04EM/01.25.01-94 Inunnut 18-inik ukioqalersimanngitsunut ikittaatit gassiinik nioqquteqarnerup inerteqqutaalersinneqarnissaanik... (Astrid Fleischer Rex, Demokraatit)

4. august 2004                                                                                                   UKA 2004/94

Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:

Inunnut 18-inik ukioqalersimanngitsunut ikittaatit gassiinik nioqquteqarnerup inerteqqutaalersinneqarnissaanik Naalakkersuisut suliniuteqaqquneqarnissaat pillugu Inatsisartut aalajangiiffigisassaattut siunnersuut.

(Inatsisartunut ilaasortaq Astrid Fleischer Rex, Demokraatit)

Tunngavilersuut:

Pisiniarfinni imigassanik aalakaarnartulinnik tupanillu pisiniaraanni 18-inik ukioqalereersimasariaqarpoq. Illuatungaagulli meeqqanut inuusuttunullu ikittaatit gassitassaannik piserusuttunut ukiut killeqanngilat, naak tamanit ilisimaneqaraluartoq inuusuttu amerlasuut peqqinnisamut ulorianartoq taanna naamaanermut atortaraluaraat.

Immikkut ilisimasallit naamaartarneq annertuumik ajoqusiisinnaasoq qularutiginngilaat. Saqqummersitaq ¿Nunatsinni inuusuttut akornanni ikiaroornartumik atuineq¿ (ESPAD 2003) naapertorlugu qupperneq 31-imi ajoqutit imatut nassuiarneqarput:

Piffissaq sivitsunngitsoq naamaarnerup kingunipilugisarpai ilikkagaqarsinnaanermut ajornartorsiorneq aamma aallussiniarsinnaannginneq, tamanna atuartumut ajoqutaasorujussuusinnaavoq, kisanni piffissami sivisunerusumi akuutissalinnik tamakkuninnga atuinerup kingunerisarpai qaratsakkut ajoquteqalerneq katsorsarneqarsinnaanngitsumik ¿ tamannalu ¿malersyndrom¿-itut aamma ilisimaneqarpoq. Naamaarluni aamma allanik tassanngaannaq ajoqusertoqarsinnaavoq, soorlu ingasaassinermik, uutiternernik imaluunniit anersaartorsinnaajunnaarnermik.

Inuusuttut ikittaatit gassitassaanik pisisinnaanermik killiliisinnaasuugutta, imigassanik aalakoornartulinnik tupanillu pisisinnaanertulli 18-inik ukioqalersimanissamik aalajangiilluta, taava inuuttunut taakkununnga pisisinnaaneq ajornarnerulissagaluarpoq.

Inuusuttut ikittaatit gassitassaannik pissarsisinnaanerat annikillisinneqarnissaa siunnersuummi tassani Demokraatit qulakkeerusuppaat, ilanngullugulu ikittaatit gassitassaannik atornerluinerup naamaartarnerullu ataatsimut sigalugu Namminersornerullutik Oqartussanit pisortatigoortumik  iliuuseqarnissap qulakkeerusuppaat.

Inuusuttunut angajoqqaanullu sammititamik naamaartarnerup pinaveersaartitsinermillu paasisitsiniaanissamik annertunerusumik Naalakkersuisut kaammattorneqarput, taamaalilluni naamaartarnerup annertuumik peqqinnissamut ajoqutaanera ersarissarneqaqqullugu. Paarisamit misissuinerit (nunatsinni inuusuttut 1983-imi 1984-imilu inunngorsimasut akornnanni ikiaroornartumik atuinerup misissuivigineqarnera, nunatsinnilu inuusuttut akornanni ikiaroornartunik atuinerit (ESPAD 2003)) ajoraluartumik takutippaat ikittaatit gassitassaasa atornerlunneqarnermikkut ulorianaateqarnerat pillugu paasisitsiniaanissaq pisariaqartoq. Naamaartarnerup ulorianaatai pillugit inuusuttut akornanni ilisimasaqannginneq annertoorujussuuvoq. Tamannalu allanngortinneqartariaqarpoq.

Taama oqaaseqarlutik Demokraatit neriuutigaat siunnersuut Inatsisartunit ilassilluarneqarumaarto