6. august 2004                                                  UKA 2004 / 59               

Aningaasaliisut aningaasalersuisullu qularnaveerusiiffiginissaannut Aningaasaateqarfik pillugu inatsisip Kalaallit Nunaannut atortuulersinneqarnissaanik peqqussut

 

Uagut MARGRETHE AAPPAAT, Guutip Saammaanneragut Danmarkip Dronningia nalunaarpugut:

 

Inatsimmi nr. 415, 26. juni 1998-imeersumi § 26, inatsimmi nr. 347, 17. maj 2000-imeersumi § 3 aamma inatsimmi nr. 428, 6. juni 2002-meersumi, tak. inatsimmik nalunaarut nr. 656, 7. august 2002-meersoq, inatsimmi nr. 453, 10. juni 2003-meersumi § 422-kkut allannguuteqartitami, § 21 naapertorlugit aalajangersarneqartoq, aningaasaliisut aningaasalersuisullu qularnaveerusiiffiginissaannut aningaasaateqarfik pillugu inatsit Kalaallit Nunaanni atuutissasoq imaattunik oqaasertaqarluni:

 

Kapitali 1

 

Qularnaveerusiinissamut aningaasaateqarfiup qanoq-ittuussusaa

suliassaqarfiilu

 

      § 1. Aningaasaliisut aningaasalersuisullu qularnaveerusiiffiginissaannut aningaasaateqarfik (Aningaasaateqarfik) inuinnarnit ingerlassatut imminut ingerlattutut suliffeqarfiuvoq.

      Imm. 2. Aningaasaliisut aningaasalersuisullu aningaaserivinni § 3, imm. 1-imi aamma § 4-mi taaneqartuni akiliisarnermik unitsitsisoqartillugu imaluunniit akiliisinnaajunnaarnermi annaasaat §§ 9-11 naapertorlugit Aningaasaateqarfiup matusivigisassavai.

      Imm. 3. Aningaasaateqarfik tamatuma saniatigut iliuutsini § 2-mi taaneqartutut ittuni peqataasinnaavoq.

      Imm. 4 Aningaasaliisut aningaasalersuisullu imm. 2 malillugu matusiviginissaasa aamma § 2-mi taaneqartutut iliuutsini peqataanissap arlaasa toqqarniarneranni Aningaasaateqarfiup imminut aningaasartuutikinnerpaaffissaq aaqqiissutissatut toqqartassavaa.

 

       § 2. Aningaaseriviup ingerlatsinissamut patsisissaatitat naammassisinnaajunnaarpagit Aningaasaateqarfik tigusinissamut neqeroorummik piniarnerminut, tak. imm. 4, atatillugu aningaaseriviup atorunnaarsinneqarnissaanut suleqataasinnaavoq aningaasaliinermigut imaluunniit aningaaseriviup akiligassaqarfiinut akiliiffigisinnaanngisaanut matusissutissanik qularnaveerusiisinnaalluni. Aningaasaateqarfilli aningaaserivimmik tigusisinnaassanngilaq.

 

--------------------               

UKA 2004 / 59

INSP 60.09.01

Imm. 2. Aningaasaateqarfiup imm. 1 malillugu iliuusai allat peqatigalugit pisinnaapput.

       Imm.3. Aningaasaateqarfik aningaasaliisinnaallunilu qularnaveerusiisinnaavoq siusinnerusukkut allat tungaanniit akiliisinnaassuseqarnermut qularnaveerusiisoqareersimanera apeqqutaatinnagu

      Imm. 4. Aningaasaqarnermut aamma inuussutissarsiutinut ministeri Aningaasanut nakkutilliisuutitat Aningaasaateqarfiullu suleqatigiinnissaat aammalu tigusinissamut neqeroorutinik piniartoqarnissaanik piumasaqaatit pillugit maleruagssanik maleruagassiussaaq.

 

Kapitali 2

 

Aningaaseriviitt akileeqataassuteqartussaasut

 

      § 3. Aningaaseriviit makku Aningaasaateqarfimmut ilaallutillu akileeqataassuteqartassapput:

1)      Aningaaseriviit,

2)      qularnaveerusiissutitalinnik taarsigassarsisitsisarfiit,

3)      aningaasaatinik tuniniaasartutut ingerlatseqatigiiffiit (fondsmæglerselskaber) aamma aningaasalersuinernik aqutsiveqarfittut ingerlatseqatigiiffiit (investeringsselskaber) aningaasalersuinermik ingerlataqarneq pillugu inatsimmi § 10, imm. 2 malillugu akuersissummi pineqartutut ingerlatseqatigiiffiit sulissutigisaat eqqarsaatigalugit, aamma

4)      taarsigassarsisitsisarfiit aamma aningaasalersuisartutut ingerlatseqatigiiffiit, nunami Europamiut Kattuffiata avataaniittumi aningaasalersuinernut tunngassutillit pillugit Kattuffimmit Kalaallit Nunaanniillu isumaqatigiissuteqarfigineqanngitsumi akuerineqarsimasut, immikkoortortaqarfii Kalaallit Nunaanniittut.

      Imm. 2. Aningaasanut Nakkutilliisuutitat aalajangersagaliorsinnaapput taarsigassarsisitsisarfiit aamma aningaasalersuisartutut ingerlatseqatigiiffiit Kalaallit Nunaanni angerlarsimaffillit immikkoortortaqarfiisa, nunani Europamiut Kattuffiata avataani, Kattuffimmit aamma Kalaallit Nunaannit aningaasalersuinermut tunngassutilitsigut isumaqatigiissuteqarfigisaanngitsuni, inissisimasut Aningaasaateqarfimmut ilaatinneqanngitsoorsinnaanerat pillugu. 

 

      § 4. Taarsigassarsisitsisarfiit, aningaasalersuisartutut ingerlatseqatigiiffiit aamma aningaasalersuinernik aqutsiveqarfittut ingerlatseqatigiiffiit nunami Europamiut Kattuffiata avataaniittumi, Kattuffimmit aningaasalersuinermut tunngassutillit pillugit isumaqatigiissuteqarfigineqartumi aammalu aningaasalersuinermik ingerlataqarneq pillugu inatsimmi § 30, imm. 1, naapertorlugu Kalaallit Nunaannut isumaqatigiissuteqarsimasumi akuersissummik tunineqarsimasut Aningaasaateqarfimmut ilanngutissapput nunagisaminni aningaasaliisunut qularnaveerusiisarnermik aaqqissuussinermut ilassutitut, aaqqissuussineq §§ 9-11-mi taaneqartutut nunagisami aaqqissuussinermiit iluatinnaateqarnerusinmnaappat. Aningaasanut Nakkutilliisuutitat tamanna pillugu erseqqinnerusunik aalajangersagaliussapput.

 

 

Kapitali 3

 

Aningaasaateqarfiup immikkoortortai

 

      § 5. Aningaasaateqarfik immikkoortunut pingasunut aggugaavoq: Aningaaserivinnut immikkoortortaq, taarsigassarsisitsisarfinnut immikkoortortaq aamma aningaasaatinik tuniniaasartut ingerlatseqatigiiffiannut immikkoortortaq.

      Imm. 2. Aningaaserivinnut immikkoortortami pineqarput aningaaseriviit § 3, imm. 1, nr. 1-imi taaneqartut immikkoortortaqarfiillu Aningaasaateqarfimmut attaveqartitat, tak. stk. 5.

  Stk. 3. Qularnaveerusiissutitalinnik taarsigassarsisitsisarfinnut immikkoortortami pineqarput aningaaseriviit § 1, imm. 1, nr. 2-mi pineqartut immikkoortortaqarfiillu Aningaasaateqarfimmut attaveqartitat, tak. imm. 5.

      Imm. 4. Aningaasaatinik tuniniaasartutut ingerlatseqatigiiffinnut immikkoortortami pineqarput aningaaseriviit § 3, imm. 1, nr. 3-mi pineqartut immikkoortortaqarfiillu Aningaasaateqarfimmut attaveqartitat, tak. stk. 5.

      Imm.. 5. Aningaasaateqarfiup siulersuisuisa aalajangissavaat immikkoortortat § 3, imm. 1, nr. 4-mi aamma immikkoortortaqarfiit § 4-mi taaneqartut suut attaveqatigiissinneqassanersut.

      § 6. Aningaaserivik akileeqataasussaatitaasoq akiliisarnermik unitsitsinerminik imaluunniit akiliisinnaajunaarnerminik nalunaaruteqartillugu, imaluunniit Aningaasaateqarfik § 2 naapertorlugu aningaaseriviup matujartuaarnissaanut peqataatillugu aningaaserivinniit akileeqataassutit, ilanngullugit qularnaveerusiissutit, atorneqassapput immikkoortortami aningaaseriviup pineqartup attaveqarfigisaani inatsit naapertorlugu akiligassatigut pisussaaffiisa matusivigineqarnissaannut.

      Imm. 2. Akileeqataassutit imm. 1-imi taaneqartut immikkoortortap inatsit malillugu pisussaaffiisa matusivigineqarnissaannut naammanngippata immikkoortortaq taarsigassarsissaaq immikkoortortat akileeqataassutaataannut tamarmiusunut naleqqiullugu immikkoortortanit allaniit taarsigassarsiaritinneqartussanik.

      Imm. 3. Immikkoortortaq immikkoortortat allat aningaasanik tigoriaannarnik uninngasuutissaattut piumasarineqartut 50 pct.-iat tikillugu amerlassusilinnik, taamaattoq immikkoortortamut ataatsimut nasatsorsuullugit annerpaamik 100 mio. kr.-nik, taarsigassarsisinnaavoq naatsorsuutit ukiuanni ataatsimi pisussaaffiulersunut matusissutissanik.

      Imm. 4. Aningaasaqarnermut inuussutissarsiutinullu ministeri Aningaasaqarnermut Ataatsimiititaliaq akuersisillugu Aningaasaateqarfiup pisussaaffini naammassiumallugit taarsigassarsiaanut qularnaveerusiisinnaavoq.

      Imm. 5. Akiliisinnaajunnaartup pigisaanik agguaassisoqarpat agguaanneqartut siullermik immikkoortortanut imm. 2 naapertorlugu taarsigassarsisitsisunut pisassanngortitaassapput. Aningaasat sinneri immikkoortortamut aningaaseriviup akiliisinnaajunnaartup attavigisaanut tunniunneqassapput.

 

Kapitali 4.

 

Akileeqataassutissat aalajangerneqartarnerat

 

      § 7.  Aningaasaateqarfiup aningaasaatai minnerpaamik 3,2 mia. kr.-ussapput.

       Imm. 2. Danmarks Nationalbank isumaqatigiissuteqarfigereerlugu Aningaasanut Nakkutilliisuutitat maleruagassiussapput aningaaseriviit Aningaasaateqarfimmut akileeqataassutissaat, immikkoortortat ataasiakkaat aningaasaatissaasa appasinnerpaaffissaattut piumasaqaatit kiisalu taarsigas-sarsinermi patsisissaatitat erseqqinnerusut pillugit, tak. § 6, imm. 2. Aningaaserivinniit akileeqataassuteqarneq pisassaaq akiliuteqarnikkut isumannaallisaasiinertigullu.

      Imm. 3. Aningaaseriviit ilanngaatissat ilanngaatigereerlugit aningaasaliissutit matusivigisat pillugit tamarmiusumik akileeqataassutaat naatsorsuutit ukiuanni ataatsimi annerpaaffgiisinnaavaat aningaaserivinnut toqqortitat 2 promilleat. Aningaasaatinut pappiaranullu aningaasanik nalilinnut, utertinneqarsinnaanngitsunut, kiisalu immikkoortortap taarsigassarsiariunnagaanut, tak. § 6, imm. 2, akilersuutinut matusissutissatut aningaaseriviit immikkoortortanut akileeqataassutaat naatsorsuutit ukiuisa ataasiakkaat ingerlaneranni immikkoortortap aningaasaatigisassaasut piumasarineqartut annerpaamik 50 %-erissavaat.

      Imm. 4. Aningaaseriviit immikkuutaarlutik akileeqataassutissaat naatsorsorneqassapput ani-ngaaseriviit ilanngaatissat ilanngaatigereerlugit aaningaasaliissutaat matusivigisat, aningaasaatit matusivigisat aammalu pappiarat aningaasanik nalillit matusivigisat aallaavigalugit. Aningaasanut Nakkutilliisuutitat Aningaasaateqarfiup siulersuisuisa inassuteqaataat malillugu akileeqataassutissanik naatsorsuisarneq pillugu erseqqinnerusunik maleruagassiorsinnaapput.

      Imm. 5. Aningaasaqarnermut inuussutissarsiutinullu ministeri Aningaasaateqarfiup aningaasaataasa amerlassusissaannik imm. 1 naapertorlugu piumasaqaataasunik allannguuteqartitsisinnaavoq.

 

      § 8. Aningaasaateqarfik Aningaasanut Nakkutilliisuutitanut ilisimatitsissaaq aningaaserivik Aningaasaateqarfimmut ilaasortatut pisussaaffimminik naammassinninngitsoorpat. Immikkoortortataqarfik Aningaasaateqarfimmut ilannguppat, tak. § 4, Aningaasanut Nakkutilliisuutitat immikkoortortaqarfiup nunaani pisortat susassaqartut kalerrissavaat.

      Imm. 2. Aningaasanut Nakkutilliisuutitat aningaaseriviup ingerlataqarnissamut akuersissutaataa utertissinnaavaat, aningaaseriviup inatsimmi maleruagassat, maleruagassat inatsit tunngavigalugu suliaasut imaluunniit Aningaasaaateqarfiup malittarisassaani aalajangersakkat malinngippagit.

 

 

Kalitali 5

 

Aningaasaateqarfiup matusivigisassai

 

      § 9. Aningaaserivinni § 3, imm. 1, nr. 1-imi taaneqartuni kiisalu taarsigassarsisitsisarfiit immikkoortortaqarfiini § 3, imm. 1, nr. 4-mi taaneqartuni Aningaasaateqarfiup matusivigissavai aningaaserivimmi aningaasaliisup ataatsip 300.000 kr.-it tikillugit aningaasaliissutai aningaasaliisut aqqinut allatat.

      Imm. 2. Aningaasaateqarfiup tamakkiisumik matusivigissavai aningaasaliissutit

1) inatsit naapertorlugu naliusunut iluarsiivigisatut kontoniititat,

2) inatsit naapertorlugu erniortitassatut kontoniititat,

3) inatsit naapertorlugu soraarnerussutisiassatut nammineq sipaakkatut kontoniititat,

4) inatsit naapertorlugu aalajangersumik annertussusilikkuutaamik pisartagassatut kontoniititat

5) inatsit naapertorlugu meeqqanut sipaakkatut kontoniititat,

6) inatsit naapertorlugu inigisamut sipaarniutit,

7) inatsit naapertorlugu ilinniagaqarnissamut sipaakkatut kontoniititat,

8) inatsit naapertorlugu aallarniissutissamaatitut kontoniititat,

9) advokatit sullissaannut kontoniititat,

10) sernissuisoqarneq pillugu inatsimmi kapitali 5, nammineersinnaassuseqarneq pillugu Kalaallit

Nunaannut inatsit, kingornussisarneq pillugu inatsimmi §§ 61 aamma 65 imaluunniit kingornussisarneq pillugu Kalaallit Nunaannut inatsimmi § 20 naapertorlugit aqutsisoqarfinni akuerisami aqunneqartut,

11) toqusup pigisai pisortatigoortumik agguarneqartussat pillugit agguaasartutut eqqar-

tuussiviup kontoaniititat, aamma

12) toqqorsisarneq pillugu inatsit naapertorlugu toqqortat.

       Imm. 3. Aningaasaateqarfiup tamakkiisumik matusivigissavai pigisap aalaakkaasup (illup) pisiarineqarnerani akiusuniit aningaasaliissutit, ilineqarneriniit qaammatit 9 ingerlanerini toqqortinneqarsimasut tamanna sioqqullugu pisisumut isumaqatigiissusiaasimasoq naapertorlugu, aamma pigisap aalaakkaasup taarsigassarsissutigineranut atatillugu qularnaveerusiissutitalittut taarsigassarsianit iluanaarutisianiit aningaasaliissutit aningaasat ilineqarneriniit qaammatit 9 tikillugit, nutaatulli sanaani ukiut 2 tikillugit. Aningaasaateqarfiulli matusiviginninnera pissaaq qularnaveerusiissutitalittut taarsigassarsianut imaluunniit illumik niueqatigiissuteqarnermut tunngatillugu akiligassatigut pisussaaffiit, aammalu imm. 1 naapertorlugu aningaaserivimmut pineqartumut tunngatillugu ilanngaatigineqareersutut pisussaaffiujunnartut, ilanngaatigalugit. Patsisissaassaaq illuutip inuussutissarsiornermut tunngassuteqanngitsumik atugaasimanerunissaa imaluunniit illumik pisisumit tunisisumilluunniit kiisalu qularnaveerusiissutitalittut taarsigassarsisuusumit inuussutissarsiornermut tunngassuteqanngitsumik atorneqarnerusussatut aalajangiunneqarsimanera.

      Imm. 4. Aningaasaateqarfiup aalajangersinnaavaa aamma allatut iliornikkut aningaasaliissutit tamakkiisumik matusivigineqarnissaat.

 

      § 10.  Aningaaserivinni § 3, stk. 1, nr. 2-mi aamma 3-mi taaneqartuni aamma taarsigas-sarsitsitsisarfiit aamma aningaasalersuisartutut ingerlatseqatigiiffiit immikkoortortaqarfiini § 3, stk. 1, nr. 4-mi taaneqartuni, qularnaveerusiissutitalittut taarsigassarsitsitsisarfinnut immikkoortortamut imaluunniit aningaasaatinik tuniniaasartutut ingerlatseqatigiiffinnut immikkoortortamut atassuteqartuni Aningaasaateqarfiup matusivigissavai aningaasaateqarfimmi aningaasaatit aningaasalersuisumut ataatsimut 300.000 kr. tikillugit.

 

      § 11. Aningaaserivinni § 3, stk. 1-imi taaneqartuni kiisalu immikkoortortaqarfinni § 4 malillugu

Aningaasaateqarfimmut atassuteqartuni Aningaasaateqarfiup matusivigissavai aningaaseriviup pappiaranik aningaasanik nalilinnik aningaasalersuisup pigisaanik aammalu aningaaserivimmi toqqortarineqarlutillu aqunneqartunik utertitsisinnaannginnerata nassatarisaatut taassuma annaasai, aningaasalersuisumut ataatsimut 20.000 euro tikillugit nalillit.  Taamaattorli aningaasalersuisoq annerpaamik matusivigineqarsinnaassaaq aningaasanik pappiarat nalillit aningaaserivimmit utertitsinneqarsinnaasimanngitsut nalinginut naapertuuttunik.

      Imm. 2. Inatsimmi uani pappialatut aningaasanik nalilittut pineqarput pappialanik aningaasanik nalilinnik nioqquteqarneq il.il. pillugit inatsimmi § 2-mi atortutut taaneqartut.

 

      § 12. Aningaasaliisuniit aningaasalersuisuniillu matusivigineqartussatut piumasaqaatit, tak. § 9, imm. 1, aamma §§ 10 aamma 11,  naatsorsorneqassapput aningaaserivimmut pineqartumut pisussaaffigiunnagaat ilanngaatigalugit.

 

      § 13. Aningaasaateqarfiup matusivigissanngilai aningaasaliissutit, aningaasaatit aamma pap-pialat aningaasanik nalillit aningaaserivimmi pineqartumi pisortanit, siulersuisuni ilaasortanit imaluunniit ingerlatseqatigiiffinnit aningaaserivimmik pineqartumik ingerlatseqateqartunit pigineqartut.  Aamma Aningaasaateqarfiup matusivigisassaanut ilaanngillat aningaasaliisut imaluunniit aningaasalersuisut, aktiaatit, qularnaveerutit imaluunniit agguagarsiaqaataasussatut piginneqataassutit 10 pct.-iinik taakkunanngaluunniit annertunerusunik piginnittut. Aamma Aningaasaateqarfiup matusivigisassaani pineqanngillat aningaasaliissutit, aningaasaatit pappialallu aningaasanik nalillit aningaaserivinnit § 3, imm. 1-imi taaneqartunit allanit kiisalu aningaaserivinnit § 4 naapertorlugu Aningaasaateqarfimmut attaveqartunit pigineqartut, aningaasaliissutit kingullertut pisassaqaatitallit imaluunniit aningaasaliissutit, aningaasaatit pappialallu aningaasanik nalillit unioqqutitsinikkut pissarsiaasunik inatsisinut naapertuuttunngortitsinermut atasumik eqqartuussuteqaataasimallutik isumaqatigiinniuteqarnerneersut.

 

      § 14. Inuit arlaliusut kontomik imaluunniit paarititanik piginnittutut allanneqarsimatillugit §§ 9-11-mi killissatut aalajangikkat naatsorsorneranni tamarmik immikkut pisassaannut tunngatillugu namminneerlutik aningaasaliisutut imaluunniit aningaasalersuisutut naatsorsuutigineqartassapput.

 

      § 15. Aningaasaliisut aningaasalersuisullu paasissutissinneqartassapput qularnaveerusiisarnermik aaqqissuussinerup aningaaseriviup peqataaffigisaata matusivigisinnaasaa annertussusaannik il. il. Aningaasanut Nakkutilliisuutitat tamanna pillugu erseqqinnerusunik aalajangersaassapput.

 

Kapitali 6

 

Aningaasaateqarfimmiit aningaasaliisunut aningaasalersuisunullu akiliisarnerit

 

       § 16. Aningaasaateqarfimmiit akiliinerit imaluunniit Aningaasaateqarfiup aningaasaliissutinik aningaasaatinillu aningaaserivinni allani kontonut nuussineri sapinngisamik piaarnerpaamik aammalu akiliisarnermik unitsitsinerup imaluunniit akiliisinnaajunaarnerup pineraniit kingusinnerpaamik qaammatit 3 qaangiunnerisigut pisassapput. Akiliinissami patsisissaassaaq piumasaqaatit pissusissamissoortumik akilersinniarneqareersimasut pineqarnerat. Akiliisarnermik unitsitsisoqarnerani Aningaasaateqarfiup akiliinissamut pisussaanera aatsaat atuutitinneqassaaq akiliisarnermik unitsitsineq pillugu nalunaarutiginnittoqarneraniit ullut bankip nalinginnaasumik ammaffii 7 qaangiuppata.

      Imm. 2. Aningaasanut Nakkutilliisuutitat Aningaasaateqarfimmiit qinnuigineqarnikkut imm. 1-imi oqaaseqatigiinni siullerni pineqartutut piffissaliussamik sivitsuisinnaapput, sivisunerpaamilli qaammatinut 9-nut.

      Imm. 3. Aningaasaateqarfik imm. 1-imi 2-milu taaneqartutut piffissarititaasut innersuullugit aningaasaliisumut imaluunniit aningaasalersuisumut, aningaasat imminut akilerneqarnissaat pillugu piginnaatitaanerminik piffissaalluartillugu patsiseqarniarsinnaasimanngitsumut akiliinissamik itigartitsisinnaanngilaq.

      Imm. 4. Aningaasanut Nakkutilliisuutitat erseqqinnerusunik maleruagassiussapput aningaaseriviup akiliisarnermik unitsitsinera imaluunniit akiliisinnaajunnaarnera pillugu aammalu aningaasaliisut aningaasalersuisullu Aningaasaateqarfimmut piumasaqaatiminnik nalunaaruteqarnissaat pillugu Aningaasaateqarfiup paasissutissiinissamut pisussaanera pillugu.

 

      § 17. Aningaasaliisuusup imaluunniit aningaasalersuisuusup aningaaserivimmut akiliisarnerminik unitsitsisimasumut imaluunniit akiliisinnaajunnaarsimasumut piumasaqaataanut matusivigisimasaminut naapertuuttumik Aningaasaateqarfik akuliusimalertassaaq.

 

Kapitali 7

 

Aningaasaateqarfiup siulersorneqarnera aqutsineralu

 

      § 18. Aningaasaateqarfik siulersorneqassaaq siulersuisunit 8-nik ilaasortalinnit aningaasaqarnermut inuussutissarsiornermullu ministerimit toqqakkanit. Ilaasortat taakkualu sinniisissaat ukiuni 3-ni atasussatut toqqarneqartassapput.

      Imm. 2. Siulersuisut siulittaasuat naalagaaffiup aningaasaqarniarneranik naatsorsuuserinermillu paasisimasallit sinniiserissavaat. Siulittaasup tullia inatsisilerinermik paasisimasaqartuussaaq. Ilaasortat marluk aningaaseriviit § 3, imm. 1, nr. 1-imi taaneqartut sinniisigissavaat, ilaasortaq ataaseq aningaaseriviit § 3, imm. 1, nr. 2-mi taaneqartut sinniisigissavaat, ilaasortaq ataaseq aningaaseriviit § 3, imm. 1, nr. 3-mi taaneqartut sinniisigissavaat ilaasortallu marluk aningaasaliisut aningaasalersuisullu sinniisigissavaat.

      Imm. 3. Siulittaasutut imaluunniit siulittaasup tulliatut qinerneqarsinnaanngillat inuit ingerlatseqatigiiffimmi katuffimmiluunniit aqutseqataasuusut imaluunniimmi ingerlatseqatigiiffimmut kattuffimmulluunniit ima attuumassuteqartigisut taakkua Aningaasaateqarfiullu akornanni akerleriissunik soqutigisaqartoqalersinnaalluni.

      Imm. 4. Aalajangiinerit amerlanerussuteqarneq nalinginnaasoq tunngavigalugu pisassapput, taamaattoq tak. imm. 5 aamma § 19, imm. 2-mi oqaaseqatigiit aappaat. Taasinerit amerlaqatigiippa-ta siulittaasup taasinera aalajangiisuussaaq.

      Imm. 5. § 2 malillugu tapiissuteqarnermik aallartitsinissaq aalajangiunneqarsinnaanngilaq siulersuisuni ilaasortat aningaaserivinnut aalajangiiniarnermi pineqartunut sinniisuuffiginnittut, tak. imm. 2, ilaat  ataaseq tapiissuteqarnissamut akerliulluni taasippat.

 

      § 19. Aningaasaateqarfiup malittarisassai siulersuisullu suleriaasissaat Aningaasanut Nakkutilliisuutitanit akuersissutigineqassapput.

      Imm. 2. Malitarisassat imarissavaat Aningaasaateqarfiup aningaasaataanik inissiisarneq pillugu kiisalu aningaasaliissutit suut tamakkiisumik matusivigisassaanerat, tak. § 9, imm. 4, pillugu aalajangersakkat. Matusissutissat annertusisinnissaannik aalajangerneq isumaqatigiinnikkut aalajangiinerussaaq.

      Imm. 3. Aningaasaateqarfiup malittarisassaani aalajangersagaqarsinnaavoq apeqqutit immikkoortortamut ataasiinnarmut tunngasut siulersuisuni oqaluuserineqarneranni siulersuisunut ilaasortat immikkoortortanut allanut sinniisuusut peqataasassanngitsut.

 

      § 20. Siulersuisut pisariaqartinneqartunik ikiortissarsissapput qaammatisiutillu ukiuata ataatsip naaneraniit qaammatit 3 qaangiutinnginneranni ukiumut qaangiuttumut naatsorsuutinik Aningaasaateqarfiullu sulisimanera pillugu nalunaarusiamik Aningaasanut Nakkutilliisuutitanut saqqummiussissapput.

 

      § 21. Aningaasaateqarfiup ingerlatsineranut aningaasartuutit Aningaasaateqarfiup akilissavai.

      Imm. 2. Aningaasaateqarfik Aningaasanut Nakkutilliisuutitanut akiliuteqartassaaq. Akiliutissat aningaasalersuinermik ingerlataqarneq pillugu inatsimmi kapitali 22 tunngavigalugu amerlassusilerneqassapput.

 

Kapitali 8

 

Nakkutilliineq

 

      § 22. Aningaasanut Nakkutilliisuutitat Aningaasaateqarfimmut nakkutilliisuussapput. Aningaasanut Nakkutilliisuutitat Aningaasaateqarfillu aningaaserivinnut aamma aningaasaliisunut aningaasalersuisunullu piumasaqarsinnaapput inatsisip maleruagassartaasa, maleruagassat inatsit naapertorlugu suliaasut aamma Aningaasaateqarfiup malittarisassaani aalajangersakkat naammassineqarsimanerat qularnaarniarlugu pisariaqarsorineqartunik tamanik paasissutissinneqarnissamik.

      Imm. 2. Aningaasalersuinermik ingerlataqarneq pillugu inatsimmi §§ 354 aamma 355 Ani-ngaasanut Nakkutilliisuutitat aaqqissuussineq manna malillugu nakkutilliineranni aamma atortuutinneqassapput. Aningaasanut Nakkutilliisuutitanut naleqqiullugu Aningaasaateqarfik kisimi illuatungiusutut isigineqassaaq.

 

Kapitali 8 a

 

      § 22 a. Aningaasaateqarfiup siulersuisuinut ilaasortat, kukkunersiuisut, pisortat sulisullu allat paasissutissanik isertugaasunik sulinerminnut atatillugu ilisimalikkaminnik piginnaatitaanatik allanut ingerlatitseqqissanngillat imaluunniit iluaqutiginninniassanatik.

 

Kapitali 9

 

Pineqaatissiisarnermik aalajangersakkat

 

      § 23. Unioqqutitsisutut Kalaallit Nunaanni pinerluttulerinermik inatsit malillugu pineqaatissinneqassaaq,

1) nalunaaruteqarnermi, naatsorsuinermi imaluunniit matussutissatut piumasaqaataasut tunniunneqarneranni eqqunngitsunik imaluunniit paatsiveerusaataasunik paasissutissiisoq imaluunniit paasissutissanik nipangiussisoq imaluunniit

2) paasissutissanik nakkutilliisuniit imaluunniit Aningaasaateqarfimmiit § 22 naapertorlugu piumaneqartunik tunniussiumanngitsoq imaluunniimmi Aningaasaateqarfiup nakkutigineqarnerani atu-gassanik paasissutissanik eqqunngitsunik imaluunniit paatsiveerusaataasunik tunniussaqartoq.

       Imm. 2.Taamatuttaaq aningaaserivik Aningaasaateqarfimmut ilaasutut pisussaaffimminik naammassinninngitsoq pineqaatissiissummik eqqartuunneqassaaq.

      Imm. 3. Aktiaatilittut ingerlatseqatigiiffiit unioqqutitsinerini ingerlatseqatigiiffik taamatulli akiliisitsissutissanut akisussaatinneqarsinnaavoq.

 

      § 23 a. § 22 a-mi aalajangersakkamik unioqqutitsineq Kalaallit Nunaanni pinerluttulerinermik inatsit malillugu pineqaatissiissutaassaaq.

 

Kapitali 10

 

Atortuulersitsissutitut aalajangersakkat il. il.

 

      § 24. Peqqussut atuutilissaaq 1. april 2005. Tamanna peqatigalugu atorunnaassaaq aningaa-saliisut qularnaveerusiiffiginissaannut aningaasaateqarfik pillugu inatsisip Kalaallit Nunaannut atortuulersinneqarnissaanik peqqussut nr. 576, 26. juni 1996-imeersoq.

 

      § 25. Peqqussutit inatsit naapertorlugu suliaasut makku aamma Kalaallit Nunaanni atuutissapput:

1)      Aningaasaliisut aningaasalersuisullu qularnaveerusiiffiginissaannut aningaasaateqarfik pillugu nalunaarut nr. 1055, 8. december 2003-meersoq atuutissaaq imaattunik allannguuteqarluni:

      a)   § 1, imm.1, nr. 3-mi, § 6, imm. 2-mi aamma 4-mi, § 7, imm. 4-mi marloriarlugu taaneqartoq, kiisalu § 9, imm. 3-mi „aningaasalersuinermik ingerlataqarneq pillugu inatsit“ allanngortinneqassaaq ukununnga: „aningaasalersuinermik ingerlataqarneq pillugu inatsisip Kalaallit Nunaanni atortuulersinneqarnissaanik peqqussut”.

      b)   § 1, imm. 1, nr. 4 aamma 5, imatut oqaasertalerneqassapput:

            „4)      Taarsigassarsisitsisarfiit aamma aningaasalersuisartutut ingerlatseqatigiiffiit nunami Europamiut Kattuffiata avataaniittumi Kattuffimmit isumaqatigiissuteqarfiunngitsumi aammalu aningaasalersuinermik ingerlataqarneq pillugu inatsisip Kalaallit Nunaanni     atortuulersinneqarnissaanik peqqussummi § 30, imm. 1, naapertorlugu Kalaallit Nunaannut isumaqatigiissuteqanngitsumi akuersissummik tunineqarsimasut immikkoortortaqarfii, aamma

            5)      Aningaaseriviit Qularnaveerusiiffigisassanut Aningaasaateqarfimmut atassuteqartut, tak. § 2, imm. 1, aammalu nunani Europamiut Kattuffiannut ilaasuneersut, imaluunniit nunani  Kattuffiup isumaqatigiissuteqarfigisaaneersut, aammalu aningaasalersuinermik ingerlataqarneq pillugu inatsisip Kalaallit Nunaanni atortuulersinneqarnissaanik peqqussummi § 30, imm. 1 naapertorlugu Kalaallit Nunaannut isumaqatigiissuteqarsimasuneersut immikkoortortaqarfii.

      c)   § 1, imm. 2, imatut oqaasertalerneqassaaq:

            „Imm. 2. §§ 16 aamma 17 atortuutinneqassapput aningaaseriviit nunami Europamiut kattuffiannut ilaasumi imaluunniit nunami Kattuffimmit isumaqatigiissuteqarfiusimasumi aamma aningaasalersuinermik ingerlataqarneq pillugu inatsisip Kalaallit Nunaanni atortuulersinneqarnissaanik peqqussummi § 30, imm. 1, naapertorlu Kalaallit Nunaannut isumaqatigiissuteqarsimasumi akuersissummik tunineqarsimasut immikkoortortaqarfiinut, immikkoortortaqarfiup Qularnaveerusiiffigisassanut Aningaasaateqarfimmut attaveqarfiginninnera apeqqutaatinnagu.“

d)   § 1, imm. 4-mi „Danmark“ allanngortinneqassaaq ukununnga: „Kalaallit Nunaat“ aamma „nunat Europamiut Kattuffiata avataaniittut, nunat Kattuffimmit isumaqatigiissuteqarfigisat pinnagit“ ukununnga allanngortinneqassapput: „nunat allat“,

e)   § 2, imm. 1-imi „-sinnaavoq“ allanngortinneqassaaq uunga: „-ssaaq“.

f)    § 3, imm. 1-imi, 3-mi aamma 4-mi, § 5-imi, § 6, imm. 6-imi, § 7, imm. 2-mi, 3-mi aamma 4-mi, § 12, imm. 1-imi aamma 2-mi, § 23, nr. 5-imi kiisalu § 24, imm. 3-mi „aningaasaliisut aningaasalersuisullu qularnaveerusiiffiginissaannut aningaasaateqarfik pillugu inatsit“ allanngortinneqassapput ukununnga: „aningaasaliisut aningaasalersuisullu qularnaveerusiiffiginissaannut aningaasaateqarfik pillugu inatsisip Kalaallit Nunaanni atortuulersinneqarnissaanik peqqussut“.

g)   § 7, imm. 3-mi aamma 4-mi „pappialanik aningaasanik nalilinnik niuerneq il. il. pillugit    inatsit“ allanngortinneqassapput ukununnga: „pappialanik aningaasanik nalilinnik niuerneq il. il. pillugit inatsisip Kalaallit Nunaanni atortuulersinneqarnissaanik peqqussut“.

h)   § 17, imm. 4-mi oqaatsip „qallunaat“ kingorninut ivertinneqassapput: „aamma kalaallit“.

i)    § 18 imatut oqaasertalerneqassaaq:

            „ § 18. Aningaasaateqarfiit nunami Europamiut Kattuffiannut ilaasumi, imaluunniit nunami Kattuffimmit suleqatigiinnissaq pillugu isumaqatigiissuteqarfigineqartumi akuersissummik tunineqarsimasut, aammalu aningaasalersuinermik ingerlataqarneq pillugu inatsisip Kalaallit Nunaannut atortuulersinneqarneranik peqqussummi § 30, imm. 1, naapertorlugu Kalaallit Nunaanni isumaqatigiissuteqarsimasut, immikkoortortaqarfiisa nunami suliffeqarfigisaminni aningaasaliisut aningaasalersuisullu paasissutissittassavaat nunami suliffeqarfigisami maleruagassatut aalajangersarneqartut malillugit.“

j)    § 20, imm. 1-imi „aviisini aningaaseriviup angerlarsimaffigisaani ullormoortumik saqqummersartuni ataatsini arlalinniluunniit kiisalu aviisimi nuna tamakkerlugu saqqummersartumi aamma Statstidendemi“ allanngortinneqassapput ukununnga: „aviisini nuna tamakkerlugu saqqummersartuni, Statstidendemi AG-milu“.

k)   § 24, imm. 3-mi „pillaatissanut akisussaatitaaneq“ allanngortinneqassapput ukununnga: „pineqaatissiissutissanut akisussaatitaaneq“.

l)    § 25-mi oqaatsip „qallunaat“ kingorninut ivertinneqassapput: „imaluunniit kalaallit“.

m)  § 29-mi „Danmark“ allanngortinneqassaaq ukununnga: „Kalaallit Nunaat“.

n)   § 31 imatut oqaasertalerneqassaaq:

            „§ 31. Nalunaarut atuutilissaaq 1. april 2005.

            Imm. 2. Aningaasaliisut qularnaveerusiiffiginissaannut aningaasaateqarfik pillugu nalunaarut nr. 754, 15. september 1999-imeersoq atorunnaassaaq.“

2)      Aningaasanut Nakkutilliisuutitat aamma aningaasaliisut aningaasalersuisullu qularnaarusiiffiginissaannut aningaasaateqarfiup suleqatigiinnissaat pillugu nalunaarut nr. 92, 19. februar 2002-meersoq atuutissaaq imaattunik allannguuteqarluni:

      a)   § 12 imatut oqaasertalerneqassaaq:

                  „§ 12. Nalunaarut atuutilissaaq 1. april 2005.

                  Imm. 2. Aningaasanut Nakkutilliisuutitat aamma aningaasaliisut qularnaveerusiiffiginissaannut aningaasaateqarfiup suleqatigiinnissaat pillugu nalunaarut nr. 117, 3. februar 1997-imeersoq atorunnaassaaq.“