04EM/01.25.01-116 Illoqarfinni isorliunerusuni aqqusernit iluarsaanneqarnissaasa isumagineqarnissaat anguniarlugu... (Ole Thorleifsen, Siumut)
11. august 2004 UKA 2004/116
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:
Illoqarfinni isorliunerusuni aqqusernit iluarsaanneqarnissaasa isumagineqarnissaat anguniarlugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Ole Thorleifsen, Siumut)
Tunngavilersuut:
1960-ikkunni 70-ikkunilu naalagaaffiup nunatsinni inerisaanerata nalaani kujaataani qeqqanilu illoqarfinni annerni aqqusernit pitsaalluinnartumik suliarineqarput, kuuffilersorlugit qallersorlugillu, aningaasarpassuit atunngikkarluarlugit siunissamut aserfallatsaaliorneqarnissaat isumannaarlugit.
Akerlianilli illoqarfinni isorliunerusuni aqqusernit macadamisering atorlugu aqqusernit suliaallutik. Sinaasa kuuffilersorneqannginnerisa ajoqutigaat upernaat tamaasa aput aakkaangat aqqusernit sananeqaataasa imermik aserorterneqartarneri. Tamannalu illoqarfinni minnerusuni ukiumiit ukiumut annertuumik kommunenut aningaasartuutaasarpoq.
Namminersornerullutik Oqartussat aqqusernit aserfallatsaaliorneqarnerannut tapiisarnerat ilisimavara, kisiannili kommunet oqaloqatigisarnerini paasisimallugu tapiissutit aningaasartuutinut matussusiinissamut naammattanngitsut. Taamaattumillu aqqusernit isumannaatsumik aaqqissuunnissaannut periarfissaqartaratik.
Tamanna tunngavigalugu inatsisartut naalakkersuisullu qinnuiginiarpakka aaqqiissutissatut siunnersuutikka nalilersorluaqqullugit, pissutsit taamaatsillugit aningaasaliissutaasartut pitsanngorsaataanatik aaqqiissutissaagallaannartutut atorneqartassammata.
Uani ajornartorsiummi saneqqunneqarsinnaanngilaq kommunet kattuffiata qanimut suleqatiginissaa, tassami Namminersornerullutik Oqartussat ataatsimoortumik kommunenut tapiissutaasa isumaqatigiinniissutaanerini pingaarnerpaatut inissisimasarmat.
Isumaqarpunga tapiissutit illoqarfinnut ataasiakkaanut nalilersoqqissaartariaqartut, qanorlu aningaasartuutit tapiissutaasartut pitsaanerusumik aaqqissuunneqarnissaat anguniartariaqartoq.
Tamatta ilisimavarput sullissisussanik atortunillu illoqarfinni isorliunerusuni pissarsiniaraanni aningaasartuutit qanoq annertutigisartut, taamaattumillu siunnersuutiginiarpara illoqarfinni minnerusuni ukiuni aggersuni aqqusinerni aaqqissuussussanik pilersitsisoqassasoq atortut ataatsimoortut illoqarfimmiit illoqarfimmut aasaanerani nuuttarlugit aqqusernit isumannaatsumik suliarilluarneqarnissaat anguniarlugu.
Tamatuma pilersaarusiorneqarneqarnera Namminersornerullutik Oqartussat KANUKOKA peqatigalugu isumagissavaat, aningaasalersorneqarneralu Namminersornerullutik Oqartussat kommunenut ataasiakkaanut aqqusinernut tapiissutaanit akileeqataaffigineqarsinnaavoq.
Takornarissat suli kalaallit nunatsinnut neqeroorfigitillugit nunnatta illoqarfiisa takujuminartuunissaat pingaartippara taamaatumillu aaqqiissutissanik tikkuaanera inatsisartunit tapersersoqqunaqaaq.