02FM/01.25.01-51 Piniarneq aallaaniarneriu pillugit Inatsisartut inatsisaata allanngortinneqarnissaa pillugu aalajangiffigisassatut siunnersuut. Lars Karl Jensen
26. februar 2002 UPA 2002/51
Piniarneq aallaaniarnerlu pillugit Inatsisartut inatsisaanni nr. 12-imi, 29. oktober 1999-imeersumi § 8-ip oqaasertaasa, § 8-imi aalajangersakkat allanngortinneqarnerinut atasumik Aalisarnermut, Piniarnermut Nunalerinermullu Ataatsimiititaliamik aamma Eqqissisimatitsinermut Avatangiisinullu Ataatsimiititaliamik, taakkulu saniatigut Piniarneq pillugu Siunnersuisoqatigiinnik, tusarniaanissarnissamik Naalakkersuisut pisussaaffilerneqarnissaat pillugu Inatsisartut aalajangiiffigisassaattut siunnersuut.
(Inatsisartuni ilaasortaq Lars Karl Jensen)
Taamatut siunnersuuteqarneq tunngaveqarpoq, Namminersornerullutik Oqartussat nalunaarutaanni nr. 38, 6. December 2001-imeersukkut timmissat illersorneqarnerat pillugu aalajangersagaliornikkut atuisut paasiniaaffigeqqaarnagit, allaat sumiiffiit ilaanni innuttaasut pisinnaatitaanerannik mat-tussinertut ilusilikkamik aalajangersagaliortoqarnera akuerineqarsinnaanngimmat.
Timmissat pillugit Naalakkersuisut nalunaarutaat kingulleq malillugu, mitit appallu piniagaasarnerannut piffissaq piniarfiusinnaasoq 15.septemberimiit 15.februarimut killiliineq nunatta ilaani sikusartumiittunut piniarsinnaanermik mattussilluinnarpoq.
Allaat nalunaarut oqaasertaqartariaqaraluarluni “sikusartumiittut kingorna timmissanik taakkuninnga nereqqissanngitsut”.
Timissat illersorneqarnissaat pillugu aalajangersagaliortoqartarnissaa pissusissamisoorpoq, eqqaamasariaqarporlu nunarput iserartoqimmat pinngortitallu pissusiata aqutsinera malillugu timmissat ilaasa sumiiffinni assigiinngitsuni piniagaasarnerat assigiimmik peqqususiornikkut aalajangersagaliuunneqarsinnaanngimmat.
Siunnersuutigaara, inatsisip aalajangersagaliornermi toqqammavigineqartup tassalu Inatsisartut Inatsisaata nr. 12, 29.oktober 1999-meersup §-ni 8-mi oqaasertaliussat - “ Naalakkersuisut piniarnerup aallaaniarnerullu malittarisassatigut aqunneqarnerat pillugu iliuuseqarsinnaapput, taamatuttaaq makkua pillugit malittarisassiorsinnaallutik-mik oqaasertallip” allannguuteqartinneqarnissaat, imatut oqaasertalerlugit: Naalakkersuisut piniarneq aallaaniarnerlu malittarisatigut aqunneqarnerat pillugu malittarisassiorsinnaapput Piniarneq aallaaniarnerlu pillugu siunnersuisoqatigiit taamatullu Inatsisartut Piniarnermut Aalisarnermut Nunalerinermullu kiisalu Eqqissisimatsitinermut Ataatsimiititaliaat tusarniaaffigeqqaarlugit,.
Taakkuummata nunarput ataatsimut isigalugu atuisut paaseqatigalugit piniakkallu piujuartinneqarnissaannik siunertaqarlutik innuttaasut sinnerlugit inatsisiliornikkut nalilersuisartut.
Siunnersuutigisara inatsisartuni taperserneqassappat aamma pissusissamisuussaaq - timmissat pillugit nalunaarutip nr.38, 06.december 2001-meersup aaqqiivigineqarnissaa pillugu ataatsimiititalianut susassaqarrtut suliakkiutigineqarnissaa. Taamaaliornikkut sikusartumiittut mattussaanerat iluarsiivigineqassammat.
Taamatut oqaaseqarlunga Inatsisartut inatsisaata siuliani taasama allanngortinneqarnissaanik siunnersuut oqaluuserisassanngortippara.