04EM/01.25.01-148 Narsami qarmaasunut ilinniarnermik pilersitsiniaqqullugit Naalakkersuisut peqquneqarnissaanik Inatsisartut... (Per Rosing-Petersen, Siumut)
13. august 2004 UKA 2004/148
Inatsisartut suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:
Narsami qarmaasunut ilinniarnermik pilersitsiniaqqullugit Naalakkersuisut peqquneqarnissaanik Inatsisartut aalajangiiffigisassaattut siunnersuut.
(Inatsisartunut ilaasortaq Per Rosing-Petersen, Siumut)
Siku Block-imut tunngasunik siunnersuutinik ataasiaannarata maani inimi ukiorpanngulersuni sammisaqartarpugut ajoraluartumik angusaqarfiuallaarneq ajortunik. Oqaaserpassuit aninneqarnikuupput qujanartumillu aamma siunnersuutit ilaat, assersuutigalugu siorna Siku Block-i pillugu siunnersuutit, ilalerneqarlutik aalajagiiffigineqarnikuupput. Tamassumap saniatigut qujanartumik aamma ukioq manna Ilisimatooq Gorm Winther siuttoralugu Siku Block-ip nunatta aningaasaqarneranut qanoq siunissaq ungasinnerusoq isigalugu iluaqutaalluartigisinnaanera saqqummiuppaa uppernarsaatitalerlugu, arlalinnillu isorineqartarnerigalua taamaasillugu unitsillugu. Tamanna pisariaqarsimavoq atorneqarnerulerneratalu timitalerneqarnissaa amigaataaginnalerpoq
Aporfiit qaagigassat ilagisaat tassaavoq nunatsinni qammasissiornermik ilinniarfeqannginnatta. Taamaasilluta aammaarlutaasiit qammasissiortunik tikisitsisariaqartarpugut. Tamanna qaangerniarlugu siunnersuutigaara Narsami ilinniarfimmik taamaattumik pilersitsisoqarnissaa.
Narsamiinnissaanut tunngavigaara Siku Block-iliorfiup Narsami inissisimanera aammalu Narsap Kommuuniata qammasissiaq taanna sungiusimalluarmagu soorluttaaq aamma Inuilimut atatillugu ilinniartunut ineqareerluni atorluarneqarsinnaasunik.
Qammasissiornermik ilinniarfimmik pilersitsinikkut aamma igaffiliornermi uffarfiliornermilu massakkut naliginnaaleriartuinnartoq natissianik saattunik (danskisut ¿fliser¿) atuisarneq pisariartinneqariartortorlu nunaqavissunik qammasissiortunik peqalernitsigut aamma ikorferneqassaaq.
Taamatut oqaasertalerlugu Gorm Winther-illu rapport-iliaa innersuutigalugu una aalajagiiffigisassatut siunnersuut oqaluuserisassanngortippara, neriuutigalugu inatsisartunit ilalernartinneqarumaartoq, qujanaq.