04EM/01.25.01-135 Utoqqaat utoqqaat illuini najugaqarnerminnut akiliutigisartagaannik... (Atassutip Inatsisartunut ilaasortaatitai:AS, EC, JB, FK og JS)
13. august 2004 UKA 2004/135
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Utoqqaat utoqqaat illuini najugaqarnerminnut akiliutigisartagaannik oqilisaavigineqarnissaat sulissutigeqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Atassutip Inatsisartunut ilaasortaatitai: Augusta Salling, Ellen Christoffersen, Jensine Berthelsen, Finn Karlsen aamma Jakob Sivertsen)
Tunngavilersuut:
Utoqqarnik paaqqinniffiit il.il. Inatsisartut peqqussutaat nr. 11, 30. oktober 1998-meersoq naapertorlugu utoqqaat namminneq angerlarsimaffigisaminni imminnut isumagisinnaajunnaartut utoqqaat illuinut nuunnissaminnut qinnuteqarsinnaapput. Aaqqissuussineq tamanna ajunngitsuullunilu toqqissisimanartuuvoq, utoqqaammi utoqqaat illuiniittut ajunnginnerpaamik atugassaqartitaallutik paaqqutarineqarnissaat kommunillumi isumannaarniartuarpaat.
Taamaattorli ATASSUT-mit ilisimavarput nunatsinni utoqqaat arlalissuusut nammineerlutik angerlarsimaffigisaminniiginnarnissaminnut nukissaarukkaluarlutik sapinngisamik sivisunerpaamik angerlarsimaniaannartartut, nalunnginnamikku utoqqaat illuinut nuukkunik qaammammut isertitamik amerlanerpaartaat akiliutitut peerneqartartussanngussasut. Matumani pisortanit pensionisiallit kisiisa pinngilagut, aammali tjenestemandit soraarnerit allatullu atorfeqarsimallutik soraarnerit pivagut.
ATASSUT-mit isumaqarpugut illersorneqarsinnaanngitsoq utoqqaat ikiorserneqarnissaminnut annertuumik pisariaqartitsigaluartut, utoqqaallu illuannut nuunnissaminnut pisariaqartitsigaluartut periarfissamik atuinaveersaarisarnerannut pissutaasoq naapertuilluarnerunngitsoq. Taamaammat siunnersuutigaarput utoqqaat utoqqaat illuini najugaqarnerminni akiliutigisartagaasigut oqilisaaffigineqarnissaat pillugu Naalakkersuisut peqquneqassasut, taamaaliornikkut utoqqaat akileereeraangamik pensionisiaminnik amerlanerusunik isumalluuteqarsinnaalerniassammata.
Ullormut oqaluuserisassat kiisalu ullut suliarineqarfissaat