04EM/01.25.01-108 Raajanut akitsuummut akiliutigineqartut ulloq manna tikillugu annertussusaat pillugu Naalakkersuisunut apeqqut. (Per Skaaning, Demokraatit)
12. august 2004 UKA 2004/108
Inatsisartut Suleriaasianni § 36, imm. 2, naapertorlugu Naalakkersuisunut apeqqut imaattoq matumuuna saqqummiuppara.
Raajanut akitsuummut akiliutigineqartut ulloq manna tikillugu annertussusaat pillugu Naalakkersuisunut apeqqut.
(Inatsisartunut ilaasortaq Per Skaaning, Demokraatit)
Inatsisartut ukiakkut ataatsimiinneranni 2003-mi Inatsisartut aalajangerpaat raajanut akitsuutip annertussaa allanngortinneqassasoq taamaalilluni siunissami raajanut akitsuutip agguaqatigiissillugu tunisinermi aki 13,00 kr-it sinnerlugit inissisimagaangat aatsaat akilersinniarneqartalissalluni.
Inuiaqatigiit isertitaasa raajarniarnermi isertitanit inuiaqatigiinnit tiguneqartartut annikippallaarneri tunngavilersuutigineqarlutik, Inatsisartut ukiakkut ataatsimiinneranni 2003-mi amerlanerussuteqartut raajanut akitsuutip annertussusaa allanngortinneqassasoq isummiuppaat, ukiullu tamaasa raajarniarnermi akitsuutip inuiaqatigiinnut annertunerusumik isertitsissutigisariaqaraluarnera inuiaqatigiit pinngortitap pisuussutaanik aalisarnermut atugassaritaat inuiaqatigiinnut annertunerusumik isertitsissutaasariaqaraluarmat.
Raajanut akitsuutip annikillisinneqarneratigut Landskarsip 2004-mut atatillugu annertunerusumik iluanaarutigileriissagaa Naalakkersuisut ataani atsiortup assigalugit naatsorsuutigigaa isumaqarpunga.
Naalakkersuisunit Aningaasaqarnermut Inatsimmi 2004-mi konto 24.11.12-mi naatsorsorneqarsimavoq raajanut akitsuut 18 mio. kr.-mik isertitsissutigineqarumaartoq.
Qulaani allassimasut tunngavigalugit matumuuna Naalakkersuisut qinnuigissavakka ataani atsiortumut, raajanut akitsuummut akiliutigineqartut ulloq manna tikillugu annertussusaat aammalu raajanut akitsuut Landskarsip 2004-mut tamarmut qanoq annertutigisumik isertitsissutigineqassanersoq Naalakkesuisunit naatsorsuutigineqarnersoq ilisimatitsissutigeqqullugu.