04FM/01.25.01-13 Kalaallit Nunaanni pinerluttulerinermi inatsisip... (Meeqqat peqataatillugit pornoliorneq). (Namm., Aats. Inats. atortits. Naalakkersuisoq)

20120913 09:26:49
04FM/01.25.01-13 Kalaallit Nunaanni pinerluttulerinermi inatsisip... (Meeqqat peqataatillugit pornoliorneq). (Namm., Aats. Inats. atortits. Naalakkersuisoq)

Missingersuut


Kalaallit Nunaannut pinerluttulerinermut inatsisip allanngortinnissaanut inatsisissatut Siunnersut


(Meeqqanik atoqateqartarnermut tunngasoq)




§ 1


Kalaallit Nunaannut pinerluttulerinermut inatsimmi, takuuk inatsit pillugu nalunaarut nr. 49 13. februar 1979-meersoq, allanngortinneqartoq § 2-mi inatsimmi nr. 322-mi 4. juni 1986-meersumi, inatsimmi nr. 969-mi 4. december 1994-meersumi aamma § 1-mi inatsimmi nr. 292-mi 24. april 1996-meersumi, ima allanngortitsisoqassaaq:


  1. § 56-imut ilassutitut ikkunneqassaaq:

§ 56 a. Meeqqanik atoqateqatarnermut tunngasunik 18-it inorlugit assilisanik film-inilluunniit, allanilluunniit takuneqarsinnaasunik assigisaannilluunniit kanngutsaatsuliorluni siaruarterisoq pineqaatissinneqassaaq.


Stk. 2. Tamanna aamma atuuppoq inunnik 18-it inorlugit ukiulinnik assilisanik film-inilluunniit, kanngunartunik takusassanik allanik assigisaannilluunniit pigisaqartoq imaluunniit akilersilluni tamakkuninnga pigisaqartumut.


Stk. 3. Stk. 2-mi aalajangersagaq atuutsinngilaq inummut 15-ileereersimasumik assinik kanngunartulianik pigisaqartumut, inuk pineqartoq piginninnermut ta-matumunnga isumaqataasimappat.


Stk. 4. Ilaatigut aamma inuk assilinik kanngunartulianik, filmilianik assigisaan-nilluunniit inummik 18-it inorlugit ukiulimmik assiliisoq piaaralunilu taakkuninnga tuniniaasoq allatulluunniit siaruarterisoq, pineqaatissinneqassaaq.”


Inatsisissatut siunnersuummut oqaaseqaatit



Oqaaseqaatit nalinginnaasut



  1. Inatsisissatut siunnersuummut siunertarisat tunulequttallu

Kalaallit pinerluttulerinermut inatsisaat ullumikkut meeqqanik atoqateqartarnermi aamma meeqqanik atoqateqarnermut tunngasutigut assilisittartutut atuinermik imaqanngilaq.


Ilaatigut piffissami kingullermi meeqqanik atoqateqartarnermi kanngutsaatsulianik arlalitsigut Kalaallit Nunaanni naammattoorsisoqartarsimavoq, tamannalu tunulequtaralugu Kalaallit Nunaanni Naalakkersuisut qinnutigisimavaat meeqqanik atoqateqarnermut tunngasunik tunisassiorneq, pigisaqarneq siaruarterinerlu pillugit pinerluttunerinermut inatsimmi maleruagassiisoqarnissaannik suliniuteqartoqassasoq. Naalakkersuisut ilisimavaat Kalaallit Nunaanni Eqqartuussiveqarnermut Ataatsimiititaliarsuup isumaliutissiissutissaata meeqqanik atoqateqartarneq meeqqallu kanngunartuliatigut assilisittartutut atorneqartarnerat pillugu pinerluttulerinermut inatsimmi maleruagassatut siunnersuummik imaqarnissaa ilimagineqartoq, kisiannili Naalakkersuisut isumaqarput ullumikkut piviusut qiviaraanni, pineqartumilu illersuinissamik ima pisariaqartitsisoqartigisoq, kanngutsaatsuliornermut tunngasunik pigisaqarnissamut il.il. inerteqquteqalernissaq Naalakkersuisut isumaat naapertorlugu pinerluttulerinermut inatsisip kukkunersiorneqarnissaani takorluukkat, Retsvæsens-kommission-ip siunnersuutigilersaagaat, utaqqineqartariaqanngitsut.


Pinerluttulerinermut inatsimmi allanngortitsinissami Kalaallit Nunaanni Eqqartuussiveqarnermut Ataatsimiititaliarsuup isumaliutissiissutissaata isumaliutiissiissummilu siunnersuutit tusarniaaffiginissaat ataatsikkut suliarineqareernissaat isummerfigineqareernissaallu utaqqimaarneqartariaqara-luartut, tunulequtsiunneqartutut allanneqartoq tunngavigalugu Justitsministeria isumaqarpoq, meeqqanik atoqateqartarnermut tunngasunik pigisaqarneq il.il. kiisalu meeqqat kanngunartuliatigut assilisittartutut atorneqartarnerannut inerteqqutissaq pillugu pinerluttulerinermut inatsimmi maannangaaq aalajangersaasoqartariaqartoq.


Justitsministeriamut nalunaarutigineqarpoq Kalaallit Nunaanni Eqqartuussive-qarnermut Ataatsimiititaliarsuup isumaliutissiissutissaa meeqqanik atoqateqar-tarnermut tunngasutigut atortussianik meeqqallu kanngunartuliatigut assilisittartutut atorneqartarnerat pillugu pinerluttulerinermut inatsimmi aalajangersagassatut siunnersuummik imaqartussaasoq, qallunaat pillaasarnermi inatsisaani § 230-mi § 235-milu aalajangersakkat assigalugit, taamaattorli piffissaaleqineq pissutigalugu kingusinnerusukkut allannguutit 2003-mi pisut ilanngunnagit, takuuk inatsit nr. 228 2. april 2003-meersoq pillaasarnermik, meeravissiartaartarnermik eqqartuussiveqarnermillu inatsisit allanngortinnerat (Meeqqanik atoqateqartarnermut tunngasut, meeqqanik atoqateqartarnikkut atornerluinerit, meeqqat niuerutigineqartarnerat kiisalu meeqqanik atoqateqartarnikkut atornerluinerit il.il. pillaasarnermut suliat naammassineqartarnerat pillugu).


Inatsissatut siunnersuut suliarineqarpoq qallunaat maleruagassiaat atuuttut aallaavigalugit imaralugillu meeqqanik atoqateqartarnermut tunngasutigut pigi-saqarnermik kiisalu tuniniaanermik allatigullu siaruarterinermik inerteqqut. Inatsisissatut siunnersuutip ilaatigut aamma imaraa inunnik 18-it inorlugit ukiulinnik kanngunartuliatigut assilisittartutut atuinissamik inerteqqut.


  1. Meeqqanik atoqateqartarnermut tunngasoq

2.1   Eqqartuussinikkut atuuttut


Kalaallit Nunaannut pinerluttulerinermut inatsit meeqqanik atoqateqartarnermut tunngasutigut aalajangersakkanik qulaani taaneqartutut imaqanngilaq.


Tassunga akerliusumik tamanna pillugu aalajangersagaq pillaasarnermut inatsisip § 235-ianni atuarneqarsinnaavoq, ima oqaasertaqartoq:


                 § 235. Inunnik 18-it inorlugit ukiulinnik kanngunartuliatigut assinik film-inilluunniit, allatigut kanngunartuliatigut takusassianik assigisaannilluunniit siaruarterisoq akiliisitaanermik imaluunniit ukiuni 2-ni parnaarussaanermik imaluunniit sakkortunerusumik iliortoqartillugu ukiuni 6-ni parnaarussaanermik pillaatissinneqassaaq. Sakkortunerusumik iliornertut pingaartumik isigineqassapput meeqqap inuuneranik ulorianartorsiortitsineq, matumani pineqarlutik sakkortuumik persuttaaneq meeqqap pinartumik innarlerneqarneranik kinguneqartoq, imalunniiit tassani pineqarlutik siunertalimmik ataqatigiissaarilluni aaqqissuussilluniluunniit iliorneq.


                      Stk. 2. Inunnik 18-it inorlugit ukiulinnik kanngunartulianik assinik, film-inilluunniit, allatigut kanngunartuliatigut takusassianik assigisaannilluunniit pigisaqartoq imaluunniit akilersilluni ilisimasaqartoq, akiliisitaanermik imaluunniit ukiumik 1-mik parnaarussaanermik pillaatissinneqassaaq.


                      Stk.3. Stk. 2-mi aalajangersagaq atuutinngilaq inummik 15-it inorlugit ukiulimmik kanngunartuliatigut assinik pigisaqarnermut, inuk pineqartoq taamatut pigisaqarnissamut isumaqataasimappat.


2.1.1. Taamaalilluni pillaatissiisarnermut inatsimmi § 235, stk. 1-iat naapertorlugu 18-it inorlugit ukiulinnik kanngunartuliatigut assinik, film-inilluunniit imaluunniit kanngunartuliatigut takusassianik assigisaannilluunniit siaruarterisoq pillaatissinneqassaaq. Pillaatissiissutigineqartut tassaasinnaapput akiliisitaaneq imaluunniit ukiuni 2-ni parnaarussaaneq imaluunniit sakkortuumik iliorto-qarsimatillugu ukiuni 6-ni parnaarussaaneq.


Pillaatissiisarnermi inatsisip § 235, stk. 1-iata oqaasertai pinngorput inatsimmit nr. 228-mit 2. april 2003-meersumit, pillaatissiisarnermi inatsisip, meeravissiar-taartarnermut inatsisip aamma eqqartuussiveqarnermi inatsisip allanngortinneratigut (Meeqqanik atoqateqartarnermut tunngasoq, meeqqanik atoqateqarnermik atornerluineq, meeqqat niuerutigineqartarnerannut kiisalu meeqqanik atoqateqarluni atornerluinerit il.il. pillugit pillaatissiisarnermi suliat naammassineqartarnerat pillugu.). Inatsisip taassuma pillaatissiisarnermi inatsisip meeravissiartaartarnermilu inatsisip allanngortinnerinik kinguneqartippai, meeqqat pisinnaatitaaffii pillugit FN-ip isumaqatigiissusiaanut ilassutitut allattuiffiannik Danmark-ip atuutsitsilernissaanut pisariaqartut. Ilassutitut allattuiffimmi pineqarput meeqqanik niuerutiginninnermut, meeqqanik atortittartuuteqarnermut aamma meeqqanik atoqateqarnikkut kanngunartulianut tunngasut.


2003-mi inatsisip allanngortinnerata kinguneraa eqqartuussivitsigut pillaatissiinikkut illersugaanermi meeqqat piinnarnagit inunnut 18-it inorlugit ukiulinnut annertusinera. Ilaatigut aamma aalajangersagaq annertusineqarpoq inunnik 18-it inorlugit ukiulinnik kanngunartulianik takusassiat ilanngunnerisigut. Taamaalilluni “piviusuunngitsutut” taaneqartartoq (qarasaasiamik atuineq ilisarnaatigalugu) meeqqanik atoqateqartarnikkut kanngunartuliat aalajangersakkami ilanngunneqarput, kiisalu tamakkuninnga siaruarterinerit suulluunniit – inuussutissarsiutigalugu siaruarterinerit imaluunniit inunnut amerlasuunut siaruarterinerit aamma piinnarnagit – ilanngunneqarput.


2.1.2. Meeqqanik atoqateqarnikkut kanngunartulianik pigisaqarneq pinerluttu-lerinertut isigineqalerpoq pillaatissiisarnermi inatsimmi § 235, stk. 2-mi, taamaalilluni inuk assinik, film-inik, allanillu inunnik 18-it inorlugit ukiulinnik kanngunartuliatigut takusassianik pigisaqartoq, akiliisitaanermik imaluunniit ukiumik 1-mik parnaarussaanermik pillaatissinneqarsinnaalerluni. Aalajangersakkami pineqanngilaq inummik 15-ileereersimasumik kanngunartuliatigut assinik pigisaqarnermik malersuinissaq, inuk assiutigineqartoq taamatut pigisaqarnermut isumaqataasimappat.


Pillaatissiisarnermi inatsisip § 235, stk. 2-ata maannakkut oqaasertai pinngorput inatsimmi nr. 228-mi 2. april 2003-meersumi pillaatissiisarnermi inatsisip, meeravissiartaarnermi inatsisip kiisalu eqqartuussiveqarnermi inatsisip allanngortinneri pillugit Meeqqanik atoqateqarnikkut kanngunartuliat, atoqateqarnikkut meeqqanik atuineq, meeqqanik niuerutiginninneq aamma meeqqanik atoqateqarnikkut atornerluinerit pillugit pillaatissiinermi sulianik naammassinninnerit il.il.).


2.2   Inatsisissatut siunnersuutip ilusilersornera


Siunnersuutigineqassaaq kalaallit pinerluttulerinermut inatsisaanut ilanngunne-qassasoq meeqqanik atoqateqarnikkut kanngunartulianik siaruarterinissap pigi-saqarnissallu inerteqqutiginera pillugu aalajangersagassaq (§ 56 a, stk. 1-3), qallunaat pillaatissiisarnermi inatsisaata § 235-iat assigalugu.


Inatsisissatut siunnersuutip § 1-annut (§ 56 a, stk. 1-3) oqaaseqaatit pingaartumik takoqquneqarput.



3.      Meeqqat inuusuttuaqqalu assilisittartutut (pornomodeller) atonerneqartarnerat


3.1. Eqqartuussinikkut atuuttut


Meeqqanik inuusuttuaqqanillu 18-it inorlugit ukiulinnik “kanngunartuliatigut assilisittartutut” (pornomodeller) atuinerit pillaatissiisarnermi inatsip § 230-iata pillarneqaataasussaatippai. Soorlu qulaani taaneqareersoq kalaallit pinerluttu-lerinermut inatsisaani taamatut aalajangersagaqanngilaq. Taamaattorli piner-luttulerinermut inatsit aalajangersagartaqarpoq meeqqat 15-it inorlugit ukiullit pillugit, unioqqutitsisoqartillugulu ullumikkut pillarneqaataasussaatitsisoqarluni meeqqat taamatut ukiullit atoqateqarnikkut takusassiatigut immiussinerinnarmi assilisittartutut atorneqartarnerat pillugu. Taassuma tunngavigaa  pillugu pinerluttulerinermut inatsisip § 53, stk. 1-iat atoqateqarneq allatulluunniit meeqqanik 15-it inorlugit ukiulinnik kinguaassiuutitigut atoqatigiinneq pillugu aamma § 56, stk. 1 kannguttaalliorfiginninneq pillugu.


Pillaatissiisarnermi inatsisip § 230-iata aalajangersagartai ima oqaasertaqarput:


                 § 230. Kinaluunniit inummik 18-it inorlugit ukiulimmik kanngunartuliatigut assinik, film-inik assigisaannilluunniit assiliisoq, piaaralunilu tuniniaasoq allatulluunniit pigisanik taamaattunik siaruarterisoq akiliisitaanermik imaluunniit ukiuni 2-ni parnaarussaanermik pillaatissinneqassaaq, imaluunniit sakkortuumik iliortoqarsimatillugu ukiuni 6-ni parnaarussaanermik. Sakkortuumik iliornertut pingaartumik isigineqassaaq meeqqap inuuneranik ulorianartorsiortitsineq, sakkortuumik persuttaaneq, pinartumik meeqqamik ajoqusiinermik kingunilik, atorneqarpat, imaluunniit matumani pineqarluni siunertalimmik ataqatigiissaarilluni aaqqissuusilluniluunniit iliornerit.


Taamaalilluni pillaatissiisarnermi inatsimmi § 230 malillugu inuk inummik 18-it inorlugit ikiulimmik kanngunartuliatigut assinik, film-inik assigisaannilluunniit immiussisoq, piaaralunilu tamakkuninnga tuniniaasoq allatulluunniit siaruarterisoq pillaatissinneqassaaq.


3.2. Inatsisissatut siunnersuutip ilusilersornera


Siunnersuutigineqassaaq kalaallit pinerluttulerinermut inatsisaani aalajangersagaq (§ 56 a, stk. 4) ilanngunneqassasoq, matumani pineqarluni inuusuttuaqqat 18-it inorlugit ukiullit assilisittartutut (pornomodeller) atorneqartarnerannik inerteqqut, qallunaat pillaasarnermi inatsisaani § 230 assigalugu.


Inatsisissatut siunnersuutip § 1-annut (§ 56 a, stk. 4) oqaaseqaatit pingaartumik takoqquneqarput.



4.    Siunnersuutip aningaasatigut allaffissornikkullu kingunissai


(…)



Inatsisissatut siunnersuutip kingunissaasa nalilernera



Kingunissat ajunngitsut/


aningaasartuutikinneruneq

Kingunerlutsisisussat/


aningaasartuuteqarneruneq

Naalagaaffimmut, kommunimut


Amtskommunimullu aningaasa-


tigut kingunissat

Soqanngilaq

-

Naalagaaffimmut, kommunimut


Amtskommunimuullu allaffissor-


nikkut kingunissat

Soqanngilaq

Soqanngilaq

Namminersorlutik inuussutissar-


siortunut aningaasatigut kingu-


nissat

Soqanngilaq

Soqanngilaq

Namminersorlutik inuussutissar-


siortunut allaffissornikkut kingu-


nissat

Soqanngilaq

Soqanngilaq

Avatangiisinut kingunissat

Soqanngilaq

Soqanngilaq

Innuttaasunut allaffissornikkut


kingunissat

Soqanngilaq

Soqanngilaq

Eqqartuussivitsigut EU-mut


pisussaaffiit

Eqqartuussivitsigut EU-mut


attuumassuteqanngilaq





5.    Oqartussaasut il.il. tusarniaaffigineqartut.


Inatsisissatut siunnersuut tusarniaassuutigineqanngilaq.



Inatsisissatut siunnersuutip aalajangersagartaannut ataasiakkaanut oqaaseqaatit



§ 56 a-mut


Stk. 1-mut (meeqqanik atoqateqarnermut tunngasunik tuniniaaneq siaruarterinerlu.)


Stk. 1-itut siunnersuutigineqarpoq inuk inunnik 18-it inorlugit ukiulinnik kanngunartulianik assinik film-inilluunniit, takusassianik allanik assigisaannilluunniit siaruarterisoq pillugu pillaatissiisarnermi § 235, stk. 1-iat assigalugu aalajangersakkamik ilanngussisoqassasoq.


Siunnersuutigineqarpoq pillaateqaataasussanngorlugu pineqartumi allanneqassasoq “kanngunartulianik assinik, film-inik, takusassianik allanik assigisaannilluunniit”. Taamaalilluni meeqqanik atoqateqarnermut tunngasut piviusuunngitsutut taaneqartartut – soorlu qarasaasiaq atorlugu meeqqanik atoqateqarnermut tunngasunik assiliornerit – aalajangersagassami pineqassapput. Atorneqarnissaata avataatigut pineqarput atortussiat kanngunartulianik imallit allattukkatut ilusilersukkat.


“Kanngunartulianik” oqarnermi tunaartarineqarpoq ilaatigut meeqqat assii, isikkui malillugit pinerluttulerinermut inatsimmi § 53-mi aalajangersakkani atuuttuni pineqartut (meeqqamik 15-it inorlugit ukiulimmik atoqateqarneq allatulluunnit kinguaassiuutitigut atoqatiginninneq). Matumani pingaarnertut isigineqartariaqarpoq meeraq pineqartoq atoqateqarnermut peqataanersoq imaluunniit immiussinermut assiliinermulluunniit atatillugu sakkortuumik narrunarsaanermik iliuuseqartoqarnersoq, soorlu kinguaassiuutinik imaluunniit atoqateqarnermut attuumassuteqartumik attuualaarinninnermut tunngasunik meeqqamik assilisittartutut atuineq. Meeqqanik tamataqanngitsunik assit nalinginnaasut, soorlu pinnguarnermut tunngasut, aalajangersagassatut siunnersuummi pineqanngillat.


Ilaatigut aamma siunnersuutigineqassaaq illersuiffissatut sammineqartumi allanneqassasoq “inuit 18-it inorlugit ukiullit”. Inuup kinaanera ukiualu ilisimaneqanngippata pillarneqaataassutiginissaanut aalajangiisuulluinnassaaq atoqatigiinnikkut kanngunartuliatigut pigisani 18-it inorlugit ukioqartutut takuneqarsinnaanersoq.


Oqaaseq “siaruarterineq” pinerlulluni qanoq iliuutsinut tamanut taaguutitut atorneqarpoq. Taamatut oqaasertalersuinermi pineqarput siaruarterinerit suulluunniit, matumanilu nunanut allanut tuniniaaneq, amerlasuunut tuniniaaneq, aallakaatitsineq il.il. Piviusuunngitsumik meeqqanik atoqateqarnermut tunngasunik pigisat misilillugu siaruarterniakkat pillarneqaataasussaassapput.


Inuk kinaluunniit, akunnermiliuttuuginnanngitsoq, meeqqanik atoqateqarnermik assiliisoq, film-iliortoq il.il., inuit 18-it inorlugit ukiullit meeqqanik atoqateqarnermut tunngasutigut assilisittartutut atorneqartut siaruarterneqarnissaannillu siu-nertaqarfigineqartut pillugit, aalajangersagassatut siunnersuut malillugu piner-luuteqartutut akisussaatinneqaannarsinnaanngilaq (imaluunniit taamaalioriaraluartoq, siaruarterneqannginnerannillu tigusarineqartoq). Inuk pineqartoq § 56 a, stk. 4-mi aalajangersagassatut siunnersuut malillugu pinerluttutut aamma aki-sussaatinneqarsinnaavoq. Ilaatigullu immiussinermut assiliinermulluunniit atatillugu kinguaassiuutitigut pinerluuteqarnermut taputartuunneqartumut pillaa-tissiisoqarsinnaavoq, matumanilu soorlu § 53.


Oqaaseqaatini nalinginnaasuni pkt. 2 ilaatigut takoqquneqarpoq.


Stk. 2-mut 3-mullu (meeqqanik atoqateqarnermut tunngasunik atortussianik pigisaqarneq)


Stk. 2-tut siunnersuutigineqassaaq pillaatissiisarnermi inatsimmi § 235, stk. 2-mi aalajangersakkat assigalugit aalajangersagassaq, inuk inunnik 18-it inorlugit ukiulinnik kanngunartuliatigut assinik film-inilluunniit, takusassianik allanik assigisaannilluunniit pigisaqartoq imaluunniit akilersilluni tamakkuninnga ilisi-masaqalersoq pillugu.


Siunnersuutigineqarpoq aalajangersagassami – nutaatut § 56 a, stk. 1-tut siunnersuummi pineqartoq assigalugu – pineqassasut “inunnik 18-it inorlugit ukiulinnik kanngunartuliatigut takusassiat assilisalluunniit”. Taamaattorli peqa-tigitillugu  § 56 a, stk. 3-mi siunnersuutigineqassaaq § 235, stk. 3-mi pineqartut assigalugit, pigisaqarneq, pillarneqaataasussaassanngitsoq, inuk piffissami pine-qartumi 15-ileereersimalluni assilisissimasoq, assip pigineqarnissaanik akuersisi-masoq pineqarpat.


Meeqqanik tamataqanngitsunik assit nalinginnaasut, soorlu pinnguarnerup nalaani, tamatumunnga akerliusumik taamatut isikkoqartillugit, pillarneqaataa-sussaassanngillat, assit taamaattut oqariaatsimut “kanngunartuliatigut” ilaanngimmata.


Aalajangersagassatut siunnersuummi pineqartutut inuk meeqqanik atoqateqar-nermut tunngasunik atortussianik “pigisaqartutut” oqaatigineqarsinnaaneranut apeqqut ilaatigut nalornisoortitsisinnaavoq, pingaartumik pigisat elektronikikkut tusagassiuutit atorlugit siaruarterneqarpata, soorlu internet-ikkut.


TV-kut aallakaatinneqartunik isiginnaarnermi (soorlu satellit-it aqqutigalugit) imaluunniit assinik database aqqutigalugu nammineq edb-kut isiginnaarummut nuussinermi, assit isiginnaartumit pigineqarnersut oqaatigineqarsinnaanngilaq. Tamatumunnga akerliusumik assit toqqorterneqartut pineqarpata, soorlu video-bånd-inut, harddisk-imut, diskette-mut assigisaannulluunniit, inuup pineqartup assit nammineerluni saqqummerseqqissinnaallugit, atortussiat pineqartup pigisaattut isigineqarsinnapput.


Aalajangersagassatut siunnersuutigineqartup aamma imaraa meeqqanik atoqa-teqarnermut tunngasutigut atortussianik immikkut ittunik, aalajangersakkami taaneqartutut, inuk akilersilluni ilisimasaqalersoq. Taamaalillunilu taamatut pigisaqarneq pillugu pinerluuteqartutut isiginninnermut aamma inuk pineqarpoq – naak pigisaqartutut isigineqarneq pineqanngikkaluartoq – akilersilluni meeqqanik atoqateqarnermut tunngasutigut takusassianik ilisimasaqalersoq. Pissutsinut piaarinaatsoornermut tunngasunut, soorlu internet-imik atuisoq piffinnut immikkut ittunut, meeqqanik atoqateqarnermut tunngasunut akeqanngitsumik isiginnaarsinnaasoq, aalajangersakkami pineqanngilaq. “Akilersilluni” taasami pineqarput paarlaasseqatigiinnerit suulluunniit, matumanilu akiliutinik allanik paarlaasseqatigiinnerit. Akiliutip qanoq ililluni akilerneqarnera sunniuteqaataanngilaq, matumanilu soorlu akiliutigisaq internet-ikkut atuinissamik neqerooruteqartoq aqqutigalugu akilerneqassappat imaluunniit tamanna hjemmeside-mik meeqqanik atoqateqarnermut tunngasunik piginnittumut toqqaannartumik pippat.


Nalinginnaasumik oqaaseqaatini pkt. 2 ilaatigut takoqquneqarpoq.


Stk. 4-mut (meeqqat assilisittartutut atorneqartarnerat)


Stk. 4-tut siunnersuutigineqassaaq pillaatissiisarnermi inatsimmi § 230-mi pineqartut assigalugit aalajangersagaq, imaralugu inuk inummik 18-it inorlugit ukiulimmik kanngunartuliatigut assinik, film-inik assigisaannilluunniit assiliisoq, piaaralunilu tuniniaasoq allatulluunniit iliorluni atortussianik siaruarterisoq.


Aalajangersakkami piumasarineqarpoq inuup 18-it inorlugit ukiullip kanngunar-tuliatigut assinik il.il. assiliisoqartoq ilisimassagaa. Isertorluni assiliineq immius-sinerluunniit pinerluttulerinermut inatsimmi § 56-annut ilaavoq (kannguttaatsuliorneq) imaluunniit § 68, stk. 1, nr. 4 (piffimmi tikinneqarsinnaanngitsumi inunnik assiliineq).


Assiliinerit aalajangersakkami pineqassappata assinik kanngunartulianik ima-qassapput. Matumani assit pineqartut tassaapput atoqatigiinnermik tassungaluunniit assingusumik iliornernik takutitsisut. Ilaatigut aamma assiliinerit pineqarput ilaatigut immiussinermut atatillugu sakkortuumik narrunarsaanermik iliornernik imaqartut, soorlu kinguaassiuutinik imaluunniit atoqatigiinnermut tunngasutigut attuualaarinninnernik assiliinernut inuk atorneqarsimappat.


Pinerlunnermik iliornertut isigineqassaaq “kanngunartuliatigut assinik, film-ilianik assigisaannilluunniit” assiliineq. Oqariaatsimi “assigisaannilluunniit” pineqarput allatigut assinik aallakaatitsinerit, soorlu assit toqqaannartumik aallakaatitsinernut tunngasut, toqqorterinertaqanngitsut.


Inunnik 15-it inorlugit ukiulinnik assilisittartutut atuineq ilaatigut pinerluttulerinermut inatsimmi § 53-mi aamma pineqarsinnaavoq (atoqatigiinneq imaluunniit meeqqamik 15-it inorlugit ukiulimmik kinguaassiuutitigut allatut atoqateqarneq).


Nalinginnaasumik oqaaseqaatini pkt. 3 ilaatigut takoqquneqarpoq.




                                                                                                        Bilag 1




Inatsisissatut siunnersuut inatsimmut atuuttumut naleqqiullugu


                 Oqaasertai atuuttut                       Inatsisissatut siunnersuut



1.     § 56-ip kingorna ikkunneqassaaq:


§ 56 a. Meeqqanik atoqateqarnermut tunngasunik atuinermi inuk inunnik 18-it inorlugit ukiulinnik kanngunartuliatigut assinik, film-inik allatigulluunniit takusassianik assigisaannilluunniit siaruarterisoq pineqaatissinneqassaaq.


Stk. 2. Tamanna aamma atuuppoq inunnik 18-it inorlugit ukiulinnik kanngunartuliatigut assinik film-inilluunniit, kanngunartuliatigut allatigut takusassianik assigisaannilluunniit pigisaqartumut imaluun-niit akilersilluni tamakkuninnga ili-simasaqalersumut.


Stk. 3.Stk. 2-mi aalajangersagaq atuutinngilaq inummik 15-ileereersimasumik kanngunartuliatigut assinik pigisaqarneq, taamatut pigisaqarnermut assilisittoq isumaqataasimappat.


Stk. 4. Ilaatigut inuk pineqaatissinneqassaaq inummik 18-it inorlugit ukiulimmik kanngunartuliatigut assinik, film-inik assigisaannilluunniit assiliisimasoq, piaaralunilu taakkuninnga tuniniaasoq aallatulluunniit atortussianik tamakkuninnga siaruarterisoq.”