04EM/01.25.01-99 Boligstøtte aqqutigalugu iluutillit aningaasatigut atugarisaannik Naalakkersuisut qaqugu oqilisaalersaarpat? (Enos Lyberth, Siumut)

9. august 2004                                                      UKA 2004/99

Inatsisartut Suleriaasianni § 36, imm. 2 naapertorlugu Naalakkersuisunut apeqqut imaattoq matumuuna saqqummiuppara.

Naalakkersuisunut apeqqut: Boligstøtte aqqutigalugu iluutillit aningaasatigut atugarisaannik Naalakkersuisut qaqugu oqilisaalersaarpat?

(Inatsisartunut ilaasortaq Enos Lyberth, Siumut)

Tunngavilersuut:

Nutaanngitsuunertik iluarsaanneqarsimannginnertillu pissutigalugu Boligstøtte aqqutigalugu illorpassuit aserfallassimasorujussuupput.

Avannaanut-, Kujataanut- Tunumullu paasisassarsiorluni angalanermi paasivara, pingaartumik inuit utoqqaanerusut Boligstøtte aqqutigalugu illuni najugaqartuusut. Utoqqarnut Boligstøtte aqqutigalugu najugaqartunut ajornartorsiutit annertupput, tassami iluarsaassinissanut; kiassaatinik, igalaanik, matunik il.il. taarsersuinissamut akilinissaminnut akissaqannginnamik. Aammattaaq assersuutigalugu utoqqaat ataatsimoorlutik najugaannut imaluunniit utoqqaat illuannut nuunnissaminnut periarfissaqarsinnaaneq ajorput.

Boligstøtte aqqutigalugu illuutillit qanoq aningaasatigut oqilisaavigineqarsinnaanerat pillugu, iluarsaassinissamullu pisariaqartitsinerup aaqqiivigineqarnissaa pillugu apeqqummut UPA 2004-mi Ineqarnermut, Attaveqarnermut Avatangiisinullu Naalakkersuisoq akissuteqarpoq. Ilaatigut Naalakkersuisoq ima akissuteqarpoq (UPA 2004/74):

Naalakkersuisut UKA 2004-mi illuliortiternermut tapersiisarneq pillugu Inatsisartut peqqussutaannut nutaamut siunnersuut ataatsimoortitaq nutartigarlu saqqummiutissavaat. tamatumunnga tunngatillugu eqqarsaatigineqarpoq akiligassanut akiitsullu sinnerinut akiligassanngorsimasunut isumakkeerinninnissamut isertitatigut killissarititaq maannakkut 128.000 kruuniusoq qaffanneqassanersoq.

UPA 2004-mi taamatut nutaamik Naalakkersuisut Inatsisartut peqqussutissaannik saqqummiussaqanngimmata Boligstøtte aqqutigalugu illuutillit aningaasatigut atugaat qaqugu aamma qanoq Naalakkersuisut oqilisaaviginiarneraat paasissutissiissutigineqassasoq kissaatigaara. Aammattaaq isumakkeerinninnissami akiligassat akiitsullu maannakkut isertitatigut killissarititasoq 128.000 kruuniusoq 180.000 kruuninut Naalakkersuisunit qaffanniarneqarnersoq paasissutissiissutigineqassasoq kissatigaara.

&nbs