02FM/01.25.01-72 Uummannap eqqaani Qaarsuni oqaluffiliornissaq pillugu aalajangiiffigisassatut siunnersuut. Mikael Petersen

4. marts 2002                     UPA 2002/ 72

Inatsisartut Suleriaasianni § 32, imm. 1 naapertorlugu aalajangiiffigisassatut siunnersuut imaattoq saqqummiuppara:

Uummannap Kommuniani Qaarsuni oqaluffiliornissap 2003-mi aningaasanut inatsisissami ilanngunneqarnissaanik Naalakkersuisut suliniuteqaqquneqarnissaannik Inatsisartut aalajangiiffigisassaattut siunnersuut.

(Inatsisartuni ilaasortaq Mikael Petersen)

Nunaqarfik Qaarsut ukiuni kingullerni 20-inngortuni namminerisaminik oqaluffeqanngilaq, meeqqallu atuarfiata atuartitsivittut iniisa ilaat naalagiarnermut atorneqartarluni, naak meeqqat atuarfiat ullumikkut atuartitsivissaaleqillunilu iluarsaanneqarnissaminik pisariaqartitsigaluaqisoq.

Qaarsut nunaqarfiuvoq inukilliartorani inuttusiartortoq minnerunngitsumik suluusalinnut mittarfeqalernermi kingorna ineriartortuarnissaminut periarfissaqarluartoq.

Qaarsuni amingaataasut malunnaateqarnerpaat ilagaat nunaqarfik namminerisaminik oqaluffeqannginnami naak qanga oqaluffeqartuarsimagaluarluni.

Siunnersuutigaara Qaarsuni nunaqarfimmut naleqquttumik pilersaarusiorluagaasumillu oqaluffiliortoqassasoq taamaalilluni meeqqat atuarfianni naalagiartarneq atuarfimmilu inagiisimajuarneq atorunnaarneqarsinnaaqqullugit, aammalu Qaarsuni ilagiit ilagiinnilu sullissisut atugarisamikkut malunnaatilimmik pitsanngorsaaffigineqarsinnaaqqullugit.