02FM/01.25.01-94 Pisortat inissiaataasa attartortittakkat angissusilerneqarnissaanni oqartussaassutsip Inatsisartunut uterteqqinneqarnissaa pillugu aalajangiiffigisassatut... Josef Motzfeldt

4. marts 2002 UPA 2002/94

Inatsisartut suleriaasianni § 32 naapertorlugu Inatsisartut aalajangiiffigisassaattut siunnersuut:

Inissiat Namminersornerulluni Oqartussat sulisuinut aamma nalinginnaq attartortittakkatut naatsorsuussat, pisortanit pigineqartut, qanoq angissusilerneqartarnerat Inatsiartuni aalajangiivigineqaqqaartassasumik siunnersuut.

(Inatsisartuni ilaasortaq Josef Motzfeldt)

Sanaartornerup ingerlasimaneranut nassuiaammut uiggiullugu oqaluuserineqarsinnaavoq.

Ukiut amerlanngitsut -1990-ikkut qiteqqunneranni- inissiat marlunnik initalinnik pisakkavut 45 kvm missaannik angissuseqartut ullumikkut ukioq 2002 70 kvm qaangerlugit angissusilerneqartalersimapput. Suna toqqammavigalugu aamma kimit/kikkunnit tamanna aalajangerneqarsimanersoq Inatsisartunit aamma Inatsisartut allattoqarfiannit ilisimaneqanngilaq.

Aningaasat aningaasanut inatsisikkut atugassiissutigineqartartut amerliartunngillat. Taamaakkaluartoq siuliani assersuutitut taaneqartup takutippaa aningaasat killeqaleriartornerannut naa-pertuutinngitsumik soorlu sanaartornermi ingerlatsisoqartoq. Aammami Atuarfitsialaap illutaasa qaffasissusilerneqarsimanerannut taamaappoq.

Taamaattumik kissaatigaarput naalakkersuisut periuseq atugartik Inatsisartunut nassuiaateqarfigissagaat. Tamatumunngalu uiggiullugu Inatsisartunit oqaluuserineqartariaqarpoq aalajangiisarnerit Inatsisartut susassaqarfigilluinnagaat taamaattut aatsaat atuutsilersinneqartassasut Inatsisartuni oqaluuserineqareernerisigut.