02FM/01.25.01-60 Kalaallit kuisinneqarnerminni atertaartinneqarnerminnilu kalaallisut taaguuserlugit siunissami atserneqartalersinnaanerat periarfissinniarlugu... Per Rosing-Petersen
2. marts 2002 UPA 2002/60
Kalaallit Nunaanni Inatsisartut Suleriaasianni § 32, imm. 1 naapertorlugu matumuuna imaattumik aalajangiiffigisassatut siunnersuuteqarpunga:
Aqqit kalaallisuujunngitsut, assersuutigalugit aqqit bibelimeersut, kalaallisuunngorlugit atorneqartartut allattorsimaffimmut ilanngunneqarsinnaaqqullugit aqqit siuliaqutitut kalaallisuut akuerineqartut allattorsimaffiata allanngortinneqarnissaanut Naalakker-suisut Oqaasiliortunut peqataaqqullugit kaammattuuteqaqquneqarnissaannik Inatsisartut aalajangiiffigisassaattut siunnersuut. Peqatigalugulu Naalakkersuisut kisitsit 20-imiit qummut kalaallisut taaguuserneqarnissaannut siunnersuummik saqqummiussinissamut Oqaasiliortunut kaammattuuteqaqquneqassasut.
(Per Rosing-Petersen)
Atinut tunngatillugu aallaavigilluarsinnaavarput maani ataatsimiittarfimmi ataqqinninneq aallaavigalugu immitsinnut taagaagatta atigut tamaasa taagaagatsigit taaguilluarluta allamiut uanilu danskit taaguutaat toqqammavigalugu atinik taakkartuisarpugut. Assersuutigalugu Kuulumaat Godmand-imik taasarparput, Annassi Anders-imik taasarparput, Piinia Benjamin-imik taasarparput, Makkak Margrethe-mik taasarparput, il. il. tamannalu oqaatsitta immikkuullarissuisanut naleqqutinngilaq. Sumiluunniit nunani allani atersiat oqaaserisat immikuullarissusaat naapertorlugu naleqqussarneqartarput, spaaniamiusuuppat, tuluttuuppat sumiuugaluarunilluunniit. Nunatsinnilu atersiarpassuaqarpugut biibilimiit tigusatsinnit imaluunniit nunani avannarlerniit tigusatsinnit tamakkulu piffissanngorpoq aamma inuiattut oqaatsitsinnut ataqqisassatsinnut naleqqussassallugit.
Qangalimi pissuseq atuuttoq pisortagoortumik akueralugu aaqqiivigisariaqalerparput.
Kisitsisit:
Aamma inuiattut kinaassusitsinnut naapertuutinngittumik kisitsisit danskiniit tiguinnakkagut atortualernikuuagut uffa ajornanngiivittumik nunatsinni kisitseriaaseq eqqussinnaagaluarlugu.
Assersuutigalugu kisitsit 36 ( seks og tredive ) kalaallit oqaasii toqqammavigalugit taasinnaagaluarlugu qulit pingasut arfinillilu, 63 - qulit arfinillit pingasullu, taamannallu untritillit tungaanut nangissinnaagaluarluta soorlu oqaluffimmi ( biibili tunngavigalugu ) qangali tamanna atorneqartoq.. Untritillit marluk ( 200 ), pingasut, sisamat il. il tuusintit tungaanut aammalumi miliuunit, miliartillu ilanngullugit aaqqiivisinnaallugit.
Utoqqatsittissutigineqartartoq kalaallisunngooq oqaatsivut atorlugit kisitsissagutta pisariual-laassaqaaq takivallaarlunilu apeqqutaaginnartutut isigaara sungiussinissaq, qimerluualaaraannimi danskisut oqaasersiatsinniit takingaarnerusariaqanngillat. Assersuutigalugu 1.478 danskisut: et tusinde fire hundrede otte og halvfjers kalaallisut: tuusiintit ataaseq untritillit sisamat aamma qulit arfineq marluk arfineq pingasullu. Ilaallu ilanngullugit.
Oqaasiliortunik naapertuussaasoqarsinnaavoq kisianni maannagaaq pisariaqarluinnalerpoq uagut inuiattut nammineq oqaatsigut atorlugit atit qulaani taaneqartut kinaassusitsinnut naapertuus-sagaanissaat taamatuttaarlu aamma kisitsisaatigut.