04EM/01.25.01-112 Nuummi aammalu Ilulissani mittarfiit tallineqarnissaasa 2005-imut Aningaasanut Inatsimmut... (Ole Dorph, Siumut)

12. august 2004       UKA 2004/112

Inasisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:

Nuummi aammalu Ilulissani mittarfiit tallineqarnissaasa 2005-imut Aningaasanut Inatsimmut ilanngunneqarnissaat pillugu Nalakkersuisut peqquneqarnissaannik Inatsisartut aalajangiiffigisassaattut siunnersuut.

(Inatsisartunut ilaasortaq Ole Dorph, Siumut)

Tunngavilersuut:

Ukiuni kingullerni arlaqalersuni Ilulissat Nuuk-llu mittarfiisa tallineqarnissaat pillugit oqallinnerit suliniuteqarnerit misissuinerillu naammassorinartut ingerlanneqarnikuupput, maannakkut ilaatigut piareeqqasutut ilaatigut oqaatigineqarsinnaallutik, aallartinneqarnissaasalu aningaasaliiffigineqarnissaat imaluunniit pilersaarutit pisortatigoortumik akuerineqarnissaat kisimik utaqqineqarlutik.

Ukioq manna pilersaarutit ima siuarsimatigilersimapput allaat aningaasanut Inatsit aqqutigalugu Naalakkersuisut Inatsisartunit piginnaatitsissummik tunineqarsimagaluartut pilersaarutit aningaasalersorneqarnissaat suliareriarlugu suliat aallartinneqarnissaat periarfissaqartoq.

Qanorli pisoqarpa? Suli misissuinerit amerlerusut.

Kalaallit Nunaanni inuussutissarsiornerup siuarsarneqarnissaa, tassunga ilanngullu avammut niuernerup pitsanngorsarnissaa anguniarlugu siuliani taaneqartut pilersaarutit aallartinneqarnissaat naammassineqarnissaallu pisariaqarluinnartutut isigaara. Kommunimmi pineqartut mittarfii tallineqarnissaat pilersaarusiorfigereerpaat Inatsisartullu akuersissuteqarnissaat kisimi utaqqisaavoq. Tamammat neriuutigaara una siunnersuut ilassilluarneqarumaartoq, neriuutigaaralu Inatsisartuni ilaasortat ataqqinartut Kalaallit Nunaanni siuarsaarusuttut siumullu isigisut siunnersuut tapersissagaat.