02FM/01.25.01-86 Pinngortitamik illersuinermi inatsisit pillugit apeqquteqaat aallaavigalugu oqallinnissamik siunnersuut. Ruth Heilmann
4.marts 2002 UPA 2002/86
Kalaallit Nunaanni Inatsisartut Suleriaasianni § 35 naapertorlugu siunnersuummik imaattumik saqqummiussivunga:
Kalaallit Nunaannut Pinngortitamik illersuinissamik inatsisiliornissaq pillugu apeqquteqaat aallaavigalugu oqallinnissamik siunnersuut, tassungalu ilanngullugu Kalaallit Nu-naannut Pinngortitamik illersuinissamik inatsisiliariniagaq pillugu pilersaarutit, taassumalu pingaarnerusutigut imarisassaasa, Naalakkersuisunit aamma Peqqinnissamut Avata-ngiisinullu Naalakkersuisumit nassuiaatigineqarnissaat.
(Inatsisartuni ilaasortaq Ruth Heilmann)
Apeqquteqaat aallaavigalugu inatsisartuni oqallisissiaq.
Pinngortitap illersornissaanut inatsisissap pipallataanngitsumik suliarineqarnissaa pisariaqarluinnartuuvoq. Tamanna pillugu anguniarlugulu Naalakkersuisut qanoq periuseqarniarpat?
Timmissanut nalunaarusiap suliarineqarsimaneratut amigartumik pipallatamillu tusarniaalluni iliuuserisat misigineqaqqissanngippata taava qanoq siunissami periuseqalertoqassava?
Assersuutigalugu Timmissanut ileqqoreqqusap Avanersuarmi inuutissarsiutaannut appaliarsunniarnermut sunniutissai inuinit naammagineqanngillat, ilami inuuniutaannut nerisarisartagaannullu
eqquingaatsiartussaammat tupinnanngitsumik tamanna inuisa nikussaarutigaat.
Naalakkersuisunut pisinnaatitsissut tunniunneqartoq qanoq nutarterneqassava? Tusarniaasarnissami nutarterinissaq pisariaqartutut erseqqissumik innuttaasunik piniarnermillu ingerlataqartunik inuuniuteqartunillu piumasarineqarpoq. Piniakkanut eqqissisimatitassanut tunngatillugu assortuunnerujussuarnik pilersitsisoqartassanngippat paaseqatigiinnikkut imminut oqaloqatigiilluarnikkut piareersarluarnikkullu ingerlasoqarnissaa pisariaqarluinnartuuvoq.
Nalunngilarput piniarneq nunatsinni kultureralugu inuutissarsiutitullu isigalugu ukiorpanni inuisa inuuniutaanni pingaarnerpaatinneqartuartoq, ullumimullu suli tamanna attanneqarluni, ilami inuutissarsiornikkut allatigut suli periarfissiisoqanngilaq, taamaattumik maani nunatsinni eqqissisimatitsinermut alloriarniarneq mianernarluinnartuusussaavoq. Eqqissisimatitsinermut inatsisiliornissami kalluagassat killilersuinialertoqartillugu piniartut inuillu isumaasa tusaaniarne-
qarnissaat paasisinniarneqartarnissaallu pingaarnerpaavoq. Tamanna inuit pisinnaatitaaffigaat inuussutigisaannik eqquisuummat.
Piniarneq pillugu 1998-imi Katuami isumasioqatigiittoqarnerani kommunit aamma aqutseqataanissaminnut annerusumik periarfissinneqarnissamik ujartuinerat tusaaniarneqarumavoq malinniarneqarumallunilu. Taavami kommunit KANUKOKA tassuunakkut qanoq inissisimatinneqassava? Aamma taamanikkut piniarnermut siunnersuisoqatiginnik pilersitsisoqarpoq Pinngortitaleriffimmik Avatangiisinullu pisortaqarfimmit Naalakkersuisunillu pisariaqartinneqarmat qanimut suleqatigisassatut, aammalu tapertaralugu piniarnermik peqatigiiffiit tusaaniarneqarnissanut peqataatinniarneqarput. Minnerunngitsumillu inatsisartuni eqqissisimatitsinermut avatangiisinullu ataatsimiititaliaq qanoq annertutigisumik taava suleqatigineqartassava, ullumitut peqqussut naammassigaangat ilisimatiinnarneqartassanerluni?
Taamaattumik siammasissumik suleqatigiittoqartoqarnissaa malinneqartariaqarpoq, aamma Pinngortitap illersorneqarnissaanut inatsisissap mianernartuusup suliarineqarnerani. Ilumut peqqissaartorujussuarmik suleqatigiinnissaq paaseqatigiilluarnissarlu tamatsinnut pingaaruteqarpoq, taamatut peqqussusiornissami annertutigisumik inuinut aammalu taamatut nunamut angitigisumut attuisoqassatillugu anneruniunnani paaseqatigiilluinnarnissaq pingaaruteqarpoq, akaareqatigiittumik ingerlariaqqissagutta, tamanna pisariaqavippoq.