04EM/01.25.01-110 Inuusuttut nunamik imaanillu nakkutilliinikkut suliassanik, kusassaanernik, saliginernik, aammalu aqqusinniornernik.. (Ruth Heilmann, Siumut)
12. august 2004 UKA 2004/110
Inatsisartut suleriaasianni § 36, imm. 2, naaapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut: Inuusuttut nunamik imaanillu nakkutilliinikkut suliassanik, kusassaanernik, saliginernik, aammalu aqqusinniornernik assigisaannilluunniit ingerlatsisarnissamik neqeroorfigineqarnissaannik Naalakkersuisut suliniuteqalersaarpat?
(Inatsisartunut ilaasortaq Ruth Heilmann, Siumut)
Tunngavilersuut:
Inuusuttunik nunaminnik kiffartuussisunik pilersitsisoqarnissaannik siusinnerusukkulli inatsisartuni siunnersuutigineqartarlunilu oqallisigineqartartoq taperserneqartarlunilu sumummita suliaq tamanna killiffeqartinneqarpa?
Isumaqarpunga piffissanngortoq taamatut siunertaqartunik inuusuttunik suliniartunik aallartitsisoqarnissaa.Nunamik piniagassanillu nakkutilliineq jagtbetjentit ingerlappaat, nalunngilarpulli sineriassuaq annertoqimmat piniarnermik nakkutilliisut taamatut ikitsigigamik suliassalerujussuusartut angummanniapiloorlutillu.
Taamatut tapertaasumik nunamik imaanillu nakkutiginnittunik pilersitsinissamik eqqartuisoqartarpoq, isumaqarpungalu inuusuttut tamanna soqutigisinnaagaat periarfissinneqarunik.
Aalisakkat tammakarnerisigut ullumikkut aasaanerani inuusuttut suffissaaleqisut takussaasaqaat aasaanerani atuanngiffimminni oorinnguamik katerserusukkaluartut imaluunniit aqqusinermiiginnaratik arlaannik misigisaqarusukkaluartut, akissaqaratillu aamma suliffissaqartan-ngitsut.
Illuatungaagulli nunatsinni suliassat kusassagassat,aqquserngit suliassat pinngortitaq salitassaq aalisartut aammalu piniartut asimi ikiortissaaleqisut immaqalu nunakut qimatat salinneqartussat,illut atuartut asiliartarfii qalipagassat ilami sorpassuusinnaapput taaguiniaraanni.
Taamaattumik pisariaqartinneqartoq imassaaleqissunnissaa ilimagisariaqanngilaq,inuusuttut nunaminnik kiffartuussisut aallartinneqarniarlik immaqalu misi-ligutaasumik aallaqqaammut aasaanerani ingerlakkallarlugu.
Islande takuinnartigu inuusuttut aasaanerani sulisaqaat ilinniarnissaminnut akiliutissaminnik aningaasannguanik pissarsiniarlutik aamma nunat allat iliuuserisartagaat torrallatatut eqqartuinnarnagit aamma nunatsinnut tulluarsakkamik iluaqutigineqarsinnaanerat piviusunngortinneqarsinnaanerallu misilinneqarniarli.
Inuusuttortatsinnut perorsaataassaaq akisussaaffimmik ilinniarnerussaaq kingusinnerusumut iluaqutaasussaq aamma nunatta nakkutigilluarneqarneranut.
Taamatut siunnersuuteqarpunga piviusunngortitsinissaq siunertaralugu.