04EM/01.25.01-117 Kalaallit Nunaani ilinniarfinnik assigiinngitsunik pilersitsiniarnerit killiffiat pillugu Naalakkersuisunut apeqqut. (Ruth Heilmann Siumut)
12. august 2004 UKA 2004/117
Inatsisartut suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Kalaallit Nunaani ilinniarfinnik assigiinngitsunik pilersitsiniarnerit killiffiat pillugu Naalakkersuisunut apeqqut.
(Inatsisartunut ilaasortaq Ruth Heilmann Siumut)
Tunngavilersuut:
Neriuutigaara illoqarfiit qaangiataaginnarneqartut assigiinngitsunik atuarfinnik pilersitsivigineqarnissaanik siunniussisoqarumaartoq illoqarfiit pineqartut siuarsarneqarnissamik pisariaqartitseqimmata.
1996-mi nunatsinni efterskoleqalernissaanik siunnersuuteqarpunga aammalu Timersornermik ilinniarfeqalernissaanik kingornalu aamma Nipilersornermik ilinniarfeqalernissaanik siunnersuuteqarlunga, inatsisartut allat aamma taamatut siunnersuuteqartarput soorlu aamma upernaaq inatsisartuni efterskoleqalernissaanik oqallittoqaqqittoq. Tamakku tamarmik Naalakkersuisunit ilassiluarneqartaraluartut tusarfigineqarnerli ajorput.
- Kalaallit Nunaani assassorluni inuusuttunut sulisartunullu ilinniarfimmik, timersornermik ilinniarfimmik, nipilersornermik ilinniarfimmik aammalu efterskolemik pilersitsinissamut pilersaarummik qaqugu Naalakkersuisut aallartitsilersaarpat?
Siunnersuutigisartakkavut timitalerneqassappata ukiulerlugit pilersaarusiornissaat pisariaqarpoq, soorunami siunnersuuteqartarnissaq mattunnianngilara, kisiannili Naalakkersuisunit siunnersuutit tigulluarneqartaraluartut taakkununnga tunngasuni siunnersuutit assingusut arlallit tusagaqarfigeqqinneqartannginneri peqqutaaqataasunut ilaagunarpoq, Naalakkersuisut paarlakaattuarnerat peqqutaatinneqartariaqanngikkaluarpoq,ersarissumillu siunnerfeqarnissaq nunatta pisariaqartikkaa malunnarluarpoq.
Pisariaqartitsineq annertuujusoq nalunngilarput aammalu oqartoqartarluni ilinniarfiit højskolellu pioreersut atorluarneqartariaqartut.
Isumaqarpungalu piviusorsiortumik pilersaarusiorneq aallartittariaqartoq,kommunit Kanukokalu suleqatigalugit.