04EM/01.25.01-107 Raajarniartarnermi piffissamik killiligaanngitsumik akuersissutinik atorunnaarsitsiniarmermik... (Per Skaaning, Demokraatit)

12.august 2004                                                                                               UKA 2004/107

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Raajarniartarnermi piffissamik killiligaanngitsumik akuersissutinik atorunnaarsitsiniarmermik ilimasaarinermi ajornartorsiutaasinnaasut pillugit Inatsisartut immikkoortunik nr. 48-imik, 90-mik 98-imillu suliaqarnerannut atatillugu arlaannaannulluunniit attuumassuteqanngitsumik immikkut ilisimasalinnik inuttalerlugu UKA 03-mi Naalakkersuisut ataatsimiititaliorniarlutik Inatsisartunut neriorsuutigisaasa sulinera sumut killippa?

(Inatsisartunut ilaasortaq Per Skaaning, Demokraatit)

Tunngavilesuut:

Inatsisartut ukiakkut ataatsimiinneranni (UKA03) ukioq ataasingajaap matuma siorna, Aalisarneq pillugu inatsimmi § 14-imik Naalakkersuisut atueqqullugit peqquneqarnissaannik, taamaalilluni akuersissutit piffissamik killiligaanngitsut piffissamut killiliivigineqartalernissaannik Inatsisartunut ilaasortaq Hr. Ole Dorph aamma Inatsisartunut ilaasortaq Hr. Aqqalukasik Kanuthsen ataaniilu atsiortoq aalajangiiffigisassatut siunnersuutinik saqqummiussaqarput. Siunnersuutilli Inatsisartunit taperserneqanngitsoorput.

Inatsisartut Aalisarnermut, Piniarnermut Nunalerinermullu Ataatsimiititaliaata aalajangiiffigisassatut siunnersuutinik suliaqarnerminut atatillugu ataatsimiititaliap isumaliutissiissutaanik Naalakkersuisunut saqqummiussinermini innersuussutigaa:

(Issuaaneq aallartippoq) ¿Ataatsimiititaliap isumaliutersuutai tunngavigalugit ataatsimiititaliami amerlanerussuteqartut Siumumeersut, Inuit Ataqatigiinnersut Demokraatineersullu assersuutigalugu akileraartarnermik akitsuusiisarnermillu sanilliussinermi ataatsimiititaliap assinganik ilusilerlugu suleqatigiissitamik arlaannaannulluunniit attuumassuteqanngitsumik immikkut ilisimasalinnik assigiinngitsuneersunik inuttaqartumik, piffissami killiligaanngitsumi akuersissutinik atorunnaarsitsinermi ajornartor-siutaasinnaasunik qulaajaasussamik pilersitsinissap Naalakkersuisunit isumaliutigineqartariaqartariaqarnera pingaartutut isigaat. Suleqatigiissitaq immikkut ilisimasallinnik assigiinngitsuneersunik inuttalik aalisarnermi kattuffinnik tunisassiortunillu qanimut aaqqissuussasumillu oqaloqatiginnittariaqassaaq. Aalisarnermilli inuussutissarsiuteqartut immikkut ilisimasalinnik inuttaqartumik suleqatigiissitami akuutinneqartariaqanngillat, suleqatigiissitarmi taanna pissutsit tunngaviusut eqqarsaatigalugit illuatungiusut soqutigisaannut attuumassuteqartussaassanngimmat.

Aammattaaq ataatsimiititaliaq isumaqarpoq immikkut ilisimasalinnik inuttaqartumik suleqatigiissitamut suliakkiut tassaasariaqartoq; aalisarnermut tunngasuni siunissami ungasissumullu isigaluni anguniagassat qanoq iluseqartinneqarnissaannik Naalakkersuisunut kaammattuuteqarnissaq, taamaaliornikkut aalisarnikkut pisuussutinik iluanaarutit annertunerusumik pissarsissutaasarnissaannik, pisuussutinik piginnittuunerup siammarnissaanik il.il. naalakkersuinikkut suliaqartunit kissaatit tamakkiisumik sukumiisumillu qulaajarneqarsinnaaqqullugit.¿ (Issuaaneq naavoq)

Inatsisartut Aalisarnermut, Piniarnermut Nunalerinermullu Ataatsimiititaliap isumaliutissiissutaanut aammalu Inatsisartut UKA03-mi aappassaaneerinninnerannut Naalakkersuisut akissuteqaamminni tulliuttut akissuteqaatigaat: 

(Issuaaneq aallartippoq) ¿Aalisarnermut, Piniarnermut Nunalerinermullu Ataatsimiititaliami amerlanerussuteqartutuulli Naalakkersuisut pisariaqartutut isigaat, siunissami qaninnermi immikkut ilisimasalinnik ilaasortaaffigineqartumik sumulluunniit atanngitsumik ataatsimiititaliortoqassasoq, taassuma suliassarissavaa ullumikkut raajarniarsinnaanermut akuersisarnermi periutsimut taartaasinnaasumik misissuinissaq.

Naalakkersuisut isumaqarput immikkut ilisimasalinnik ilaasortaaffigineqartumik ataatsimiititaliap nunatsinni aalisarsinnaanermut akuersisarnermi periutsimut taartaasinnasunik illersorneqarsinnaasunik kiisalu aalisarsinnaanermut akuersisarnermi periutsit nutaat nunatsinni aalisarnermik inuussutissarsiuteqartunut inuiaqatigiinnullu tamanut qanoq kinguneqarsinnaanerinik misissuinissaq.¿ (Issuaaneq naavoq)

Inatsisartut Aalisarnermut, Piniarnermut Nunalerinermullu Ataatsimiititaliaata qisuariarnera siuliani taaneqartoq aammalu Ataatsimiititaliamut Inatsisartunullu Naalakkersuisut UKA03-mi akissuteqaataat toqqammavigalugit Naalakkersuisut tulliuttutut apeqqutit akissuteqaateqarfigissagaat inussiarnersumik kissaatigissavara:

1.)  Sumulluunniit attuumassuteqanngitsumik immikkut ilisimasalinnik inuttalerlugu ataatsimiititaliaq inunnik qassinik ilaasortaqarnersoq Naalakkersuisunit ilisimatitsissutigeqquneqarpoq?

Tamatumunnga ilanngullugu ilisimatitsissutigeqquneqarpoq, inuit taakku aalisarnermi inuussutissarsiuteqarnermut atatillugu sunik misilittagaqarnersut sunillu piginnaasaqarnersut imaluunniit ilisimatusarfinnut qanoq attuumassuteqarnersut?

Sumulluunniit attuumassuteqanngitsumik immikkut ilisimasalinnik inuttalerlugu ataatsimiititaliap ullormi sumi suliani aallartissimanerai ilanngullugu Naalakkersuisunit ilisimatitsissutigineqassasoq kissaatigineqarpoq.

2.)  Naalakkersuisut eqqarsaatersuutaat naalakkersuinikkullu isumaliutaat, sumulluunniit attuumassuteqanngitsumik immikkut ilisimasalinnik inuttalerlugu ataatsimiititaliamut suliakkiissutigineqartunut toqqammaviusut pillugit Naalakkersuisut naatsumik nassuaateqarnissaat kissaatigineqarpoq. Suliakkiissutip siuliani taaneqartup nuutinnera paasissutissatut perusukkaluarpara.

3.)                       Sulinermi siumukarneq pillugu naatsumik nassuiaammik kiisalu sumulluunniit attuusassuteqanngitsumik immikkut ilisimasalinnik inuttalerlugu ataatsimiititaliap ataatsimiittarnerinut nassuiaammik Naalakkersuisut saqqummiussaqarnissaat kissaatigineqarpoq.

4.)                      Suliakkiutigineqartut toqqammavigalugit sumulluunniit attuumassuteqarnani ataatsimiititaliap inerniliukkallarsimasaasa suuneri pillugit Naalakkersuisut nassuaateqassasut kissaatigineqarpoq.

5.)                      Sumulluunniit attuumassuteqanngitsumik immikkut ilisimasalinnik inuttalerlugu ataatsimiititaliap suliai pillugit tamanut saqqummiussinissap ulloriumaagaa pillugu Naalakkersuisut ilisimatitsissuteqassasut kissaatigineqarpoq.

Naalakkersuisut akissutissaat qilanaarivara.