02FM/01.25.01-54 Ilinniagaqartut allallu kommunip angerlarsimaffigisamik avataaniittut qinersinernut atatillugu allakkat nassiunnerannut akiliuteqaratik... Olga Poulsen
1.marts 2002 UPA 2002/54
Inatsisartut suleriaasianni § 32 naapertorlugu aalajangiiffigisassatut siunnersuut tulliuttoq saqqummiuppara:
Inatsisartunut aalajangiffigisassatut siunnersuut, ilinniagaqartut allallu kommunip angerlarsimaffigisamik avataaniittut qinersinernut atatillugu allakkat nassiunnerannut akiliuteqaratik allakkatigut qinersisinnaatitaanissaannik Naalakkersuisut peqquneqassasut sulissuteqaqqullugit.
(Inatsisartuni ilaasortaq Olga Poulsen)
Siunnersuummut tunngavilersuutigaakka:
Innuttaasut qinersisinnaatitaasut, kommunip angerlarsimaffigisamik avataaniittut, malittarisassat atuuttuusut naapertorlugit kommunimi najugaqarfigisaminni inuit aqqisa allattorsimaffianni qinersisinnaatitaapput. Qinersinermi taasivik immersorneqarsimasoq kommunimut angerlarsimaffigisamut nassiunneqartussaavoq, tamatumalu isumagineqarnissaa qinersisartumut namminermut isumagisassanngortinneqartarpoq, taamaasillunilu taanna allakkat nassiunnerinut aningaasartuuteqalertariaqartarluni.
Immaqa frimærkimut aningaasartuut annertugisassaanngikkaluartoq, tunngaviusumik isuma-qarpunga, innuttaasut qinersinerni inuit tamat oqartussaaffeqarnerini piginnaatitaaffimminnik taasinermikkut atuerusuttut, aningaasartuuteqaratik taamaaliorsinnaatitaasariaqartut.
Taamaattumik siunnersuutigaara, allakkatigut qinersinerni allakkat nassiunnerinut aningaasar-tuutit kommunimit angerlarsimaffigisamit, imaqaluunniit Namminersornerullutik Oqartussanit akilerneqartassasut. Qinersinermut atatillugu aningaasartuutit, soorunalimi - qinersisartuunngitsumit - pisortani oqartussanit akilerneqartariaqarput
Allakkatigut qinersinerit nassiunneqarnerisa akeerutsinnerisigut aamma neriunarsinnaavoq ilinniagaqartut allallu, qinersinerup nalaani kommunip angerlarsimaffigisami avataaniittut qinersinernut peqataanerusalernissaat.
Tamat oqartussaaqataanerani soqutigisariaqarpoq, qinersinerni tamani qinersinermut peqataasarnerup sapiginngisamik annertunerpaanissaa. Taamaattumik t aamaasiornissamut akornutaasinnaasut peerneqartariaqarput.
Siunnersuutiga annikitsuaraannarnik Landskarsimut aningaasartuutaasussaavoq, soorluttaaq naatsorsuutiginngikkiga, siunnersuut allaffissornikkut pingaarutilinnik kinguneqassasoq. Taamaattumik neriuutigaara, Inatsisartut siunnersuut akuersaartumik suliarissagaat.