04EM/01.25.01-111 Erninermi sulinngiffeqartarneq pillugu Inatsisartut peqqussutaata nr. 6, 11. november 2000-imeersup... (Ruth Heilmann, Siumut)

12. august 2004       UKA 2004/111

Inatsisartut Suleriaasianni § 32 naapertorlugu aalajangiiffigisassatut siunnersuut imaattoq Siu-mut sinnerlugu matumuuna saqqummiuppara.

Erninermi sulinngiffeqartarneq pillugu Inatsisartut peqqussutaata nr. 6, 11. november 2000-imeersup, sulinngiffeqartarnerup sapaatit akunnerinik arlalinnik sivitsuiffigineqarnissaa, tassungalu ilanngullugu arnat marlulisut sivitsuiffigineqarnissaat anguniarlugu allanngortinneqarnissaanik Naalakkersuisut peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Ruth Heilmann, Siumut)

Tunngavilersuut:

Meeqqap nunarsuarmut tikilluaqqusaasutut misigisimanissaa,tamannalumi perorsarneqarneranut pingaaruteqarnera tamatta ilisimasaqarfigileraluttuinnarparput, ullutsinnilu tamanna minnerulinngeqaaq pisariaqartinneqarnera tamassumallu timitalerneqarnissaa pingaarluinnarpoq.Qangaanerusoq meeqqat ilaqutariinni piffissaqarfigineqarnerusarnerat meeqqat toqqissisimanerannik ersersitsisarnera eqqartorneqartaqaaq,ullumikkullu ulapaarnerujussuup qeqqani tamanna amigaataasoq ersarilluinnarpoq.

Meeqqap toqqissisimasumik avatangiiseqarluni qanilaartumik angajoqqaaminik piffissaqarfigineqarluarlunilu misiginissani annertuumik pisariaqartittarpaa.

Taamaattumik erninermi sulinngiffeqartarnerup sivitsuiffigineqarnissaa pisariaqarpoq. Tamanna angajoqqaat ilaannik siunnersuutigeqquneqarsimanera piinnanngikkaluarlugu aammali Isumaginninnikkut iluarsaaqqinnermi Ataatsimiititaliarsuup kaammattuuteqarneranik tunngaveqarpoq. Taanna isumaqarmat ukiut ingerlaneranni sivitsuiffigiartuaarnissaa pilersaarusiorneqartariaqartoq. Januarip aallaqqaataanit 2001-imit atuutilersumik erninermi sulinngiffeqartarneq sivikitsumik sivitsuiffigineqarpoq, maannalu piffissanngorpoq sivitsuiffigineqaqqinnissaa. Ilami aamma meeqqerivissaaleqineq meeqqerivinnilu utaqqisoqarluartarnera eqqaaginnaraanniluunniit, iluaqutaassaqaaq toqqissisimanermillu anginermik meerartaartunut sunniuteqarnissaa kialluunniit takusinnaavaa.

Neriuutigaara siunnersuut matumuuna suliniutigalugulu tigulluarneqarumaarto