04FM/01.25.01-02 Ullormut oqaluuserisassanut nassuiaatit
16. april 2004 UPA 2004/2
Ullormut oqaluuserisassanut nassuiaat
(Inatsisartut Siulittaasoqarfiat)
Upernaakkut ataatsimiinnermi ullut ataatsimiiffissatut pilersaarutigineqartut 18-it ingerlanerini Naalakkersuisut siunnersuutaat 26-it suliarineqassapput. Taakkunannga
Inatsisartut inatsisissaattut siunnersuutip sisamaapput, Inatsisartut peqqussutissaattut siunnersuutit pingasuupput Aalajangiiffigisassatut siunnersuutit 13-iupput, aamma Nassuiaatit arfinillit.
Ullormut oqaluuserisassani atuarneqarsinnasutut Inatsisartunut ilaasortat katillugit 76-inik siunnersuuteqarput. Taakkunannga:
Inatsisartut peqqussutissaattut siunnersuut ataaseq, Aalajangiiffigisassatut siunnersuutit 32-it,
Apeqquteqaat aallaavigalugu oqaluuserisassatut siunnersuutit 14-it, aamma Naalakkersuisunut apeqqutit oqaatigalugit saqqummiussassat 29-it.
Taamatuttaaq ilaasortat siunnersuutaat arfinillit UKA 2004-imeersut ataatsimiinnerni matumani aappassaaniigassatut ingerlateqqitaapput.
Taamaalilluni siunnersuutitut saqqummiunneqartut tamarmik ullormut oqaluuserisassanut ilanngunneqarput, taamaalillunilu siunnersuutit katillugit 108-llutik.
Siunnersuutit taaneqartut saniatigut siunnersuutit pingasut Inatsisartut suleriaasiannut aaqqis-suussaanerannullu kiisalu Inatsisartut ataatsimiinnerisa avammut tusarliunneqartarnerannut tunngassuteqarput. Sammisassat taamaattut Inatsisartut Siulittaasoqarfiata ileqquusutut isumagisassarai, taamaammallu siunnersuuteqartunut isumaqatigiissutigineqarsimavoq siunnersuutit Siulittaasoqarfimmut inassuteqaatitut suliarineqassasut. Inassuteqaatit taakku suliarineqarneranni Siulittaasoqarfiup ataatsimeeqatiginerani siunnersuuteqartut peqataanissamut periarfissaqartussaapput. Siunnersuutit oqaatigineqartut makkununnga tunngassuteqarput:
Inatsisartut ataatsimiittarneri, Siulittaasoqarfiup atuunnera, ataatsimiinnerit torersumik ingerlanneqarnissaasa qulakkeerneqarnissaat pillugu qisuariaateqarnissamut periarfissat, Inatsisartut sulinerisa radiukkut toqqaannartumik aallakaatinneqartarnerannut taarsiullugu aviisiliortunit suliarineqartutut ingerlateqqinneqartarnissaat.
(Inatsisartunut ilaasortaq Aqqaluk Lynge, Inuit Ataqatigiit)
Inatsisartut ataatsimiinnerisa kalaallisut aallakaatinneqartarnerisa annertoqataanik qallunaatut aallakaatinneqartarnissaannut periarfissiinissaq.
(Inatsisartunut ilaasortaq Palle Christiansen, Demokraatit)
Nunaqarfinnut immikkut tunngassutilinnik suliarinnittartussamik Inatsisartuni ataat-simiititaliamik ataavartumik pilersitsinissaq.
(Inatsisartunut ilaasortaq Jakob Sivertsen, Atassut)
Inassuteqaatitut taaneqartut oqaluuserineqareerpata Inatsisartut oqaluuserisassaannik saqqummiussisoqassaaq.
Inatsisartunut ilaasortat Ruth Heilmann Georg Olsenilu siunnersuutinik tunniussinissamut piffissaliussamut atatillugu immikkut akuerineqartussatut ullormut oqaluuserisassani aalajangiiffigisassatut siunnersuutinik saqqummiussipput. Siunnersuutit taakku marluullutik meeqqat peqataatillugit kinguaassiutitigut atoqatigiinnermit assilisanik saqqummiussisarnermut, peqartarnermut siammarterisarnermullu tunngatillugu pinerluttulerinermik inatsisip al-lanngortinneqarnissaanut tunngassuteqarput. Naalakkersuisut nalunaaruteqarput inatsiseqarfimmut tamatumunnga akisussaallutik danskit pisortaannut kinguarsaanertaqanngitsumik iliuuseqartoqalersoq. Ilaasortat siunnersuutaat taakku marluk ataatsimiinnerni matumani Naalakkersuisut aalajangiiffigisassatut siunnersuutaannut atatillugit suliarineqassapput. Ullormut oqaluuserisassanut erseqqinnerusumik inissinneqartariaqarput.
Ataatsimiinnerni ullut aalajangersimasumik ataatsimiiffissat ullut nalliuttut ullorlu anner-tuumik nalliuttorsiorfiusussaq ajornartitsisinnagit tassaassapput marlunngornerit, pingasunngornerit, sisamanngornerit tallimanngornerillu.
Ullormut oqaluuserisassani siullermeerlugit iluarsiivigineqarlutik ulloq 13. april 2004 saqqummiunneqarlutik takuneqarsinnaasuni ulloq 14. maj ullortut ataatsimiiffiunngitsutut inississallugu tulluartutut Siulittaasoqarfiup isigaa. Tamanna pissaaq Kunngikkormiutut Ataqqinassusillip Kunngissap arnallu Mary Elizabeth Donaldsonip ulloq taanna aappariilerluti katinnissaat pissutigalugu.
Maannalu apeqqutigissavara ullormut oqaluuserisassatut siunnersuut Inatsisartut akuersissutigisinnaaneraat.