04EM/01.25.01-85 Pisortanit soraarnerussutisiallit saniatiguunik isertitaqartarneranni ajornartorsiutit pillugit Naalakkersuisunut apeqqut. (Anthon Frederiksen, Kattusseqatigiit)
3. august 2004 UKA 2004/85
Inatsisartut suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.
Pisortanit soraarnerussutisiallit saniatiguunik isertitaqartarneranni ajornartorsiutit pillugit Naalakkersuisunut apeqqut.
(Inatsisartunut ilaasortaq Anthon Frederiksen, Kattusseqatigiit)
Tunngavilersuut:
Utoqqaat innarluutillillu aammalu siusinaartumik sulisinnaajunnaarnersiutillit ilaat ukiumi nutaami tigusartakkaminnik millileriffigineqarput, allaat siusinaartumik sulisinnaajunnaarnersiutillit ilaat tigusassaarutivissortinneqarlutik, tassagooq 2002-imi aappaat isertitaqarpallaarsimammata imaluunniit siusinaartumik sulisinnaajunnaarnersiutilik sanaluttarnermigut allatulluunniit isertitaqalaartarnerat pissutigalugu.
Utoqqaat ilaat 2002-imi utoqqalinersiutimik saniatigut isertitsilaarsimasut boligsikring-ikkut ¿pillarneqartutut¿ pineqarnertik naammagittaalliuutigaat, taamaalilluni inoqitigiinnut meerartaqanngitsunut ineqarnermut tapiissutinik tigusisinnaanermut killigititaq 180.000 kr.-iusoq qaangerneqartarluni.
Utoqqaat ilaat suli pisinnaalaartut aammalu siusinaartumik sulisinnaajunnaarnersiutillit ilaat uniinnarumanatik aamma peqqissaatigalugu saniatigut isertitaqalaartartut taamatut taakkua oqarnerattuut ¿pillarneqarnertik¿ assorujussuaq nikallornartutut narrujuumminartutut aammalu sulerusussusseerunnartutut tigusimavaat assut inuttut nakkaatigalugu. Tassami naluneqanngitsutut utoqqaat siusinaartumillu sulisinnaajunnaarnersiutillit ilaasa ilaquttaminnut sapinngisannguaminnik suli ikiuutilaarsinnaanertik assut atorluarusuttaraluarmassuk, kisiannili naggataatigut tigusartakkaminnik imaluunniit boligsikring-ikkut piiaaffigineqartarnertik assorujussuaq nakeriallaatigalugulu ¿pillarneqartutut¿ misigitinneqartarnertik assut nuanniittutut tigusarpaat.
Taamaattumik apeqqutiginiarpara:
Soraarnerussutisiallit siusinaartumillu soraarnerussutisiallit qulaani pineqartut inuuniarnermikkut tigusartakkaminnik imaluunniit boligsikring-imik ilanngartuunneqassanngikkunik saniatigut isertitsilaarsinnaanertik qanoq ilillugu atortariaqarneraat? nalunngilarpummi inuit taamatut inissisimasut ilaat aamma nammineersinnaanertik atorlugu ilaquttaminnut ikiuukkusunnermik pigisaqaannaratik aamma peqqissaatigalugu tamakkiisuunngikkaluartumik sulerusuttartut.
Ilanngullugu saqqummiutissuara; siusinaartumik sulisinnaajunnaarnersiuteqalersimasut ilaata artorsangaarluni imaattumik oqaluttuummanga; aapparmi isertitai najoqqutaralugit tigusartagamininnguani ikingaarmata, allaat qaammatip ingerlanerani ilaquttaminut ikiuukkusukkaluarnermut, siornatigut ileqqorisimanngikkaluakkani atortalersimangaluarlugu; tassa pisiniarfimmi tillinneq, pissutsit taamaattut akuersaarneqarsinnaanngillat iluarsisariaqarpullu. Inatsisit peqqussutillu suliarineqartariqarput; innuttaasunut inatsisaattuulersitsinngitsumik!
Ullormut oqaluuserisassat kiisalu ullut suliarineqarfissaat