04EM/01.25.01-74 Inuit tamarmik ornittagaanni atoqatigiinnermik imalinnik atuagassiat meeqqat takusinnaasaannit ingalatsillugit... (Doris Jakobsen, Siumut)
27. juli 2004 UKA 2004/74
Inatsisartut suleriaasianni § 32 naapertorlugu matumuuna imaattumik aalajangiiffigisassatut siunnersuuteqarpunga:
Inuit tamarmik ornittagaanni atoqatigiinnermik imalinnik atuagassiat meeqqat takusinnaasaannit ingalatsillugit inissiisarnissamik Naalakkersuisut inatsisinik naleqqussaaqqullugit peqquneqarnissaannik Inatsisartut aalajangiiffigisassaattut siunnersuut.
(Inatsisartunut ilaasortaq Doris Jakobsen, Siumut)
Tunngavilersuut:
Ungasittorsuunngitsukkut Nunani Avannarlerni aammalu Nunat Avannarliit Suliniaqatigiiffianni inuit tamat ornissinnaasaanni soorlu niuertarfinni naqitanik atoqatigiinnermik imalinnik ersariinnartumi inissisimasarnerat pillugu inuiqatigiit politikerillu akornanni oqallittoqarpoq.
Ukioq manna 13. juli 2004 Atuagalliutini nr. 52-imi saqqummersumi tamannarpiaq allaaserineqarpoq. Inuit tamarmik ornissinnaasaanni atoqatigiinnermik imalinnik naqitanut tunngatillugu aqqusinermi inuit isumaat AG-p paasiniarsimavaa.
Paasiniaanermi apersorneqartuni malunnarpoq, inuit tamarmik ornissinnaasaanni soorlu niuertarfinni atoqatigiinnermik imallit takussaasarnerat iluarineqanngitsoq, ingammik meeqqat eqqarsaatigalugit.
Isumaqarpunga meerartagut eqqarsaatigalugit, inuit tamat ornissinnaasaanni soorlu niuertarfinni atoqatigiinnermik imalinnik atuagassiat Danmarkimisuulli, arnat atisaqanngitsut timaat assiaqutalerneqartariaqartut, imaaliallaannaq meeqqanut takuneqarsinnaajunnaarsillugit. Tassami arnap timaanik isiginneriaaseq meeqqat eqqarsartariaasianni innarlerneqarsinnaavoq, isumaqartoqalersinnaammat arnap timaa piviusoq taamatut isikkoqartussaasoq. Isumaqarpunga meeqqat mikisut eqqarsaatigalugit atoqatigiinnermik imallit qanoq qutsitsigisumut inissinneqarsinnaanerat aamma nalilersorneqarsinnaasoq tigusinnaasaat isigisinnaasaallu eqqarsaatigalugit.
Taamatut saqqummiussaqarlunga inuit tamarmik ornissinnaasaanni atoqatigiinnermik imalinnik naqitat meeqqat takusinnaasaannut inissinneqartannginnissaannut naapertuuttumik inatsisit naleqqussarneqarnissaannik Naalakkersuisut peqquneqarnissaannik Inatsisartut aalajangiiffigisassaattut siunnersuut matumuuna saqqummiuppara.
&nbs