Samling
Dansk tekst mangler
2. april 2002 UPA 2002/19
Iluarsiissut
(siusinnerusukkut siunnersuut 23. februar 2002-imik ullulerneqartoq taarserpaa)
Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutissaattut nr. xx, uu. qqqq 2002-meersussatut siunnersuut.
(Kommunit inissiaataasa attartortittakkat tunineqarsinnaanerat nammineerlunilu illulianut tunngatillugu eqqartuussivilersuussisinnaaneq pillugu maleruagassat allanngortinneri)
§ 1.
Inissialiornermut tapersiissuteqartarneq pillugu Inatsisartut peqqussutaanni nr. 1-imi 9. april 1992-imeersumi, ilaatigut inatsisartut peqqussutaatigut nr. 3-kkut, 30. oktober 1998-imeersukkut, kingullerpaamillu inatsisartut peqqussutaatigut nr. 19-ikkut 12. november 2001-imeersukkut allanngortinneqartumi makku allannguutigitinneqassapput:
1. § 9 ima oqaasertaqassaaq:
“§ 9. Kommunit inissiaataat attartortittakkat § 7 naapertorlugu Naalakkersuisunit tapiiffigineqartut Naalakkersuisut akuersiseqqaarnagit tuniniarneqassanngillat imaluunniit attartortittakkatut atorneqarnerannit allaanerusumik atorneqassanatik Piginneqatigiilluni inissiat pillugit Inatsisartut peqqussutaat naapertorlugu illumik piginneqatigiilluni inissiaatillit peqatigiiffiannut peqatigiiffiup ilaasortaminut atugassaanik tunniussinerit eqqaassanngikkaanni.
Imm. 2. Naalakkersuisut akuersinissaannut makku tunngaviussapput,
1) inissiat attartortittakkat najugarineqartut inissiani attartornermik isumaqatigiissuteqarlutik attartortunut neqeroorutigineqassasut, tak. Namminersornerullutik Oqartussat kommunillu inissiaataasa attartortittakkat nammineq pigisatut inissianngortissinnaanerat pillugu Inatsisartut peqqussutaat,
2) inissiat attartortittakkat inoqanngitsut tamanut pisiariumannittussarsiuunneqassasut akisunerpaamillu akiliiumasumut ataatsikkut akilersillugit tunineqassallutik,
3) inissiat tunineqannginnerini tunisinermi atugassarititaasut pillugit illullu tunineqarnerani tunisinermi iluanaarutip atorneqarnissaa pillugu Naalakkersuisut kommunillu akornanni isumaqatigiittoqaqqaassasoq, aamma
4) isumaqatigiissut taanna Inatsisartut Aningaasaqarnermut ataatsimiititaliaannit akuerineqassasoq.
Imm. 3. Kommunip inissiarsuarmik tunisinerani iluanaarutaasut Kalaallit Nunaanni aningaasaliisarfimmi aningaaserivimmi kontumut Naalakkersuisunut iluaqutaasussatut illuartinneqassapput. Tunisinermi iluanaarutit kommunimut tunniunneqassapput, tunisinermi iluanaarutit imm. 2, na. 3 naapertorlugu atornissaannut siunertaq eqquutsinneqarpat.
Imm. 4. Inissiat attartortittakkat nalilernissaannut, tunineqarnerminni akissaasa aalajangerneqarnissaannut tunisinermilu atugassarititaasut allat pillugit periusissamik aalajangersimasumik Naalakkersuisut aalajangersaassapput.”
2. § 25-mi, imm. 2-p kingorna immikkoortutut nutaatut ilanngunneqaaq:
“Imm. 3. Taarsigassarsiat § 22-mi taaneqartut isumakkeerneqarnissaasa akilerneqarnissaasaluunniit tungaannut illumut tunngatillugu iliuuserineqarsinnaasutut killigititat makku atuupput:
1) Illumut tunngatillugu eqqartuussivilersuussisoqarsinnaanngilaq.
2) Illu taarsigassarsianut sallunaveeqqutaasinnaanngilaq, taamaattorli takuuk § 23, imm. 4.
§ 2.
Peqqussut 1. juli 2002-mi atuutilerpoq. § 1, nr. 2 taarsigassarsianut imaluunniit taarsigassarsianut sallunaveeqqummut Nunatta Eqqartuussiviani Nalunaarsuisarfimmit peqqussutip atuutilinnginnerani nalunaarsorneqarsimasunut sunniuteqassanngilaq.
Namminersornerullutik Oqartussat, ulloq uu. qqqq 2002
Jonathan Motzfeldt
/
Jørgen Wæver Johansen
Peqqussutissatut siunnersuummut nassuiaatit
Nalinginnaasumik nassuiaatit
Peqqussutissatut siunnersuutip saqqummiunnera nunatsinni inissaqartitsiniarnerup nalinginnaasumik allanngortinniarneranut, ilaatigut pigisatut inissianik pilersuinerulernissamik kissaateqarnermik nassataqartumut kiisalu pisortat inissiaataasa attartortittakkat attartortuinut tunineqarnissaannik siunnersuutip ima qulequtallip “Attartortumit piginnittumut” kingunerisaanut ilaavoq.
Maleruagassat atuuttut naapertorlugit kommunit inissiaataatitik attartortittakkat Namminersornerullutik Oqartussanit sanaartornermut taperneqarsimasut, tassa imaappoq 60/40 atorlugu inissialiat tunniussinnaanngilaat illuutit piginneqatigiilluni inissiaatillit peqatigiiffiannut tunniussinnaanerat eqqaassanngikkaanni. Naalakkersuisut allamik aalajangiinngippata tunisinermut atatillugu kommuni tunisinermi akigitinneqartup ilaanik Nunatta karsianut akiliissaaq sanaartornermut tapiissutaasimasup procentiata angeqqataanik. Assersuutigalugu 60/40 atorlugu inissialiaasimappat tunisinermi akigitinneqartup 60 %-ia Nunatta karsianut akilerneqassaaq.
Tunisinermi iluanaarutip atorneqarnissaa assersuutigalugu kommunimi pineqartumi ineqarnermut tunngasutigut siunertanut allanut atorneqarnissaa pillugu Naalakkersuisut kommunillu akornanni isumaqatigiissutigineqarsinnaanera peqqussutissatut siunnersuutip nassataraa. Isumaqatigiissut taama ittoq Inatsisartut Aningaasaqarnermut ataatsimiititaliaannit akuerineqassaaq. Taamaalilluni kommunip tunisinermi iluanaarutit assersuutigalugu illuutinik aserfallatsaaliinermut imaluunniit sanaartornermut, aningaasanut tigoriaannarnut ilanngunnissaannut imaluunniit kommunit aningaasaqarnerata tamarmiusup pitsanngorsarnissaanut atorsinnaanngilai.
Inissiat pigilernissaannik attartortut kissaateqarnerat tunisinermi tunngavigineqassaaq. Kommunit aningaasarliornerminnik pitsanngorsaaniarlutik inissiaatiminnik tunisinissaat taamatullu iluanaarutinik piginniinnarnissaat siunertaanngilaq.
Siunnersuutip nassataraattaaq nammineerluni illuliat inatsisartut peqqussutaanni atuutsinneqartut allat saniatigut eqqartuussivilersuussinermut imaluunniit taarsigassarsianut sallunaveeqqusiussinermut atorneqarsinnaajunnaarput. Nammineerluni illuliaq illuliassap akiata 95 %-ianik tunissummik imaqarpoq. Taamaattumik pingaartuuvoq nammineerluni illuliassanik qinnuteqarsimasoq illuliassamik tigusisuunissaa nammineerlunilu illuliamik piginnittuulernissaa.
Taamaalilluni peqqussutissatut siunnersuutip nammineerluni illulianut atatillugu pisariaqanngitsumik isumaqatigiissuteqartoqartannginnissaa qulakkiissavaa. Taamatuttaaq peqqussutissatut siunnersuutip inuup nammineerluni illuliortoq illup sananerani ikiorsimagaluarpaguluunniit aammalu qanoq annertutigisumik ikiuussimaneq apeqqutaatinnagu, ikiuuttoq taanna nammi-neerluni illuliamik inatsisitigut piginnittuuneqarsinnaannginnissaa qulakkeerpaa.
Peqqussutissatut siunnersuut A/S Inissiaatileqatigiiffik INI-mut, KANUKOKA-mut, SIK.-mut, Sulisitsisut Peqatigiiffiannut, Grønlandsbanken A/S-imut, Sparbank Vestimut, Nuup Kommunianut, Aningaasaqarnermut Pisortaqarfimmut aammalu Aqutsinermut Pisortaqarfimmut tusarniaatitut nassiunneqarsimavoq. Siunnersuut tusarniaanermit akissutit tiguneqarsimasut eqqarsaatigalugit iluarsaanneqarsimavoq.
Peqqussutissatut siunnersuutip allaffissornikkut kingunerisassai
Peqqussutissatut siunnersuut kommunini allaffissornikkut kinguneqassaaq attartortut inigisaminnik piginnilerniarlutik qinnuteqaataannik kommunit suliarinninnerini. Peqqussutissatut siunnersuut kommuninut ataasiakkaanut A/S Inissiaatileqatigiiffik INI-mulluunniit inissianik aqutsisumut attartornerup allaffissornikkut aqunneqarneranut kinguneqangaarnavian-ngilaq.
Peqqussutissatut siunnersuutip aningaasatigut kingunerisassai
Kommunip inissiaatiminik attartortittakkanik tunisinermini aningaasaliissutinit siunissami iluanaarutissaraluaminik annaasaqarnissaa siunnersuutip nassataraa. Tulliullugu naatsorsuutigineqarsinnaavoq kommuni Nunattalu karsia akileraarutitigut annaasaqassasut, tassami inissiamik pisisut ernianut akiitsorisinnaasatik nammineerluni immersugassami ilanngaatigissammagit.
Nunatta karsiata tunisinermi iluanaarummit pisassani isumakkiiginnartariaqarnerinik siunnersuut nassataqarpoq, iluanaarutit kommunimi pineqartumi ineqarnermut tunngasuni siunertamut atorneqassammata. Tamanna Nunatta karsianut sunniuteqassangatinneqanngilaq, kommuni inissiaatiminik attartortittakkanik maanna tunisaqarsinnaanngimmat, kommunip tunisinermi iluanaarutit 60 %-iat Nunatta karsianut tunniutissappagit. Taamaalilluni Nunatta karsia kommunit 60/40 atorlugu inissiaataannik attartortittakkanik tunisinermit aningaasaqarnikkut iluanaaruteqassanngimmat, peqqussutissatut siunnersuut Nunatta karsianut taamaallaat akileraarnermut tunngasutigut sunniuteqassaaq.
Nunatta karsia aningaasaqarnermigut periarfissarissaarnerulissangatinneqarpoq, tassami naatsorsuutigisariaqarpoq Nunatta karsiata kommunimi kommunini pineqartuni 60/40 atorlugu kommunip inissiaatissaanik nutaanik sanaartornini taamatulli appartissinnaagaa.
Aalajangersakkanut ataasiakkaanut nassuiaatit
§ 1, imm. 1-imut
Kommunip inissiaatini attartortittakkat sanaartornermut tapiiffigineqarsimasut Namminersornerullutik Oqartussanit akuerineqartinnani tunisinnaannginnerinik aalajangersagaq suli nassataqarpoq. Taamaattorli Piginneqatigiilluni inissiat pillugit Inatsisartut peqqussutaanni maleruagassat atuutissapput attartortut attartukkamik piginneqatigiilluni inissiatut pisiarerusuppatigit. Aalajangersakkami aalajangersarneqarpoq inissiaq inoqarpat inoqanngippalluunniit qanoq iliortoqassanersoq. Inissiaq attartornermut isumaqatigiissuteqarluni inigineqarpat attartorneq Inissianik attartorneq pillugu Inatsisartut peqqussutaanni taanna ilaatinneqarpoq maleruagassarli taanna atussanngilaq inissiaq inoqanngippat.
Taamatuttaaq aalajangersakkami Naalakkersuisut kommunillu akornanni tunisinermit iluanaarutip qanoq atorneqarnissaa pillugu isumaqatigiissuteqartoqarnissaata kiisalu Inatsisartut Aningaasaqarnermut ataatsimiititaliaannit akuerineqarsimanissaata tunisinissamut akuersissuteqarnissamut tunngaviunissaa aalajangersarneqarpoq. Iluanaarutaasut siunertamut isumaqatigiissutigineqartumut atorneqarnissaat qulakkeerniarlugu, kommunip tunisinermi iluanaarutit Kalaallit Nunaanni aningaasaliisarfimmi aningaaserivimmi kontumut illuartissavai. Tamatuma kingorna tunisinermi iluanaarutit kommunimut aatsaat tunniunneqarsinnaapput, tunisinermi iluanaarutit atornissaannut siunertaq eqquutsinneqarpat.
Erseqqissaatigineqassaaq tunisinermit Nunatta karsia iluanaarutit 60 %-iannik pissarsisarnera ingerlaannassammat. Taamaattumik illuutip sananeqaqqammersup kingusinnerusukkut tunineqarnerani kommunip aammaarluni tunisinermi iluanaarutit 60 %-ii Nunatta karsianut tunniutissavai.
Aammataaq inissiat teknikikkut akimikkullu nalilersorneqarlutik qanoq nalilersorneqartarnissaat kiisalu tunisinermi akigitinneqartussap aalajangersarneqartarnissaa tunisinermilu atugassarititaasut allat pillugit Naalakkersuisut ersarinnerusumik maleruagassiornissaat aalajangersakkap nassataraa. Assersuutigalugu tunisinissamut missingiut il.il. unioqqutitsinertaqassanngilaq taamaallaallu inissiat pillugit paasissutissanik eqqortunik, piviusorsiortunik pineqartumullu tunngasunik imaqassalluni.
§ 1, nr. 2-mut
Kapitali 5 atorlugu nammineerluni illuliamut tunngatillugu eqqartuussivilersuussisoqarsinnaannginneranik taarsigassarsianullu sallunaveeqqutaasinnaannginneranik aalajangersagaq nassataqarpoq. Taarsigassarsianulli illup sallunaveeqqutaasinnaannginnerani pisortanit taarsigassarsiarititat kiisalu kapitali 5 naapertorlugu taarsigassarsiarititat allat pineqanngillat. Erniaqanngitsunik akilersugassaanngitsunillu illup nalingata 95 %-ianik taperneqarluni nammineerluni illuliortarnermik aaqqissuussinerup pitsaasup kingunerisaanik aallaavittut pingaaruteqarpoq qularnaassallugu illup inummit illumik piginnittussatut akuerineqarsimasumit pigineqarnissaa.
Aalajangersakkami ilaatigut qularnaarneqassaaq nammineerluni illuliortup taarsigassarsisuullunit inatsisitigut piginnittuunissaa illumillu tigusisussaasuunissaa, nammineerluni illuliortoq allallu akunnerminni qanorluunniit isumaqatigiissuteqarsimagaluarpata. Uppernarsaasiilluni kingornussinikkulluunniit illuliamik tunniussineq aalajangersakkami pineqanngillat. Taarsigassarsianut sallunaveeqqusiinerup aningaasartuutillu nalunaarsorneqarnissaannik qinnuteqaatit Nunatta Eqqartuussiviani Nalunaarsuisarfimmit itigartinneqassapput.
§ 2-mut
Aalajangersakkami siunnersuutigineqarpoq peqqussutissatut siunnersuut 1. juli 2002-mi atuutilissasoq. Taamaattorli illup eqqartuussivilersuunneqarsinnaatitaannginnera taarsigassarsianullu sallunaveeqqusiunneqarsinnaannginnera taarsigassarsianut sallunaveeqqutinulluunniit peqqussutip atuutilinnginnerani Nunatta Eqqartuussiviani Nalunaarsuiffimmit nalunaarsorneqarsimasunut atuutinngilaq.