04EM/01.25.01-137 Angajoqqaat qitornaminnik atualersoortussat piareersarneqartarnissaannik... (Atassutip Inatsisartunut ilaasortaatitai: AS, EC, JB, FK og JS)
13. august 2004 UKA 2004/137
Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiupparput:
Angajoqqaat qitornaminnik atualersoortussat piareersarneqartarnissaannik aalajangersagaqalersinnaaqqullugu meeqqat atuarfiat pillugu Inatsisartut peqqussutaata nr. 8, 21. maj 2002-meersup allanngortinneqarnissaa sulissutigeqqullugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Atassutip Inatsisartunut ilaasortaatitai: Augusta Salling, Ellen Christoffersen, Jensine Berthelsen, Finn Karlsen aamma Jakob Sivertsen)
Tunngavilersuut:
¿Atuarfitsialaap¿ atulersinneqarneratigut inuiaqatigiit kalaallit meerartatta ajunngitsumik angusaqarfiulluartumillu atuarnertik pissarsiffigalugu ingerlasinnaanissaannut tunngavisseereerpugut. Taamaattorli meeqqat sutigut tamatigut atuarnerminni ajunnginnerpaamik angusaqarlutik atuarnertik ingerlassappassuk tunngaviulluinnarpoq angajoqqaat meeqqat atuarneranni aallaqqaataaniit naggatissaa tikillugu peqataaffissaminni peqataallutillu akisussaaqataassutsiminnik timitaliisarnissaat, taamaammat pisariaqarpoq meeqqap imaluunniit meeqqat atualinnginnerannili angajoqqaat atuarfimmit peqataatillugit aallartinneqareertarnissaat.
Inatsisit naapertorlugit kommunalbestyrelsep atuarfiit ingerlanneqarnissaanni anguniakkanik aalajangersaallutillu sinaakkusersuisussaapput, aammalu anguniagassat sinaakkusiussallu tunngavigalugit sulisussanik atuarfiit ataasiakkaat tamarmik siulersuisunik pilersitsiffiusarput, taamaakkaluartoq ATASSUT-mit isumaqarpugut angajoqqaat qitornaminnik atualersoortussat piareersarneqartarnerat pillugu nunarput tamakkerlugu aalajangersimasumik assigiissaartumillu periuseqartoqarpat pissusissamisoornerpaajussasoq naleqqunnerpaajussasorlu.
Taamaammat siunnersuutigaarput Inatsisartut Naalakkersuisunut peqqusissasut meeqqat atualinnginneranni angajoqqaat piareersarneqartarnissaat pillugu inatsisitigut toqqammavissiuussissasut, taamaalilluni nunatsinni sumiluunniit najugaqaraluaraanni meeqqat atualinnginneranni piareersartarneq aalajangersimasunngortinneqarsinnaaqqullugu. Tamanna pissaaq Inatsisartut peqqussutaat nr. 8, 21. maj 2002-meersup allanngortinneqarneratigut, taamaaliornikkut angajoqqaat qitornaminnik atualersoortussat piareersarneqartarnissaannik nutaamik aalajangersagaqalersinnaaqqullugu.
Angajoqqaat piareersarneqartarnerat aalajangersimasuusoq imaqartinneqassaaq paasissutissanik assigiinngitsunik atuarfiup angajoqqaanit naatsorsuutigisaanik (atuagaasiviup imarisai, atuarfimmiit angajoqqaanut imaluunniit angajoqqaaniit atuarfimmut nalunaarutit ingerlanneqartarneri, taquartarnissamik aaqqissuussineq, angajoqqaat ataatsimiitinneqartarneri paasissutissallu allat angajoqqaat pisariaqartitaat.) Paasissutissat nalinginnaasut tamakku saniatigut piareersarneq taama ittoq angajoqqaanut meeqqaminnik atualersoortussanut meeqqamik atuarneranni malinnaalluarnissaannut peqataalluarnissaannullu aallarniutaalluassasoq qularutissaanngilaq.