02FM/01.25.01-82 Utertunut tunngasumik iliuusissatut pilersaarusiortoqarnissaa pillugu aalajangiiffgisassatut sunnersuut. Asii Chemnitz Narup
5. marts 2002 UPA 2002/82
Inatsisartut suleriaasianni § 32 innersuussutigalugu matumuuna qinnuteqaatigaara aalajangiiffigisassatut siunnersuut una Inatsisartut upernaakkut 2002-mi ataatsimiinneranni oqaluuserisassanut ilanngunneqassasoq:
Inatsisartut aalajangiiffigisassaatut siunnersuut toqqammavigalugu Naalakkersuisut peqquneqassasut siunissami puiguttortunut ikiorsiissutinik pilersitsinissamik pisariaqartitsinerup qanoq annertutigineranik qulaajaaqqullugit. Pisariaqartitsisutut/-sussatut eqqarsaatigineqarput puiguttortut puiguttortunngoriartortullu. Pisariaqartitsinermik qulaajaanermi siunertarineqassaaq ikiorsiissutit pisariaqartinneqartut ineriartortinnissaasa pilersaarusiornissaat.
(Asii Chemnitz Narup, Inuit Ataqatigiit)
Peqqinnissaqarfiup isumaginnittoqarfiullu iluanni atorfillit, ilinniakkamik misilittakkannillu tunuliaqutarissaartut, qaammatini kingullerni erseqqissaatigisarpaat nunaqqatigiit akunnitsinni inuit puiguttortut taamaaliartulersulluunniit amerlartuinnarnerat.
Innuttaaqataasut akornanni puiguttortut immikkut ittumik paaqqutarineqarnissamik isumassorneqarnissamillu ulluinnarni pisariaqartitsisuupput. Taamatuttaaq pisariaqartippaat immikkut ittumik sungiusarneqarnissartik piginnaasat nalinginnaasut/tunngaviusut ilaat attatiinnarnissaat siunertaralugu. Pisariaqartitsinerup qanoq annertutiginera inummit inummut nikerarpoq, apeqqutaallunissaaq pineqartup puiguttornerata qanoq annertutiginera. Puiguttortunik sullissisut immikkut ikiorsiisinnaanissamik sungiusarneqarsimasuusariaqarput.
Inuit Ataqatigiit isumaat naapertorlugu ilisimaleriikkat siulittuutillu tusaanngitsuusaarneqarsinnaasorinanngillat.
Taamaattumik Naalakkersuisut inussiarnersumik qinnuigisariaqarput makku isumageqqullugit:
1) qulaajaqqullugu inuit qassit, puiguttornertik pissutigalugu, maannakkorpiaq immikkut ittumik ikiorserneqarnissamik pisariaqartitsinersut,
2) inuit taakku ullutsinni pisariaqartitaminnut naleqquttumik ikiorserneqartarnersut kiisalu 3) pisariaqartitsinerup siunissami qanoq annertutigilerumaarnera misissoqqullugu.
4) Qulaajaalluni misissuinermut ilanngullugu misissorneqartariaqarpoq puiguttortunut ikiorsiineq naleqqunnerpaaq neqeroorutigineqarsinnaassappat illutatigut piumasaqaatit suut naammassineqartariaqassanersut. Taamatuttaaq apeqqutit sulisoqarniarnermut ilinniakkatigullu tunuliaquttatut piumasaqaatinut tunngasut misissorneqartariaqarput.
Kommunit KANUKOKA-lu suleqatiserissallugit pissusissamisoorpoq. Peqqussutitigut maleruagassat, maannaa atuuttut, periarfissiipput inunnut pineqartunut kommunikkuutaartumik nunalu tamakkerlugu atuuttussamik angerlarsimaffiliornissamut. Taamaalilluni pilersaarusiornissamut aallaavissaq immini eqaatsuuvoq. Apeqqutit pisariaqartitsinermut tunngasut aammalu kommunit aningaasaqarnikkut pisinnaasaannut tunngasut siunissami ikiorsiissutinik ineriartortitsinissamut isumaliutersuuteqarnermi ilanngunneqarsinnaapput.
Pissusissamisoorpoq pilersaarusiornissami nalilersussallugu utoqqaat illui pioreersut annikitsunnguamik allanngortitsernerisigut inunnut pineqartunut pisariaqartitaannullu qanoq naleqqutunngorsarneqarsinnaanersut - assersuutigalugu utoqqaat illui talullugit iluarsaannerisigut, sanaartornermut aningaasartuutit amerlasuupilussuit atunngikkaluarlugit.
Inuit puiguttornermik eqqorneqartut taakkulu ilaqutaasa inuuneriligaannut sunniuteqaqataasarpoq avatangiisit qisuariarnerat isiginninnerallu, taamaattumik Naalakkersuisut maannangaaq eqqarsaatersorfigilereertariaqarpaat qaarmarsaanerit qanoq ittut ingerlanneqartariaqarnerat nunaqqataasut eqqaamiullugu ikorfartuisinnaanissaat angujumallugu.