04EM/01.25.01-114 Sunngiffimmi atuartitsinermi atuaqatigiinnik aallartitsinissamut atuartut ikinnerpaaffeqarnissaannut... (Ole Thorleifsen, Siumut)

11. august 2004       UKA 2004/114

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Sunngiffimmi atuartitsinermi atuaqatigiinnik aallartitsinissamut atuartut ikinnerpaaffeqarnissaannut piumasaqaammut tunngatillugu Naalakkersuisut qanoq isumaliutersuuteqarpat?

(Inatsisartunut ilaasortaq Ole Thorleifsen, Siumut)

Tunngavilersuut:

Kultureqarnermut ingerlatsineq sunngiffimmilu sammisassaqartitsineq pillugit Inatsisartut peqqussutaat Nr. 10 21. maj 2002-meersumi Kapitali 3-mi § 4-imi kiisalu §-ini 6-imiit 10-mut allassimavoq sunngiffimmi atuartitsinermi atuartitsissutinik atuartunillu killiliinissat naalakkersuisunit malittarisassiunneqarsinnaasoq. Tamanna tunngavigalugu Kultureqarnermut Naalakkersuisoq aperiniarpara; sunngiffimmi atuartitsinermik aallartinniarnermi peqataasussanik ikinnerpaaffiliineq naleqqusarneqarniannginnersoq? Maannami ullutsinni tamatta ilisimavarput sunngiffimmi atuartitsineq ingerlanerluttoq. Sunngiffimmi atuartitsineq inunnik sammisaqaqatigiinnertigut annertunerusumik ilisarisimalersitsisarpoq, qaammarsaanermillu annertuumik siammarterisarluni. Maannamut piumasaqaatigineqarpoq aallartilernermi minnerpaamik peqataarusullutik nalunaarsimasut arfineq pingasuussasut. Illoqarfinni minnerusuni nunaqarfinnilu sammisat ataasiakkaat immikkuullarissut allaartikkuminaattarput, soqutiginnittut ikippallaartarneri pissutaalluni. Eqqarsaatigineqarsinnaannginnerpa amerlassutsitigut killiliussat allanngorarfilimmik piffimmiit piffimmut aaqissuunneqarsinnaaneri.