerisa sivitsorneqarnissaat aammattaaq pissusissamisuussaaq. Taama suliniuteqarneq sunniuteqarluassaaq aaqqissuussinerillu taama ittut marloqiusamik ilusilerlugit inissinnerisigut angajoqqaanut mikisunik meerartalinnut ulluinnarni inuuniarnermut pitsanngorsaataassaaq, taamaalilluni angajoqqaat piffissami sivisunerusumi inoorlaajutitik najorsinnaalissavaat kommunit meeqqerivissaqartitsiniarnissamut neqereroorutissaat ilaatigut ullumikkorniit pitsaanerusumik sukkanerusumillu periarfissaqarnerulissagaluarput.
Siunnersuutip uuma inuiaqatigiinnut aningaasaqarniarnerannut kinguneqaatissai pillugit ilisimatitseqqullugit siunnersuutip tunniutinnginnerani Naalakkersuisunut apeqquteqaatinik arlalinnik nassiussivunga. Inuiaqatigiinni aningaasaqarniarnikkut siunnersuutip kingunissai pillugu naatsorsorneqarnissaat Naalakkersuisut ajoraluartumik sakkussaqarfigisimanngilaat, takukkit Naalakkersuisunut apeqquteqaatit Naalakkersuisullu akissuteqaataat uani ilanngunneqartut. Taamaammattumik siunnersuutip aningaasaqarnikkut kingunissaasa naatsorsorneqarnissaat sulissutigeqqullugu Naalakkersuisunut inassutigissavara. Tassunga ilanngullugu maluginiarneqassaaq erninermi sulinngiffeqarnerup sivitsorneqarnerani aningaasartuutit annertusineqarnerinnaanik kinguneqartussaanngimmat, aammali sipaarutissaasinnaasunik siunnersuut imaqarmat: ulluunerani paaqqinnittarfinni utaqqisut allattorsimaffiisa annikillisinneqarnissaat, ernereernerup kingorna sapaatit akunneri missiliorlugit 17-it aammalu 21-it qaangiunnerata nalaani meeqqat meeqqerivimmiittariaqassanngimmata, tassa imaappoq maannamut naleqqiullugu meeqqat piffissami sivikinnerusumi meeqqerivinniittassapput, siunnersuutillu aamma kingunerissavaa angajoqqaat meeqqanik napparsimasoornermi sulinngitsoortariaqartarnerisa ikilisinneqarneri, uani meeqqat peqqissut toqqissisimasullu napparsimannginnerusarnissaat pineqarluni.
Naggataatigut Naalakkersuisunut inassutigiumavara suliffeqarfinnik isumaqatiginninniarnermut siunnersuut ilaatissagaat tassa isumatigiissutinut sunniuteqartussaammat. Tassunga atatillugu Demokraatit pineqartumut kaammattuutigiumavaat erninermi sulinngiffeqarnermut atatillugu aningaasateqarfimmik pilersitsisoqassasoq taamaalilluni suliffeqarfiit minnerusut arnanillu sulisoqarnerusartut - arnat sulisorisatik tatigisatillu erninermi sulinngiffeqarnissaannut aamma akissaqarsinnaalersillugit.
Siunnersuutip Inatsisartunit ilassilluarneqarluni suliarineqarnissaa qilanaarivara.