02FM/01.25.01-47 Ineqarnermut tapussutinik aaqqissuussinerup atuutilerseqqinneqarnissaa pillugu aalajangiiffigisassatut siunnersuut. Mads Peter Grønvold
17. februar 2002 UPA 2002/47
Inatsisartut Suleriaasianni § 32 naapertorlugu Inatsisartut aalajangiiffigisassaattut siunnersuut:
Ineqarnermut tapiissutit pillugit malittarisassat siusinnerusukkut atuuttut atuutsilerseqqinneqarsinnaaqqullugit inissiani attartortittakkani ineqarnermut tapiissutit pillugit Inatsisartut peqqussutaata nr. 3-p, 31. maj 2002-meersup atorunnaarsinniarneqarnissaanik Naalakkersuisut peqquneqarnissat pillugu Inatsisartut aalajangiiffigisassaattut siunnersuut.
(Inatsisartuni ilaasortaq Mads Peter Grønvold, Kattusseqatigiit)
Taamatut siunnersuuteqarninnut tunngavigaara kingullermi ineqarnermut inatsit allanngortinneqarmat ineqartut akiliisinnaanerat innarlerneqartut ilaatigut oqartoqarsinnaammat.
Soolumi inatsit taamatut allanngortinneqarmat inissiani, illuinnarnilu najugaqartut akiliisinnaanerat ilaatigut innarlerneqarsimasoq, soorlumi tusagassiuutitigut eqqartorneqartoq inissiani najugaqartut ilaasa qaammammut ineqarnermut akiliutaat 25 %‑imik 40 %‑ip tungaanut ilaatigut qaffanneqartut.
Soorlumi aamma BSU‑p illuutaani najugaqartut tamanut eqqorneqartut, isumaqarpunga taamatut iliorsimaneq allanngortinneqartariaqartoq.
Ukiuni kingullerni inuiaat Kalaallit nunatsinni najugaqartut inuuniarnerat qiviaraanni takuneqarsinnaavoq ulluinnarni inuuniarnermi aningaasartuutit qaffakkaluttuinnartut, naak illuatigut innuttaasut ilaasa aningaasarsiat amerliartunngitsut, soorlumi aamma qaammammut aningaasanik tigusartagaqartut aningaasat tigusartagaat qaffakkiartortinneqanngitsut, naak illuatigut ulluinnarni inuuniarnermi aningaasartuutit qaffakkiartuinnartut.
Ulluinnarni inuuniarnermi aningaasartuutit qaffakkiartuinnarnerat isumaqarpunga Naalakkersuinikkut illuatungilerneqartariaqalersoq, soorlumi aningaasartuutit qaffakkiartortinneqarnerat malillugu aningaasarsiat, aammalu aningaasat pisortanit tunniunneqartartut eqqarsaatigalugit aningaasartuutit qaffakkiartornerat malillugu aningaasat tunniunneqartartut amerliartortinneqartariaqartut, soolumi ineqartut ineqarnermut akiliisinnaanerat innarlerneqartartoq ilaatigut aningaasat pisortanit tunniunneqartartut aningaasartuutit qaffakkiartorneranut malinnaatinneqartanngimmata.
Taarnatut oqaaseqarama ilaatigut pivakka, siusinaarlutik sulisinnaajunnaarnersiutillit, utoqqaat allallu taaneqarsinnaasut ukiuni kingullerni ilaatigut aningaasarsiat pillugit Pisortanut isumaqatigiinniartarnerni malinnaatinneqartarsimanngitsut eqqarsaatigalugit.
Nunatsinni aningaasarsiat pillugit isumaqatigiinniartarnermi Sulisartut assigiinngitsut Kattuffiisa ilaatigut ukiut marlukkaarlugit aningaasarsiat Pisortanut isumaqatigiinniutigineqartarput, taamaaliornikkut ineqarnermut, kallerup inneranut, kiassarnermullu akit ilaatigut qaffakkiartortinneqartarnerat aningaasarsiatigut malinnaavigitinneqartarmata.
Siusinnerusukkut oqaaserisakka eqqarsaatigalugit isumaqarpunga ineqarnermut, BSU‑llu, illuutaani najugaqartut pisortanit aningaasatigut tapiiffigineqartarnerat eqquteqqinneqartariaqartoq, malunnarmat inatsit atuisunut pitsanngitsumik kinguneqartitsilersimasoq.
Soorlumi inatsisip allanngortinneqarnerata kinguneranik takuneqarsinnaasoq assersuutigalugu Utoqqaat inissiani aammalu illuinnarni najugaqartut, inissianut naleqqutinnginnerusunut nuuttariaqalersimasut, ilaatigut ineqarnermut akiliisinnaanerat artukkerneqarmat, soorlumi aamma taamaaliornikkut ininut pitsaannginnerusunut pineqartut nuuttariaqalersimasut, ilaatigut inissiat pitsannginnerusumik akitigut unammillerneqarsinnaammata.
Soorlumi aamma Utoqqaat illuinnarni najugaqartut taamatut nuuttariaqalersimasut inatsisip allanngortinneqarnerata kingorna, isumaqarpunga taamatut inatsisip allanngortinneqarsimanera
iluarsineqartariaqartoq, tassani inatsit pineqartoq allanngortinniarneqarmat anguniarneqarpoq ilaatigut inuit akissakinnerusut illersorneqarnissaat, kisiannili sooq ilaatigut inuit pissakinnerusut taamatut maannakkut eqqorneqarpat?.
Taamatut oqaarseqarlunga neriuutigaara inatsit maannakkut atuuttoq Inatsisartunit ilaasortanit aammalu Naalakkersuisunit allanngortinneqarnissaa taperserneqarumaartoq.