02FM/01.25.01-62 Meeqqanut inuusuttunullu Ilulissaniittunut atuarfimmik ilinniarfimmik sanaartornissaq pillugu aalajangiiffigisassatut siunnersuut. Anthon Frederiksen

03. marts 2002                    UPA 2002/62

Kalaallit Nunaanni Inatsisartut Suleriaasianni § 32 naapertorlugu matumuuna aalajangiiffigisassatut siunnersuut imaattoq saqqummiuppara:

Meeqqanut inuusuttunullu Ilulissani ¿Sungiusarfik Ikinngummi¿ najugaqartunut naleqquttumik atuarfiliortoqarnissaanik atuartinneqarnissaannullu periarfissiisoqarnissaanik sulissutiginninnissamut Naalakkersuisut Inatsisartunit peqquneqarnissaannik Inatsisartut aalajangiiffigisassaattut siunnersuut.

(Inatsisartuni ilaasortaq Anthon Frederiksen)

Naluneqanngitsutut Naalakkersuisut anguniangaannut ilaavoq innarluutillit sapinngisamik  Nunatsinniitiinnarnissaat aammalu kalaallit innarluutillit Danmark-imiit Nunatsinnut uterartinneqarnissaat.

Taamaammallu aamma qujanartumik innarluutilinnut angerlarsimaffiit assigiinngitsut ukiuni kingullerni Nunatsinni sanaartorneqarsimapput, soorlu assersuutigisinnaavarput ¿Sungiusarfik Ikinngut¿ Ilulissaniittoq.

Kisianni ajoraluartumik puigorneqarsimasunut ilaapput; inunnguit taakkua timimikkut eqqarsartaatsimikkullu innarluutillit atuartinneqarlutillu ilinniartinneqarfissaannik periarfissiisoqarnissaq.

Nalunngilarput Nunatsinni nalinginnaasumik meeqqat atuarfiinik sanaartornerit Namminersornerullutik Oqartussat aningaasaliiffigisaraat, soorunami aamma meeqqat inuusuttuaqqallu timimikkut eqqarsartaatsimikkullu innarluutillit atuarfeqartinneqarnissaat Namminersornerullutik Oqartussat aamma isumagisassaannut ilaapput.

Taamaakkaluartoq Ilulissat kommuniata ullumikkut ukiunilu kingullerni pingasut missaannik kommunimut katillugit 1.375.000.- kr.inik aningaasartuuteqarfiusumik ukiunut tallimanut inuusuttuarannguit timimikkut eqqarsartaatsimikkullu innarluutillit Ilulissat kommuniata avataaneersut Ilulissani Quersuup allaffeqarfikuani, inunnguanut taakkununnga naleqqutinngilluinnartumik atuartinneqarput.

Ininik attartorneq Ilulissat kommuniata aningaasartuuteqarfigisaa ukiut marlut missai qaangiuppata taamaatinneqartussaq naappat, inuusuttuarannguit taakkua innarluutillit ilinniartinneqarnissaminnut periarfissaarutsinneqartussaapput.

Oqallilluarisi.