02FM/01.25.01-92 Kujataani containennut umiarsualiviornissap aningaasanut inatsimmut ilanngunneqarnissaa pillugu aalajangiiftigisassatut siunnersuut. Tommy Marø

04. marts 2002 UPA 2002/92

Kalaallit Nunaanni Inatsisartut Suleriaasianni § 32 naapertorlugu aalajangiiffigisassatut siunnersuut imaattoq matumuuna saqqummiuppara:

Kujataani Atlantikoq ikaarlugu containerersorluni umiarsuarnut talittarfiliornissap 2003-mi aningaasanut inatsisissamut ilanngunniarneqarnissaanik Naalakkersuisut peqquneqarnissaat pillugu aalajangiiffigisassatut siunnersuut.

(Inatsisartunut ilaasortaq Tommy Marø)

Ukiuni arlalissuarni ilisimavarput nunatta kujataani umiarsualiveqarnikkut ajornartorsiuteqartoqarnera. Taamaattumik isumaqarpunga piffissanngortoq umiarsualiveqarnikkut nunatta kujataani ajornartorsiutip aaqqinnissaanut iliuuseqarnissaq.

Ukioq kingulleq kujataani kommunit peqatigiifiata aaqqissuussaanik Narsarsuarmi pisumi isumaqatigiissutigineqarpoq Atlantikoq ikaarlugu containerersorluni umiarsuarnut talittarfiliornissaq anguniarneqassasoq Qaqortup Narsallu akornini.

Aammattaaq ilisimaneqarpoq nunatta kujataani umiarsuliveqarnikkut ajornartorsiuteqartoqarnera

pillugu inuussutissarsiutitigut inerisaaniarneq annertuumik killilersorneqartoq.

Tassunga atatillugu taaneqaannarsinnaavoq kilisaatini tunisassiat avammut ingerlateqqitassat tunumiit nunattalu kujataaniit Nuummut ingerlateqqaarneqartarneri, ingerlatsinermut akisoqisumik.

Siunissaq ineriartornerlu siumut isigisoq politikkiliullugu suliniarnerput illineqassappat siusinnerusukkut taakkartorneqartartoq, tassalu Frihavn-imik pilersitsinissaq qulaanni pineqartumut ilanngullugu pilersaarusiornermut nalilersuutitut ilanngutassatut piukkunnarluinnarpoq.

Neriuutigaara nunarput ataatsimut ineriartortinnissaa siunnerfigalugu nuna tamakkerlugu politikkerit nunatta kujataani umiarsualiveqarnikkut aammalu inuussutissarsiutitigut inerisaaniarnermut tapersiiumaartut.