02FM/01.25.01-49 Aningaaseriviit aqqutigalugit akileraarutinut akiitsunik akiliisarnissaq pillugu aalajangiiffigisassatut siunnersuut. Lars Karl Jensen.
26. februar 2002 UPA 2002/49
Inatsisartut Suleriaasianni § 32, imm. 1 naapertorlugu aalajangiiffigisassatut siunnersuut imaattoq matumuuna saqqummiuppara:
Aningaaseriviit sulisitsisutulli akileraarutitigut akiitsunik unerartitsinissamik peqquneqarsinnaasunngorlugit akileraartarnermi inatsisit allanngortinniarneqarnissaannut Naalakkersuisut peqqunneqarnissaannik Inatsisartut aalajangiiffigisassaattut siunnersuut.
(Inatsisartuni ilaasortaq Lars Karl Jensen)
Taamatut siunnersuuteqarneq tunngaveqarpoq, ukiuni arlaqalersuni akileraarutitigut akiligassallit ikiliartunngitsut ikilisarneqarnissaat suliniutigalugu Inatsisartutigoortumik aqqutissiuussisoqartariaqalermat.
Maannakkut innuttaasut akileraarutitigut akiligassaannik akiliisitsiniarnermi aqqutissaavoq suliffeqarfiit piumaffigineqartarlutik akiligassallip aningaasarsiassaaniit ilanngaassusisoqarnissamik.
Taamakkaluartoq maannakkumut malunnarpoq innuttaasut akileraarutitigut akiligassaat ikiliartunngitsut - sulisitsisut ilaasa akileraarutissanik unerartiteriarlutik piffissaanerani ilaannakuusimik akilii-sarnerat pissutiginerullugu.
Pisortanut akiligassaagaluit kinguartinneqartarnerat periarfissaavoq, ukiulli tamaasa nutaanik ilaartortuartillugit, pisortanut akiitsut ikiliartoratik ilaatigut ilaqqiinnarneqartarnerat akiligassat amerlatikkaluttuinnarnerannik kinguneqartartoq.
Akiitsut ikilisinniarlugit periarfissaq nunatsinni suli atulerneqanngitsoq Savalimmiormiut atulereerpaat tassalu akiligassallit aningaaserivik (bank) sullissisuat pisortaniit toqqaannartumik attavigalugu, akiligassallip akiligassaanik akilersuisitsineq ingerlanneqartarluni.
Tamatuma nunattinni periarfissatut atugaalernissaanik aqqutissiuinissamik periarfissarsiuussinissamik Naalakkersuisut peqquneqarnissat matumuuna oqaluuserisassanngortippara.