02FM/01.25.01-84 Nunatsinni nunat immikkoortui ataasiakkaat peqatigiillutik suleqatigiillutillu inuussutissarsiornermik siuarsaanissaat ... Maliinannguaq Markussen Mølgaard
4.marts 2002 UPA 2002/84
Kalaallit Nunaanni Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:
Nunatsinni nunat immikkoortui ataasiakkaat peqatigiillutik suleqatigiillutillu inuussutissarsiornermik siuarsaanissaat siunertaralugu nunap immikkoortuini ataasiakkaani tamani ataqatigiissaarisutut atorfimmik ataatsimik allatsitullu atorfimmik ataatsimik pilersitsisoqarnissaata 2003-mi aningaasanut inatsimmi ilanngunniarnissaanut Naalakkersuisut peqquneqarnissaannik Inatsisartut aalajangiiffigisassaattut siunnersuut.
(Inatsisartuni ilaasortaq Malînánguaq M. Mølgaard, Inuit Ataqatigiit)
Piffissami kingullermi pisut takutippaat nunatsinni inuussutissarsiutitigut ineriartortitsinissaq qanoq nukinginnarlunilu pisariaqartigisoq. Aalisarnermi pingaarnertut inussutissarsiutigitillugu akit peqassuserlu apeqqutaalluinnartarput, taamaalillunilu arlaannaalluunniit kalluarneqaraangat
inuiaqatigiit mikinngitsumik eqqorneqartarlutik.
Nioqqutissat avataaniit tikisitarpassuupput, ilami ulluinnarni atukkagut tamangajalluinnaasa tikisittarpagut. Tikisittakkatta ilaannaaluunniit imminut pilersornermut nuussinnaagaluarutsigit
aningaasat aniaanaannartut nunatsinni kaaviialissagaluarput, suliffiillu pilersinneqarlutik Nunarput imminut aningaasatigut napatissinnaalissappat pimoorussamik oqaasiinnaangitsumillu
pilersaarusiorlunilu aaqqissuussinissaq pisariaqavissorpoq.
Qeqertarsuup Tunuani kommunit suleqatigiiffiata inuussutissarsiornermut ataatsimiititaliaata ukiualuit qaangiuttut Sulisa peqatigalugu pilersaarusiorput, kommunit tamarmik akueralugu suleqataaffigerusutaannik. Tassanilu siunertaavoq kommunit inuussutissarsiornermi siuarsaanermi imminnut unammilleratik suleqatigiilernissaat, ataatsimullu siunnersuisoqatigiiliornermikkut
aaqqissuussamik nammaqatigiilluni ineriartortitseqatigiinnissaat.
Taamatut kommunit immikkoortuini ataatsimoorussamik suleqatigiilluni ineriartortitseqatigiiffimmik pilersitsinikkut, unammillerani ikioqatigiillunili pilersaarusiornissaq anguneqarsinnaavoq. Kommunit inuussutissariornermik siunnersuisui suleqatigiillutik ikioqatigiillutillu qitiusumik Sulisa suleqatigalugu allaffeqarfeqarnikkut siunnersorluarneqarlutillu kaammattoqatigiissinnaapput.
Nunap immikkoortuini kommunit inuussutissarsiornermi siunnersuisui ukiumoortumik naapeqatigiillutillu pikkorissaqatigiittarsinnaapput, pilersaarutitillu saqqummiullugit. Ukiumoortumik nunap immikkoortuini kommunikkaartumik nioqqutissiarineqartalersimasut sinerissami angalaartumik saqqummersittarsinnaavaat, taamalillunilu pisisussanut neqeroorutigalugit. Katalog-ilioqatigiittoqarsinnaavoq, ilami nukut atorluarnerisigut nunatsinni inuussutissarsiorneq eqqarsaataannaanani ineriartorsinneqarsinnaavoq.
Eqqarsaat kusanartoq taanna maanna aningaasanik aporfeqarluni uninngaannarpoq. Ullumikkut
kommunit aningaasatigut inissisimanerat assigiinngeqaaq, amerlaqaallumi naammattusaaralutik
ingerlaniarsarisut. Taamaattumik immikkut aningaasaliinissaq ilaannut killeqartorujussuuvoq, ilaatigut inoqassuseq malillugu aningaasaliissuteqartoqassanersoq imaluunniit kommunit tamarmik assigiimmik aningaasaliissuteqassanersut aporfigineqarsimalluni.
Aallaqqaammut siunnerfigineqarsinnaavoq Namminersomerullutik Oqartussat nunap immik-koortuini ataqatigiissaarisumik allatsimillu ataatsimik atorfinitsitsinissat aningaasaliiffigissagaat, kommunillu allaffissornertaa kattullutik aningaasaliiffigissagaat
Isumaqarpugummi isuma siunissami inuussutissarsiornerup siuarsarnissaanut pingaaruteqartoq,
pilersaarusiornerup aallarnisarnerani Namminersornerullutik Oqartussat peqataallutillu kaammattueqataasariaqartut. Pilersaarusiornermi Sulisa A/S, KANUKOKA, kommunit immikkoortuini suleqatigiiffiit, Inuussutissarsiornermi Pisortaqarfik, namminersortutullu ingerlataqartut suleqatigiissinnaapput. Nukiit suulluunniit atorluartariaqarput, immikkummi pilersaarusiorluni oqaluinnartarnerit naammalerput, ukiorpassuarnilu eqqartorneqartartut timitalimmik pimoorussamillu piviusunngortinnissaat pisariaqalivissorluni.
Aalisarneq ajornartorsioraangat pisariaqartitsineq aallaavigalugu aningaasaliisoqartarpoq, isumaqarpungalu maanna pisariaqarluinnalersoq, nunami suliffissat pilersinniarlugit pimoorussamik pilersaarusiortoqarlunilu aningaasanik immikkoortitsisoqartariaqartoq.
Taamaattumik siunnersuutigaara kommunit suleqatigiikkaat inuussutissarsiornermi pimoorussamik siuarsaanissaannut, nunap immikkortuinut ataasiakkaanut, ataqatigiissaarisumik 1-mik allatsimillu ataatsimik atorfinitsitsinissamut immikkut 2003-mut aningaasaliinissaq siunertaralugu aalajangiisoqassasoq, qanorlu annertutiginissai ukiamut ataatsimiiinnissap tungaanut misissorneqassasut.